Wp/isv/Demokrati 66

Demokrati 66

Democraten 66 (D66)

Logotip partije od 2019 g.
Politična partija v Niderlandah
Ideologija	socialliberalizm
Vodž	Rob Jetten
Prědsědatelj	Alexandra van Huffelen
Založenje	14 oktobra 1966
Členstvo	29.624 (1 januara 2024 g.)
Členi v Izbě deputatov	26 (iz 150)
Členi v Senatu	6 (iz 75)
Členi v Evroparlamentu	3 (iz 31)
Medžunarodna organizacija	Liberalny internacional, Partija aliansa liberalov i demokratov za Evropu (ALDE)
Mladežna organizacija	Mladi demokrati (JD)
Kolory partije	zeleny
Glavno sědališče	Lange Houtstraat 11, Haga
Služebny vebsajt	d66.nl

Demokrati 66 (nid.: Democraten 66, v skračenju: D66 (od 1985 g.), D’66 (do 1985 g.)) jest centrična, socialliberalna politična partija v Niderlandah. Ona byla založena 14 oktobra 1966 g. v Amsterdamu, s naměrom stvoriti progresivnu, nedogmatičnu, pragmatičnu partiju. Centralna ambicija v jejnoj programě byla radikalna demokratizacija, s večšim vlivom gradžanov vo vsih organah i na vsih uravnjah državnogo upravjenja, medžu drugymi črěz neposrědnje izbiranogo premier-ministra, neporsrědnje izbiranyh gradonačelnikov, likvidovanje senata i vedenjem referenduma.

V 1960-yh i 1970-yh lětah, pod vodžstvom založitelja Hans van Mierlo, D66 byla izrazno lěvičarska partija, ktora surabotala blizko s socialdemokratičnoj PvdA. Pozdněje, jednakože, ona vse bolje prěsuvala se do političnogo srědišča. Plany za radikalnu demokratizaciju stali menje važne. Zaměsto togo progresivnost partije nyně susrědotoči se bolje na etičnyh kvestijah kako aborcija i evtanazija, pravah različnyh (narodnyh, religijnyh, seksualnyh i t.d.) menšinstv i pozitivnom podhodu k Evropejskomu sojuzu.

D66 dolgo byla partija s odnositeljno nizkym čislom členov i nestabilnym elektoratom. Pod vlivom razstolpjenja ona ne iměla postojanny elektorat věrnyh izbirateljev, v protivnosti k velikym partijam PvdA, CDA i VVD, i byla zavisna od «plavajučih izbirateljev». Iz toj pričiny D66 iměla velike uspěhy, a takože momenty, že podpor byl tako nizky, že partiji grozila likvidacija. V parlamentarnyh izborah v 2025 g. D66, dobyvajuči 26 deputatov, stala največša partija v Vtoroj izbě parlamenta.

V periodah 1973–1977 i 1981–1982 D66 byla čest centrolěvičarskyh koalicij (s PvdA i CDA), v periodu 1994–2002 čest tako zvanoj «purpurnoj koalicije» (s PvdA i VVD, a periodah 2003–2006 i 2017–2024 centropravičarsyh koalicij (s VVD i CDA).

Rezultaty v izborah

Rezultaty D66 v parlamentarnyh izborah od 1967 g.:
čislo izbranyh deputatov v Vtoroj izbě (vsego 150 deputatov).

Spisok vodžev partije

Lider partije			od / do
		Hans van Mierlo (1931–2010)	14 septembra 1966 – 1 septembra 1973
		Jan Terlouw (1931–2025)	1 septembra 1973 – 8 septembra 1982
		Laurens Jan Brinkhorst (1937– )	8 septembra 1982 – 3 novembra 1982
		Maarten Engwirda (1943– )	10 novembra 1982 – 25 januara 1986
		Hans van Mierlo (1931–2010)	25 januara 1986 – 15 fevruara 1998
		Els Borst (1932–2014)	15 fevruara 1998 – 30 maja 1998
		Thom de Graaf (1957– )	30 maja 1998 – 22 januara 2003
		Boris Dittrich (1955– )	22 januara 2003 – 3 fevruara 2006
		Lousewies van der Laan (1966– )	3 fevruara 2006 – 24 junija 2006 (medžučasno izpoljnajuči obvezky)
		Alexander Pechtold (1965– )	24 junija 2006 – 6 oktobra 2018
		Rob Jetten (1987– )	6 oktobra 2018 – 4 septembra 2020 (medžučasno izpoljnajuči obvezky)
		Sigrid Kaag (1961– )	4 septembra 2020 – 12 avgusta 2023
		Rob Jetten (1987– )	12 avgusta 2023 –

Iztočniky