Wp/bew/Pulo Kokos
| Wilayah Pulo Kokos (Keeling) Pulu Kokos (Melayu Kokos) Wilayah Kepulauan Cocos (Keeling) (Melayu) Territory of Cocos (Keeling) Islands (Inggris) | |||
| |||
_Islands_special)_(Southeast_Asia_centered).svg)
| |||
| Ibu negeri | Pulo Kulon | ||
| Nama pengendek | Kokos | ||
_Islands.svg){kind=small}
Pulo Kokos (Keeling) (hurup Arab Gundul: فولو کوکوس کيليڠ; basa Inggris: Cocos (Keeling) Islands; basa Melayu Kokos: Pulu Kokos (Keeling)) atawa resminya Wilayah Pulo Kokos (Keeling) (hurup Arab Gundul: ولاية فولو کوکوس کيليڠ; basa Inggris: Territory of Cocos (Keeling) Islands; basa Melayu: Wilayah Kepulauan Cocos (Keeling)) entu Ostrali punya atu wilayah luar di Laotan Hindi, nglingkup atu kepuloan kecil nyang kira-kira di separohnya antara Ostrali ama Sélong èn rada deket ama Pulo Sumatra di Indonésia. Ni wilayah punya nama rangkep (semprakan resmi masupnya ni pulo ke Ostrali tahon 1955) ngasi unjuk kalo dulu bekèn juga' namanya Pulo Kokos atawa juga' Pulo Keeling.
Ni wilayah kesusun deri dua pulo cincin nyang ada 27 pulo koralnya, cuman dua nyang kena dihuni, ya'entu Pulo Kulon (West Island) èn Pulo Ruma (Home Island). Penduduknya cuman 600-an orang èn kebanyakannya orang Melayu Kokos, nyang agamanya Selam Ahlusunah èn ngomong basa Melayu Kokos bakal basa pertamanya. Ni wilayah dibestir ama guwernemèn pèderal Ostrali punya Departemèn Inprastuktur, Gandaran, Pembangunan Daèrah, èn Kuminikasi sebagé atu wilayah luar Ostrali. Barengan ama Pulo Natal (nyang kira-kira 960 km atawa 600 mil ngètan), ni pulo ngebentuk atu pengelompokan bestir Wilayah Laotan Hindi Ostrali. Walakin, itu penghuni pulo ngelah derajat guwernemèn-sendèwèk liwat mejelis kampung sekitar. Banyak ladènan umum, kaya' kesèhatan, onderwès, belèd, disediain ama negeri Ostrali Kulon, èn hukum Ostrali Kulon diterepin kecuali di mana-mana nyang guwernemèn pèderal punya tentuin. Ni wilayah juga' paké kode pos Ostrali Kulon.
Ni pulo ditemuin tahon 1609 ama atu kapitèn merin Britani, nama Wiliam Keeling, cuman témpo waktu belon ada orangnya, baru ada mulain awal abad ke-19. Atu deri penghuni nyang awal-awal entu John Clunies-Ross, atu pedagang Skot; èn kebanyakan deri penduduk nyang sekarang entu turunan deri pegawé-pegawé ras Melayu nyang diboyong gawé ke dia punya ondernèming[1] kopra. Kulawarga Clunies-Ross merènta itu pulo jadi lènstèlsel[2] pribadi bakal selamanya 150 tahon punya lama, dengen pala kuarga nyang biasa dianggep jadi résidèn mahistrat. Britani nyedèk ni pulo tahon 1857, èn bakal abad-abad seabisnya ni pulo dibestir deri Sélong atawa Singapur. Ni wilayah diangsrongin ke Ostrali tahon 1955, bagèn kata ampé 1979 ni wilayah punya kabèhan banda tana masing èhendomnya kulawarga Clunies-Ross.