Wb/nia/Yakobo/1

Add links
From Wikimedia Incubator
< Wb‎ | nia‎ | Yakobo
Wb > nia > Yakobo > 1

Fangowai[edit | edit source]

I. 1 Yakobo zanura da'e, enoni Lowalangi andrö ba enoni Yesu Keriso, ba zi felendrua tua andrö, sizaewe misa; ya'ahowu![1]

Famarou tödö ba wanaha tödö[edit | edit source]

II. 2 Mibe'e fa'omuso dödö manö, ya'ami ira talifusögu, na oya itörö ami fanandraigö, hadia ia ngawalö;[2] 3 me no aboto ba dödömi, na no mutandraigö wamatimi, ba fanaha tödö lua-lua.[3] 4 Ba famo'ahonoa dania wanaha tödö andrö, ena'ö mo'ahonoa ami, si lö sala, ba böi ambö hadia ia.[4] 5 Ba na so ba khömi zambö fa'atua-tua, ba yamu'andrö khö Lowalangi, same'e manö, fefu gofu ha niha zangandrö, lö ihede-hede'ö; ba tebe'e khönia.[5] 6 Ba yafaduhu dödönia, ba wangandrö, böi mangiwa; sangiwa tödö sa, ba no hulö ndrulu nasi, nifadaulu-daulu nangi, nifangörö-ngörö misa.[6] 7 Böi sa yamuŵa'ö tödönia niha si manö, so dania hadia ia zinemania khö Zo'aya; niha si dua tödö, 8 samangörö-ngörö manö nilaunia, fefu. 9 Ba talifusö, side-ide, ba yamusuno ia, ba wa'asalaŵania;[7] 10 ba so'ana'a, ba yamusuno ia ba wa'ide-idenia, me no lala mbowo ndru'u dania lalania.[8] 11 Tumbu luo, so wa'aukhu zino, ba aleu ndru'u andrö, ba bowonia, ba atoru, ba taya wa'asökhinia; si manö göi dania wa'aleu zo'ana'a, ba lalania andrö.[9] 12 Ya'ahowu niha, sanaögö fanandraigö andrö, na no faduhu dödö dania khönia, ba itema dakula fa'auri andrö, nifabu'u Zo'aya ba zangomasi'ö ya'ia.[10]

Börö wanandraigö[edit | edit source]

III. 13 Böi yamuŵa'ö niha, na tetandraigö ia: Moroi khö Lowalangi, wa tetandraigö ndra'odo: Lowalangi, ba tebai tetandraigö ba zi lö sökhi, ba ya'ia, ba lö itandraigö niha. 14 Ba dozi nitandraigö, ba ba wangisö dödöra tezöbi-zöbi ira ba tedönisi. 15 Awena dania, na no abeto wangisö andrö, ba i'adonogö horö, ba horö andrö, na no mufalua, ba i'adonogö wa'amate.[11] 16 Böi elungu ami, ya'ami ira talifusögu, somasi ndra'o. 17 Ha sambalö ame'ela si sökhi, ba ha sambalö buala so'ahonoa zi otarai moroi si yaŵa, moroi khö Nama zihaga andrö, mitou, ba zi lö fa'atobali, ba he fa'atelumö-lumö.[12] 18 Nilau dödönia, wa no i'adonogö ita, moroi ba daroma li si duhu andrö, ena'ö böröta nifazökhinia ita.[13] 19 Ya'aboto ba dödömi, ya'ami ira talifusögu, somasi ndra'o: dozi niha, ba ndramu'alio'ö wamondrongo, böi ndramufahulö wehede, ba böi alio wofönu.[14] 20 Fönu niha andrö sa, ba lö ilau zatulö, wamaigi Lowalangi.[15] 21 Andrö miböhöli fefu, hadia ia, zi ra'i-ra'iö andrö, awö fefu walösökhi andrö, si no fahöna, ba mibologö dödömi wamonaha taroma li andrö, nitanö ba dödömi fangorifi nosomi.[16]

Hadia zi sökhi folo'ö[edit | edit source]

IV. 22 Ba mi'o'ö daroma li andrö, ba böi ha famondrongo manö, wolimo ya'ami.[17] 23 Na so zamondrongo taroma li andrö, ba na lö i'o'ö, ba no hulö niha samaigi bawania ba zörömi; 24 na no ifaigi ia, ba mofanö sa'ae ia, ba i'anema'ö olifu, he wisa khala-khalania. 25 Ba si no monehegö oroisa fangefa andrö, si no mo'ahonoa, ba si lö tebulö ba da'ö, si tenga ha samondrongo, solifu; na solo'ö göi ia: da'ö zodöŵa-döŵa tödö dania, ba wolaunia andrö.[18] 26 Na so zanguma'ö tödönia, samosumange Lowalangi ia, ba na lö itaha lelania, na ilimo dödönia, ba no faya wamosumangenia Lowalangi.[19] 27 Da'ö zi sökhi wamosumange Lowalangi, si lö si fabaya hadia ia, wamaigi Lowalangi Ama: na möi ita mutolo zi lö ama, si lö ina, awö zi no mate donga ba wa'abu dödöra, ba na tafaigi, fa böi göna ita si ra ira'iö andrö, ba niha guli danö.[20]

Famotokhi ba gahe[edit | edit source]

  1. ↑ Gal 1:19; Yud 1; FetI 1:1
  2. ↑ FetI 4:13; Mat 5:11,12; Ayati 12
  3. ↑ Rom 5:3,4
  4. ↑ Heb 10:36
  5. ↑ Faigi 3:17; Mat 7:7
  6. ↑ Faigi 5:15,16; Mat 7:7
  7. ↑ Luk 1:47,52
  8. ↑ KorII 12:9; FetI 1:24
  9. ↑ Sin 90:5,6
  10. ↑ Ayati 2; Faigi 5:11; Yob 5:17 b.t.; TimII 4:8; Fam 2:10
  11. ↑ MozI 3:6; Rom 6:23
  12. ↑ Yoh 3:27; Sin 139:12; Rom 11:29
  13. ↑ FetI 1:23
  14. ↑ Sangomb 5:1; Amaed 17:27
  15. ↑ Amaed 29:22; Efes 4:26
  16. ↑ Kol 3:8; KorI 15:1,2
  17. ↑ Faigi 2:14; Mat 7:21; Luk 11:28
  18. ↑ Faigi 2:12; Rom 8:2; Yoh 13:17
  19. ↑ Faigi 3:2 b.t.; FetI 3:10
  20. ↑ Yes 1:17; Mat 25:36

Fabaliŵa lala[edit source]

Olayama Zura Yakobo: 1 • 2 • 3 • 4 • 5

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Yakobo/1&oldid=6229863"