Wb/nia/Sinunö Sebua/5
I. Fehulu dödö zinandra khö zangai ya'ia[edit | edit source]
1 No möido ba kabu khögu, ya'ugö akhigu, nihagu; no uteu emuri andrö khögu, awö ngawalö rembaremba khögu, no u'a gawa'awa andrö khögu, fabaya ösinia ŵe ŵani, ba no ubadu nagu, fabaya susu andrö khögu. Milau manga, ya'ami si fahuwu khögu, ba mibadu zi so andrö, hana na mabu ami, ya'ami somasi ndra'odo![1]
2 Si mörö ndra'o, ba tödögu, ba lö mörö. Fondrondrongo, ibököbökö lagö mbawandruhö somasi ndra'o! Bokai khögu, ya'ugö akhigu ono alawe, si fahuwu khögu, marafadigu, ya'ugö sohau-hau andrö, khögu! Oi namo sa'ae högögu, bugu, ba mowöi namo ba zi bongi.[2]
3 [Ba umane:] No uheta mbarugu, hadia ufuli u'obaru? Ba no usasai gahegu, hadia, ufuli uta'unöi?[3]
4 Ba i'oro'ö dangania, ba humulu dödögu khönia.
5 Ba maoso ndra'o, ba wamokai khö zomasi ndra'odo, ba tangagu, ba mowöi emuri, göna ba ndranga lazi emuri sahele ba duturugu.
6 Ba ubokai khö zomasi ndra'odo, ba no iheta ia somasi ndra'o, no taya. Ba no ambö nosogu mege, me muhede ia. Ba u'alu-alui ia, ba lö usöndra; mu'aodo khönia, ba lö itema ligu.[4]
7 Ba la'ilado sanaro andrö, sanörö-nöröi ewali, ba labözi-bözido, mesokho ndra'o labe'e; balu-balu mbawagu, ba lahalö sanaro ba dete göli kara.
8 Ube'e ba hölu ami, ya'ami ono alawe, banua Yeruzalema: Na falukha ami zomasi ndra'o, ba hadia ni'ombakha'ömi khönia? — wa no mofökhö ndra'o fa'omasi![5]
9 Hadia wa'atohude zomasi ndra'ugö moroi ba zomasi mbö'ö, ya'ugö fondrege zi sökhi ndra alawe? Hadia wa'asökhi zomasi ndra'ugö, moroi ba zomasi mbö'ö, wa ömanö wame'e ba hölu ya'aga?
II. Fanuno fa'asökhi zangowalu[edit | edit source]
10 Somasi ndra'o ba no safusi sibai ba no soyo'oyo, no yaŵa zi 10.000 [ndra matua bö'ö].[6]
11 Högönia, ba no timba mbalaki sa'usö, ba bunia, ba no hulö mbulu nohi sadada, no aitö, si mane bu gaga.
12 Hörönia, ba no hulö marafadi ba mbewe mbombo, si mondri ba zusu, ba zi no fahöna.
13 Bo'önia, ba no amaedola gowoto rembaremba, nitanö famasa, ba bewenia, ba no timba [mbunga] ladari mböhö, ba zahele emuri.[7]
14 Ba tangania, ba no hulö gana'a ni'owuloi'ö, nifosinga feremata sembaka, ba botonia, ba no nekhe-nekhe ifö guaza, nifobalu-balu feremata nila.
15 Ba fahania, ba no timba daru nahe maremara, nifotoyo ahe ana'a sa'usö; famaigida ya'ia, ba no hulö hili Libano, nituyu, si mane töla geresi.
16 Araronia, ba no ha sambalö fa'ami, ba sageu ya'ia, ba ha sambalö omasiö: Da'ö zomasi ndra'odo, ba da'ö zi fahuwu khögu, ya'ami ono alawe, banua Yeruzalema!
17 Heza isaŵa maö somasi ndra'ugö, ya'ugö fondrege zi sökhi ndra alawe? Heza möi zomasi ndra'ugö, ena'ö matolo'ö, ba wangalui ya'ia?
Famotokhi ba gahe[edit | edit source]
Fabaliŵa lala[edit source]
Olayama Sinunö Sebua: 1 • 2 • 3 • 4 • 5 • 6 • 7 • 8
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö