Wb/nia/Turia Somuso Dödö/Mataio/2
La'ondrasi ia ira sangila waö-waö ndröfi[edit | edit source]
_-_James_Tissot_-_overall.jpg)
1 Ba me no tumbu Yesu ba Mbetilekhema ba Yudaia, me luo razo Herode andrö, larugi Yerusalema ya'ira sangila waö-waö ndröfi moroi ba danö ba gatumbukha,[1] ba 2 lasofu-sofu: Hezo razo Niha Yehuda sawena tumbu andrö? No oroma khöma ndröfinia ba danö ba gatumbukha, ba möiga mangalulu khönia.[2]
3 Ba me irongo da'ö razo Herode, ba tobali dödönia awö zi sagörö Yerusalema. 4 Aefa i'owuloi fefu gere sebua awö zangila amakhoita ndra niha Yehuda, isofu khöra, heza edöna tumbu Keriso.
5 "Ba Mbetilekhema ba Yudaia," latema linia, "me si mane sa nisura zama'ele'ö:[3] 6 "Ba ya'ugö, Betilekhema, ba danö Yuda, ma'ifu tenga fondrege zide-ide ndra'ugö ba gotalua ndra sololohe Yuda andrö, me khöu tohare dania samösa zololohe, si tobali kubalo mbanuagu, Izeraeli."[4]
7 Awena ifakaoni'ö ndra sangila waö-waö ndröfi andrö Herode ba zi lö la'ila niha, ba izofu-zofu sibai khöra, ha mega oroma ndröfi andrö.[5] 8 Ba ifatenge ira ba Mbetilekhema imane: "Mi'ae'e mi'alui sibai nono andrö, ba mi'ombakha'ö khögu na no misöndra, ena'ö göi möi ndra'o mangalulu khönia.
9 Aefa larongo niŵa'ö razo andrö, mangefa ira. Hiza ndröfi si no oroma khöra föna mowaö-waö fönara, irugi tebato ia faudu nahia si so ono andrö. 10 Ba omuso sibai dödöra me la'ila ndröfi andrö.
11 Ba möi ira yomo ba la'ila nono andrö awö ninania Maria, ba lalau manuhi tanö ba mangalulu khönia. Ba labokai naha gokhötara, ba labe'e khönia mbuala ana'a, kumöyö ba emuri.[6]
12 Börö me no tefangelama ira ba wangifi, wa böi yalafuli ira khö Herode, mangawuli ira ba danöra latörö lala bö'ö.
La'oloi'ö ia ba danö Mesir[edit | edit source]
13 Me no mofanö ira, oroma khö Yosefo ba wangifi samösa mala'ika Zo'aya. "Faoso," iŵaö khönia, "ohe nono awö ninania, ba oloi ba danö Miserayi. Iagö ba da'ö irege muhededo khöu, börö me edöna i'alui nono andrö Herode ba wamunu ya'ia."
14 Ba maoso Yosefo, ihalö nono andrö awö ninania ba zi bongi ba isaŵa danö Miserayi, 15 heza toröi ia irugi mate Herode. Ba itörö niŵa'ö Zo'aya nifa'ema zama'ele'ö: "No ukaoni nonogu moroi ba danö Miserayi."[7]
Ifabunu'ö ndraono ba Betlehem Herode[edit | edit source]
16 Me i'ila Herode wa no lalimo ia ira sangila waö-waö ndröfi andrö, ba mofönu sibai ia, ba ibe'e goroisa ba wamunu fefu ndraono ba Mbetilekhema ba ba ba mbanua si fasui, fefu barö zi dua fakhe ndröfi molo'ö ginötö si no irongo moroi khö ndra sangila waö-waö ndröfi.
17 Ba itörö zi no iŵaö khö Yeremia sama'ele'ö andrö: 18 "No terongo li ba Rama, fege-ege ba fange'esi sabölö-bölö; i'e'esi ndraononia Rakhela ba lö itehe larara dödönia, börö me lö ya'ira sa'ae." [8]
La'ohe ia mangawuli ba danö Israel[edit | edit source]
19 Me no mate Herode, oroma mala'ika Zo'aya khö Yosefo ba wangifi ba danö Miserayi, 20 imane: "Faoso, halö nono awö ninania ba ae ba danö Gizeraeli, börö me no mate ira somasi mamunu ono andrö.
21 Ba maoso ia, ihalö nono awö ninania, ba isaŵa danö Gizeraeli. 22 Ba hiza me irongo wa no tobali razo Yudaia Gerikhelao, fangali namania Herode, ata'u Yosefo we'amöi ba da'ö. Börö me no tefangelama ia ba wangifi, ifuli ia ba danö Galilaia, 23 isaŵa mbanua sotöi Nazareta. Itörö niŵaö khö ndra sama'ele'ö, wa lakaoni dania ia niha Nazareta. [9]
Famotokhi ba gahe[edit source]
Fabaliŵa lala[edit source]
Injil Mataio: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16 • 17 • 18 • 19 • 20 • 21 • 22 • 23 • 24 • 25 • 26 • 27 • 28
Turia Somuso Dödö: Mataio • Mareko • Luka • Yohane
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö