Wb/nia/Turia Somuso Dödö/Mataio/3

Add links
From Wikimedia Incubator

Ihaogö lala Zo'aya Yohane[edit | edit source]

1 Me luo da'ö[1] tohare Yohane samayagö idanö, ilau mangombakha ba danö si mate ba Yudaia, 2 imane:: "Mifalalini gera'erami, me no ahatö gamatöröŵa zorugo andrö."[2] 3 Ya'ia andrö nitutunö khö Yesaya sama'ele'ö: "Terongo li samösa niha si'ao ba danö si mate: 'Mihaogö lala khö Zo'aya, mifadaya lalania.'"[3]

4 I'onukha mbaru bu gondra Yohane, ba iböbö löwi-löwinia faoma böbö-löwi uli zaŵi. Önia ba tamo awö ŵe ŵani gatua. [4]

5 Ba la'ondrasi ia niha moroi ba Yerusalema ba moroi ba Yudaia awö moroi ba fefu mbanua si fatambai Yoridano. 6 La'ombakha'ö horöra ba ibayaigö ira idanö ba Yoridano.[5]

Huhuonia khö ndra Farizaio ba Sadukaio[edit | edit source]

7 Ba me i'ila wa ato farizaio ba sadukaio si möi ba nahia ibayagö idanö, imane khöra: "He ya'ami, ono gulö! Haniha zamangelama ya'ami ena'ö moloi ami moroi ba wönu si so andrö dania?[6] 8 Mi'owua si faudu ba wamalalini era-era andrö. 9 Böi miŵa'ö tödömi: 'Furugöma Gaberahamo.' Uŵa'ö sa khömi, tola ibali'ö gara andre Lowalangi tobali ma'uwu Gaberahamo.[7] 10 No so wato ba ŵa'a geu, ba la'obö fefu geu si lö bua si sökhi ba latibo'ö ba galitö."[8]

11 "Ubayagö ami idanö, ena'ö mifalalini era-erami. Ba hiza aefa ndra'o tohare samösa sabölö mofa'abölö moroi khögu, fanotogö mböbö mbadagahenia manö tenga sinangea ndra'o. Isasai ami faoma Eheha Ni'amoni'ö ba faoma alitö.[9] 12 No so ba dangania döri, ba itörini mbasitö andrö dania, i'owuloi gulitö ba halasa ba itunu dania gadaya ba galitö si lö mate-mate."

Ibayagö idanö Yesu[edit | edit source]

13 Ba tohare Yesu[10] moroi Galilaia möi ia Yoridano ba wamabayagö'ö idanö ya'ia khö Yohane.

Gambara wamayagö idanö khö Yesu nigambaraini Francesco Albani (ngaotu ndröfia si-17)

14 Ba itenaŵa ia Yohane imane: "Ya'o sa zedöna öbayaigö idanö, ba hiza möi ndra'ugö khögu?"

15 Itema linia Yesu: "Lau manö ua; sinangea ta'o'ö da'a ena'ö alua fefu zatulö andrö."

Awena itehe khönia Yohane.

16 Aefa tebayagö idanö Yesu, iheta ia moroi ba nidanö. I'anema'ö teboka mbanua si yaŵa ba i'ila Geheha Lowalangi, si möi tou hulö marafadi ba toröi yaŵania. 17 Ba terongo li moroi ba zorugo sanguma'ö: "Onogu ni'omasiö da'e, ohahau dödögu khönia."[11]

Famotokhi ba gahe[edit source]

  1. ↑ Ayati 1–12: Mar 1:1–8; Luk 3:1–20; Yoh 1:6–28
  2. ↑ Faigi 4:17
  3. ↑ Yes 40:3
  4. ↑ Luk 1:15; SalII 1:8
  5. ↑ HalZin 19:3,4
  6. ↑ Faigi 12:34; 23:33
  7. ↑ Yoh 8:33 b.t.
  8. ↑ Faigi 7:19; Yoh 15:6
  9. ↑ HalZin 13:24,25; 2:3,4; Yes 4:4
  10. ↑ Ayati 13–17: Mar 1:9–11; Luk 3:21,22; Yoh 1:31–34
  11. ↑ Yes 11:2; 42:1; Faigi 17:5; Luk 9:25; FetII 1:17

Fabaliŵa lala[edit source]

Injil Mataio: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28

Turia Somuso Dödö: Mataio • Mareko • Luka • Yohane

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö

Retrieved from "https://incubator.wikimedia.org/w/index.php?title=Wb/nia/Turia_Somuso_Dödö/Mataio/3&oldid=6038044"