Wp/isv/Slovio

Jezyk

Slovio

slovio, словио
Horugva slovio
Obča informacija
Stvorjeny	Mark Hučko
Data stvorjenja	1999
Govoritelji	10 — 15 (2006)
Pismo	kirilica latinica

Slovio jest projekt umětnogo jezyka, započety slovačskym amater-jezykovznavcem Markom Hučkom v 1999. Tvrdženy cělj projekta slovio jest stvorjenje medžunarodnogo jezyka, ktory jest razumlivy vsakomu člověku kto govori slovjanskym jezykom, i ktory jest dost prosty, da by ljudi, ktori ne govoret kakykoli slovjansky jezyk, imali možnost brzo naučiti se slovia.

Slovio jest esperantoidny jezyk. Gramatika slovia jest maksimalno uproščena i jest shodna na gramatiku esperanta, ale v odrazliku od esperanta, slovosbor slovia imaje slovjansku bazu. Slovio možno pisati posrědstvom kako latinice, tako i kirilice, ale kirilica byla rědko upotrěbjajema. Latinsko pismo slovia jest osnovano na esperantskom X-stroju: tipična harakteristika slovia jest koristanje digrafov cx <č>, sx <š>, zx <ž>, gx <dž> i wx <šč>. Kiriličsko pismo jest najbliže k russkomu alfabetu, no odsutstvujut v njim bukvy я, ю, є, ь, ы, ъ.

Slovio izgral rolju v povstanju medžuslovjanskogo jezyka. V prvyh lětah XXI-ogo stolětja byl najbolje znany i samy najlučše razvity vseslovjansky jezykoprojekt, ale takože byl ostro kritikovany za umětny harakter i prěvagu russkyh slov v slovosboru. Hučko odkydal vse prědstavjene reformy i vměsto togo obvinjal svojih kritikov za zavist i protislovjansku agitaciju, vslěd čego Slovio utratil mnogo podpora. V marcu 2006 nezadovoljeni členi Slovio-foruma načeli novy jezykoprojekt Slovianski, iz ktorogo pozdněje izniknul medžuslovjansky. Vojna Slovio-Slovianski trvala do 2011.

Ne smotreči na agresivnu propagandu, Slovio nikogda ne byl uspěšen. Od 2011 goda projekt jest neaktiven.

Priměr teksta

Sxto es Slovio? Slovio es novju mezxunarodju jazika ktor razumijut cxtirsto milion ludis na celoju zemla. Slovio mozxete upotrebit dla gvorenie so cxtirsto milion slavju Ludis ot Praga do Vladivostok; ot Sankt Peterburg cxerez Varsxava do Varna; ot Sredzemju Morie i ot Severju Morie do Tihju Okean. Slovio imajt prostju, logikju gramatia i Slovio es idealju jazika dla dnesju ludis. Ucxijte Slovio tper!

Што ес Словио? Словио ес новйу межународйу йазика ктор разумийут чтирсто милион лудис на целойу земла. Словио можете употребит дла гворение со чтирсто милион славйу Лудис от Прага до Владивосток; от Санкт Петербург через Варшава до Варна; от Средземйу Морие и от Северйу Морие до Тихйу Океан. Словио имайт простйу, логикйу граматиа и Словио ес идеалйу йазика дла днесйу лудис. Учийте Словио тпер!

Vněšnje linky

• Oficialny sajt projekta