Wb/nia/Turia Somuso Dödö

    Add links
    From Wikimedia Incubator
    < Wb‎ | nia
    Wb > nia > Turia Somuso Dödö
    Nga'örö högö Zura Ni'amoni'ö ni'ali H. Sundermann faoma Salaŵa Fali'era (Ama Mandranga) moroi Dahana. Da'a Zura Ni'amoni'ö si föföna sibai si so bakha sura Amabu'ula Li Si Föföna ba Amabu'ula Li Si Bohou.
    Ba nahia andre tefa'oli zi öfa mbuku Duria Somuso Dödö ma asese latötöi ia Injil ba li Indonesia. No mufa'anö ia soguna khö ndraono si bohou ebua nifotöi generasi digital, sonekhe ba wangoguna'ö internet ba sombaso fefu hadia ia ba zandrela smartphone (hape).

    Ohitö dödö wama'anö mbuku Duria Somuso Dödö andre ya'ia ba wama'ema Taromali Lowalangi ba li niha khöda ma'ökhö, saoha ba salio aboto ba dödöra ya'ira si lö manema famahaö ba teologi ma zui ba filsafat, töra-töra ndraono si bohou ebua nifotöi generasi digital andrö yaŵa.

    Hana moguna Zura Ni'amoni'ö si bohou[edit | edit source]

    Li Niha si so bakha ba Zura Ni'amoni'ö nifa'anö H. Sundermann asese lö i'anema'ö aboto ba dödöda, börö me konstruksi wehede, ngawua wehede (kosa kata) nifilinia ba maedo-maedo ni'oguna'önia no moroi ba zi töra otu fakhe si lalö. Duma-dumania i'oguna'ö wehede utu ndru'u si lö faudu sa'ae ma'ökhö. Aurifö sauri ba gatua simane belu, arawi, singo btn. tenga utu side-ide da'ö.[1]

    Baero da'ö no oi labali'ö li Niha fefu döi niha awö döi nahia, börö me luo no oi fakaole lela ndra tuada wanötöi töi simane Matius andrö labali'ö ia Matai'o, Ester tobali Gesitera, btn. Duma-dumania na tabaso "Ba humöngö duriania ba danö Ziria ma'asagörö" (Mat 4:24), lö itörö tödöda wa nitötöi andrö no Suriah, si so ba gotalara Yordania ba Lebanon. Andrö göi wa lö tola tobali fanolo khöda Google, börö na ta'alui ziria, gesitera btn. lö tola tasöndra informasi si faudu.

    Andrö ena'ö buku andre tobali börö wangi'ila ba mbolo digital (tola ta'oguna'ö Google ma gofu hadia ia mesin wangalui ba gu'ö internet) no unönö khai-khai ba döi ma istilah si no fagölö la'ila niha ba li Indonesia. Duma-dumania bakha ba Zura Ni'amoni'ö Sundermann lö ta'ila haniha zotöi Galifao (Mrk 2:14), irege lö ta'ila ta'alui ba Google. Andrö wa unönö khai-khai ba döi sindruhu, ya'ia da'ö Alfeus. na tabatogö mouse ba dete wehede Galifao edöna te'oroma'ö wehede Alfeus. Simanö göi döi ba istilah tanö bö'ö simane Ziria, Gesitera, btn.

    Lala nitörö[edit | edit source]

    Halöŵö andre tenga nilau ba wa'alio ma zui ha sakali manörö. Töra-töra me mulau ia ba ginötö wolombase (ero ita so duho halöŵöda si ero ma'ökhö). Börö da'ö simane wolaugu:

    • Uhalö teks si no so ba Zura Ni'amoni'ö nifa'anö Heinrich Sundermann.[2]
    • Ufaedogö ia ba teks asli Zura Ni'amoni'ö ba li Yunani.[3] Heza fabö'ö teks asli Yunani ba teks Sundermann, u'alui lala wangali ya'ia ba li khöda sabölö faudu. Ba da'a u'oguna'ö teks Zura Ni'amoni'ö nifa'anö Hadrian Hess[4] awö teks Zura Ni'amoni'ö tanö bö'ö ba li bö'ö. Tohugö wombaso wamaigi gumbu bö'ö ni'oguna'ögu.
    • Heŵa'ae ohitö dödö ena'ö alösö wangali ya'ia, no u'odödögö ena'ö ahatö teks ba li Niha ba teks asli Yunani. Hana? Ena'ö ba zi so föna aoha göi khö program komputer (nifotöi kecerdasan buatan ma artificial intelligence) ba wangila hewisa wangali li bö'ö ba li Niha ma wangali li li Niha ba li bö'ö. Si tobali duma-dumania, faedogö teks Sundermann faoma teks Mrk 2:17 ni'ali ba da'e moroi ba li Yunani.
    • Unönö högö waosatö, same aoha khö niha si fagölö wombaso ya'ia.[5] Ufaigi ua högö andrö moroi ba teks Hess andrö yaŵa, awena u'atulö'ö ia aefa u'angeragö heza zabölö sökhi wanguma'ö ya'ia ba li khöda. Te moguna tebotokhi khö ndra banuada si lö irai mamoha ba teologi, wa ngawalö högö si so bakha ba Zura Ni'amoni'ö nisöndrada he ba teks Sundermann ba he ba teks Sura Ni'amoni'ö bö'ö, no tenga föfö Zura Ni'amoni'ö ia. No ninönö zama'anö ya'ia ena'ö aoha khö zombaso. Simanö göi nomoro faoma faza. Lö ya'ia bakha ba Zura Ni'amoni'ö. Ninönö da'a ba ginötö furi ba wanolo ena'ö tola tasöndra sambua ayati.
    • Itaria ubaso mangawuli teks si no mu'ali, ba u'atulö'ö zui ia na moguna, aefa wamaresogu mbuku Zura Ni'amoni'ö ba li bö'ö simane ba li Jerman,[6] Inggris[7] ba Indonesia.[8] Simanö göi itaria ufaedogö ia ba Zura Ni'amoni'ö nifotöi New Revised Standard Version ba li Inggris nitema'ö he ba Gereja Katolik ba ba Gereja Protestan, si itaria latötöi göi Sura Ni'amoni'ö khö fefu niha Keriso, tenga ha khö niha Katolik ma ha khö niha Protestan.[9] Baero da'ö itaria göi möido ufaigi wo'ali Zura Ni'amoni'ö nifa'anö ndra jw.org.[10]

    Lala wanura[edit | edit source]

    No göi ifaudugö Sundermann lala wanura Sura Ni'amoni'ö ba li Belanda (me luo da'ö lö nasa so negara Indonesia, so ndra tuada nasa barö wamatörö Belanda) awö ba ejaan Van Ophuijsen ni'oguna'ö ba ginöto da'ö. Bahiza no so ita ma'ökhö ba negara Indonesia sangoguna'ö ejaan EYD. Börö da'ö tafaudugö wanura Turia Somuso Dödö andre ba ejaan li Indonesia, fao ba da'ö wamabali ngawua wehede nifomendrua: ali-ali, manaho-naho, atua-tua, btn. Faduhu dödögu na ma'ökhö ifa'anö Zura Ni'amoni'ö andrö Sundermann, silötolalö'ö ifaudugö ba ejaan li Indonesia nifahaö ba zekola ma'ökhö.

    Onönötania: fehede si dombua hua bahiza ha sambua geluaha no ufaogö manö wanura ya'ia simane taromali, silötolalö'ö, bahiza, ulidanö, btn. Da'a no li Niha khöda ma'ökhö ba era digital, tenga li Niha simane nifa'anö ndra misionaris me töra 100 fakhe si lalö!

    Umbu onönöta[edit | edit source]

    Simane si no muŵa'ö yaŵa, Amabu'ulali Sibohou nifa'anö namada H. Hess faoma H. Sundermann andrö, ha dane-dane ia. No u'adölö'ö ba u'alösö'ö ia.

    Ma'ökhö no aoha sibai khöda wolau simane, börö me oya teks Zura Ni'amoni'ö ba li bö'ö si tola ta'oguna'ö ba wamaigi hadia wehede ni'oguna'ö me lasura injil ira Matius, Markus, Lukas ba Yohanes, ba hadia geluahania ba li bö'ö. Tola tafaedogö hewisa wo'ali Taromali andrö ba li bö'ö simane li Indonesia, li Jerman, li Inggris, li Latin, li Yunani, btn. Buala sebua da'a khöda ma'ökhö. Ba ginötöma me sekola filsafat ba teologi ndra'aga, lö nasa so mbolokha gu'ö simane biblehub.com, same'e khöda nifotöi terjemahan paralel ba ngawalö li ba gulidanö! Me luo da'ö so mbuku niraka si so bakha terjemahan paralel, bahiza ebua sibai mbölinia, irege lö tola khögu wowöli ya'ia.

    Na omasi'ö wamaedogö oi waosatö Zura Ni'amoni'ö ba ngawalö li ba gulidanö, tola ö'oguna'ö mbolokha gu'ö andre: https://biblehub.com

    Taromalimö andrö no sulu ba lalagu

    (Mazmur 119:105)


    Moroi khö dalifusömi Sirus Laia,
    dali wa'atumbu moroi ba Lölömatua,
    dali wobanua moroi ba London, Inggris


    TURIA SOMUSO DÖDÖ
    Matai'o | Mareko | Luka | Yohane

    Khai-khai baero[edit | edit source]


    Umbu[edit | edit source]

    1. ↑ Andrö göi mbörö wa Sura Ni'amoni'ö ba li bö'ö lö aetu labohouni wangali ya'ia. Angeragö manö ha'uga kali sa'ae tebohouni Zura Ni'amoni'ö ba li Indonesia, Inggris, Jerman, btn. No oya kali. Ha'uga kali göi tebohouni Zura Ni'amoni'ö ba li Niha? Sakali?
    2. ↑ Heinrich Sundermann no samösa misionaris Protestan moroi ba Jerman so'ali Zura Ni'amoni'ö ba li Niha me töra otu fakhe si lalö. Sura Ni'amoni'ö andre zasese ta'ila so ba nomo misa, nisura nasa ba ila-ila zura (li Indonesia ejaan) Van Ophuijsen ni'oguna'ö ba ginötö da'ö.
    3. ↑ Teks ba li Yunani si tola mufaigi ba gu'ö so ba biblehub.com. Ena'ö aoha khö zombaso göi wamareso teks nifo'eluaha ba da'a no u'oguna'ö teks Yunani moroi ba da'ö.
    4. ↑ Hadrian Hess no samösa misionaris Katolik moroi ba Jerman. Toröi ba mohalöŵö ia 39 fakhe ba Danö Niha irugi ndröfi 2013 me mangawuli ia ba khöra. Oya ifa'anö mbuku si fakhai ba liturgi, fao ba da'ö zura ni'amoni'ö Amabu'ulali Sibohou, si tobali dane-dane mbuku Duria Somuso Dödö andre.
    5. ↑ No ta'ila wa wame'e nomoro faza ba ayati bakha ba Zura Ni'amoni'ö lö konsisten molo'ö ösi ma paragraf (no tobali fangi'ila umum da'a ba gotalua ndra ere Zura Ni'amoni'ö).
    6. ↑ Die Bibel | Revidierte Einheitsübersetzung 2016
    7. ↑ The New Jerusalem Bible
    8. ↑ Alkitab (LAI)
    9. ↑ New Revised Standard Version
    10. ↑ Sura Ni'amoni'ö Online nifa'anö jw.org.



    Fabaliŵa lala[edit source]

    Sura Ni'amoni'ö: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

    Fanolo ba wanura: Lala wanura • Fama'oli nösi • Ngawalö templat • Ngawalö kategori

    Kategori: Amaedola • Budaya • Cerpen • Fangi'ila • Fondrino • Hendri-hendri • Hoho • Hikaya • Kamus Nias-Jerman • Kese-Kese • Maena • Manö-manö • Manö-manö Nono Niha • Uso dödö • Novela • Seni • Sinanö • Sinunö • Sura Ni'amoni'ö • Taromali Ero Migu • Turia Somuso Dödö

    Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö

    Halöŵö si fakhai: Wikipedia • Wikikamus • Wikiyunior

    Retrieved from "https://incubator.wikimedia.org/w/index.php?title=Wb/nia/Turia_Somuso_Dödö&oldid=5787616"