Wb/nia/Yohane I/3

Add links
From Wikimedia Incubator
< Wb‎ | nia‎ | Yohane I
Wb > nia > Yohane I > 3

Fa'ohahau dödö nono Lowalangi ba tötönaföra[edit | edit source]

I. 1 Mifaigi, ha wa'ebua wa'omasi andrö, ni'amualagö Nama khöda, fa ono Lowalangi döida, ba fa duhu göi ononia ita. Da'ö mbörö, wa lö aboto ba dödö niha guli danö ita, me lö saboto ba dödöra ia.[1] 2 He ya'ami ni'omasi'ö! ono Lowalangi ita iada'e, ba lö'ö na mu'oroma'ö, hadia ita dania. No ta'ila, na no mu'oroma'ö dania, ba fakhili-khili ita khönia, me tanehegö dania ia, he wisa ia.[2] 3 Ba dozi sanötöna da'ö khönia, ba lahaogö ira, si mane ya'ia, si lö si ra'i-ra'iö.[3]

Tandra wa ono Lowalangi ira[edit | edit source]

II. 4 Dozi samazökhi horö, ba lasawö göi goroisa, ba fanawö oroisa horö andrö.[4] 5 Ba no mirongo, wa andrö tefa'ele'ö ia, ena'ö iheta horö andrö, ba lö horö ba dödönia.[5] 6 Dozi sahono khönia, ba lö mamazökhi horö. Dozi samazökhi horö, ba lö larai la'ila ia, ba lö saboto ba dödöra ia.[6] 7 He ya'ami iraono! böi yamufaelungu ami niha. Solau satulö, da'ö zatulö, si mane ya'ia andrö, si no atulö.[7] 8 Moroi ba Gafökha zamazökhi horö; moroi ba mböröta sa ifazökhi horö Afökha. Ba da'ö tefa'ele'ö Nono Lowalangi, ena'ö ifakiko halöŵö Gafökha.[8] 9 Dozi si tumbu ba Lowalangi, ba lö mamazökhi horö, me lö tebulö danömönia ba dödöra, ba tebai mamazökhi horö ira, me no moroi ba Lowalangi ira.[9] 10 Ba da'ö oroma, ha niha nono Lowalangi, ba ha niha nono Gafökha. Dozi si lö molau satulö, ba tenga moroi ba Lowalangi ira, awö zi lö mangomasi'ö talifusönia.[10] 11 Da'ö sa duria, nirongomi, i'otarai mböröta, fa faoma ta'omasi'ö nawöda.[11] 12 Böi si mane Ka'ino andrö, soroi ba Gafökha samunu akhinia; ba hana wa ibunu? Me no si lö sökhi mbua-buania, ba me satulö sa mbua-bua nakhinia.[12] 13 Ba böi ahöli-höli dödömi, ya'ami ira talifusö, na fatiu dödö niha guli danö khömi.[13] 14 No ta'ila, no awu'a ita ba wa'amafe, no tasaŵa wa'auri, me ta'omasi'ö dalifusö; si lö mangomasi'ö, ba lö tebulö ba wa'amate.[14] 15 Samunu niha dozi si fatiu tödö ba dalifusöra; ba mi'ila, lö samunu niha, si so fa'auri si lö aetu, si lö tebulö ba dödönia.[15] 16 Ba da'ö no aboto ba dödöda wa'omasi andrö, me no ibelegö nosonia fönada, ba mo'ömö göi ita, tabelegö nosoda föna dalifusöda.[16] 17 Ba na so zi so ana'a guli danö, ba na i'ila, ambö khö dalifusönia, ba na iduhö dödönia khönia, ba hezo wa'omasinia Lowalangi andrö, ba dödönia?[17] 18 He ya'ami iraono! böi ba li ta'omasi'ö nawöda, ba böi ba lela, ba nilauda khönia ta'omasi'ö ia, ba si ndruhu-ndruhu.[18]

Fa lö aiŵö ira khö Lowalangi[edit | edit source]

III. 19 Ba ba da'ö aboto dania ba dödöda, wa moroi ba zi duhu ta'otarai, ba faduhu dödöda fönania tabe'e,[19] 20 wa no ebua Lowalangi, moroi ba dödöda, awö wa no aboto ba dödönia fefu, hadia ia; na i'adugö ita tödöda.[20] 21 He ya'ami ni'omasi'ö! na lö i'adugö ita tödöda, ba so khöda wa lö aiwö, khö Lowalangi.[21] 22 ba hadia ia ni'andröda ba tatema khönia, me ta'o'ö goroisania, ba me talau zomasi ia.[22] 23 Ba da'ö goroisania, ena'ö mamati ita ba döi Nononia, Yesu Keriso, ba ena'ö faoma ta'omasi'ö nawöda, si mane ni'oroi'önia khöda.[23] 24 Ba na so zolo'ö oroisania, ba ba khönia ahono da'ö, ba ya'ia göi, ba lö tebulö ba zi manö. Ba ba da'ö aboto ba dödöda, wa lö tebulö ia ba khöda, ba Geheha andrö, nibe'enia khöda.[24]

Famotokhi ba gahe[edit | edit source]

  1. ↑ Yoh 1:12; Gal 4:6; Yoh 17:25
  2. ↑ Rom 8:16 b.t.; Kol 3:4; Fil 3:21
  3. ↑ Heb 12:14
  4. ↑ Faigi 5:17
  5. ↑ Faigi 1:7; FetI 2:24
  6. ↑ Faigi 2:3 b.t.
  7. ↑ Faigi 2:26,29; Efes 5:6
  8. ↑ Yoh 8:44; Heb 2:14
  9. ↑ Faigi 5:1,18; FetI 1:23
  10. ↑ Faigi 2:29; 4:8
  11. ↑ Faigi 2:7,8; Yoh 13:34
  12. ↑ MozI 4:8
  13. ↑ Yoh 15:18 b.t.
  14. ↑ Faigi 2:10,11
  15. ↑ Mat 5:21,22; Gal 5:21
  16. ↑ Yoh 15:13
  17. ↑ MozV 15:7 b.t.; Yak 2:15,16
  18. ↑ Rom 12:9,13
  19. ↑ Yoh 18:37
  20. ↑ Yes 55:7–9
  21. ↑ Heb 4:16
  22. ↑ Faigi 5:14,15; Mar 11:24; Yoh 15:7
  23. ↑ Yoh 6:29; 15:12; Efes 5:2
  24. ↑ Faigi 4:13; Yoh 14:23; Rom 8:9

Fabaliŵa lala[edit source]

Olayama Zura Yohane I: 1 • 2 • 3 • 4 • 5

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Yohane_I/3&oldid=6229878"