Wp/isv/Petok

Petok jest pety denj v sedmici, denj medžu četvrtkom i subotoju. V krajah, kde suprotiv standarda ISO 8601 prvym dnjem sedmice jest obyčajno nedělja, petok jest 6. denj v sedmici. Petok jest obyčajno poslědnji denj rabotnoj sedmice v krajah s 5-dnjevnoju rabotnoju sedmiceju.

V hristijanstvu petok jest denj, kogdy verniki raznyh tečenij odkazyvajut se od mesa životin i pticy i alkohola. V islamu petok jest denj glavnoj molitvy, ktoru dělajut vměstu v mečetah. V judaizmu šabat počinaje se s zahoda solnca v petku i prodolžaje se do zahoda solnca v subotu.

V slovjanskyh jezykah ime petka proizhode od slov "pety denj" (běl.: пятніца; bulg.: петък; češ.: pátek; mak.: петок; pol.: piątek; rus.: пятница; srbohrv.: petak; slovač.: piatok; sloven.: petek; ukr.: п'ятниця). V romansskyh jezykah ime petka proizhode od slov "denj Venery", rimskoj boginje ljubvi, v germanskyh jezykah — od slov "denj Frig", germanskoj boginje, ktoru često mnili ravnoju Venerě. V inyh jezykah petok često imaje nazvu "5. denj", jestli sčitati od ponedělka, ili "6. denj", jestli sčitati od nedělji.

Vněšnje linky

• Tutoj članok imaje prěvod iz članka "Friday" v Vikipediji na anglijskom (spis avtorov; dozvoljeńje CC BY-SA 4.0).