Wb/nia/Yohane I/2

Add links
From Wikimedia Incubator
< Wb‎ | nia‎ | Yohane I
Wb > nia > Yohane I > 2

Yesu zangatulö'ö niha ba Lowalangi[edit | edit source]

I. 1 He ya'ami iraonogu! Andrö usura khömi da'ö, fa böi mifazökhi horö. Ba na so zamazökhi horö, ba so khöda zi lului manguma'ö khö Nama, Yesu Keriso, satulö tödö andrö.[1] 2 Ba ya'ia höli ba horöda andrö, ba tenga ha ba horöda andrö, no ba horö nösi guli danö ma'afefu göi.[2]

Tandra wa awö Lowalangi ba awö Yesu ita[edit | edit source]

II. 3 Ba ba da'ö oroma khöda, wa no aboto ba dödöda ia, na ta'o'ö goroisania.[3] 4 Na so zanguma'ö: No aboto ba dödögu ia, ba na lö i'o'ö goroisania, ba sofaya da'ö, ba si duhu lö'ö ba dödö da'ö.[4] 5 Ba na so zolo'ö linia, ba khönia mo'ahonoa wa'omasi Lowalangi andrö, si ndruhu-ndruhu. Ba da'ö aboto ba dödöda, wa ba khönia so ita.[5] 6 Na so zanguma'ö, ba khönia ahono ia, ba mo'ömö ia, fa si mane amuata da'ö göi gamuatania.[6] 7 He ya'ami ni'omasi'ö, tenga oroisa si bohou usura khömi, oroisa si no ara, si no so khömi, i'otarai mböröta; taroma li andrö, nirongomi, i'otarai mböröta, goroisa si no ara andrö.[7] 8 Oroisa si bohou zui usura khömi, si no duhu ba khönia ba ba khömi, me si taya zogömi-gömi andrö, ba me humaga sa'ae haga andrö, si ndruhu.[8] 9 Na so zanguma'ö, ba haga so ia, ba na fatiu dödönia ba dalifusönia, ba ba zogömi-gömi so ia, irugi da'e. 10 Sangomasi'ö talifusönia, ba no ahono ba haga, ba lö ba khönia fangala. 11 Si fatiu tödö khö dalifusönia, ba ba zogömi-gömi so ia, sogömi-gömi itörö, ba lö i'ila, heza isaŵa, me no ifobalunö hörönia sogömi-gömi andrö.[9]

Böi ta'omasi'ö hadia ia zi so ba guli danö[edit | edit source]

III. 12 Ufa'ohe'ö zura khömi, ya'ami iraono, me no mu'efa'ö khömi horömi, börö döinia.[10] 13 Ufa'ohe'ö zura khömi, ya'ami ira ama, me no aboto ba dödömi zi otarai mböröta andrö. Ufa'ohe'ö zura khömi, ya'ami ono matua, me no milaŵa Gafökha. No ufa'ohe'ö zura khömi, ya'ami iraono, me no aboto ba dödömi Nama.[11] 14 No ufa'ohe'ö zura khömi, ya'ami ira ama, me no aboto ba dödömi zi otarai mböröta andrö. No ufa'ohe'ö zura khömi, ya'ami ono matua, me no sabölö ami, ba me ahono ba dödömi daroma li Lowalangi, ba me no milaŵa Gafökha. 15 Böi mi'omasi'ö nösi guli danö, ba ma hadia ia, zi so ba guli danö. Na so zangomasi'ö ösi guli danö, ba lö fangomasi'ö Ama ba dödönia.[12] 16 Me tenga moroi khö Nama, me moroi ba nösi guli danö fefu, hadia ia, zi so ba guli danö, he fa'omasi nösi niha, ba he fa'omasi hörö, ba he fayaŵasa andrö, ba gana'a. 17 Ba si taya nösi guli danö, awö wa'omasinia andrö, ba solo'ö somasi Lowalangi, ba lö tebulö, irugi zi lö aetu.[13]

Famangelama ba zamaelungu andrö[edit | edit source]

IV. 18 He ya'ami iraono! Amozua sa'ae, ba si mane nirongomi, so dania zi fa'udu khö Keriso, ba no ato iada'e zi tobali si fa'udu khö Keriso. Moroi ba da'ö aboto ba dödöda, wa amozua sa'ae.[14] 19 Ba khöda la'otarai, ba tenga awöda ira; na awöda sa ira mena'ö, ba lö laheta ira khöda mena'ö, ba ena'ö oroma, wa lö dozi awöda ira.[15] 20 Ba no so khömi wamayoini andrö, khö ni'amoni'ö andrö, ba mi'ila fefu, hadia ia.[16] 21 Tenga andrö ufa'ohe'ö zura khömi, me lö mi'ila zi duhu, andrö ufa'ohe'ö khömi, me no mi'ila, ba me tenga moroi ba zi duhu fefu, hadia ia, waya. 22 Ha niha zofaya, baero zangosilö'ögö, wa Keriso andrö Yesu? Da'ö zi fa'udu khö Keriso, sangosilö'ögö Ama, awö Nono.[17] 23 Dozi sangosilö'ögö Ono, ba lö'ö göi khöra Ama; sanehe Ono, ba khönia so göi Nama.[18] 24 Nirongomi, i'otarai mböröta, ba ya'ahono ba dödömi. Na ahono ba dödömi nirongomi, i'otarai mböröta, ba ahono göi ami ba khö Nono ba ba khö Nama.[19] 25 Ba da'ö gamabu'ula li andrö, nifabu'unia khöda: fa'auri si lö aetu andrö.[20] 26 Da'ö nisuragu khömi, ba zamaelungu ya'ami andrö, 27 ba ya'ami — ba no ahono ba dödömi wamayoini andrö, nitemami khönia, ba lö moguna khömi, ifahaö ami niha, mi'iagö sa'ae ba khönia, dali wamahaö wamayoininia ya'ami andrö, ba ngawalö hadia ia, fefu, ba no si duhu, ba tenga faya; mi'o'ö wamahaönia ya'ami andrö.[21] 28 Ba da'ö, ya'ami iraono, mi'iagö ba khönia, ena'ö lö aiŵö ita, na i'oroma'ö ia dania, ba ena'ö lö te'ailasi ita khönia, ba wa'asonia.[22] 29 Na mi'ila, satulö ia, ba ya'aboto ba dödömi, wa khönia tumbu göi dozi solau satulö andrö.[23]

Famotokhi ba gahe[edit | edit source]

  1. ↑ Rom 6:1,2; Yes 53:11,12
  2. ↑ Faigi 4:10; KorII 5:18,19
  3. ↑ Faigi 3, 6. Yoh 14, 21. Mat 7, 21
  4. ↑ Faigi 4:20
  5. ↑ Faigi 5:3; 4:12
  6. ↑ Yoh 13:15
  7. ↑ Faigi 3:11; YohII 1:5
  8. ↑ Rom 13:12
  9. ↑ Faigi 3:14,15; Yoh 12:35
  10. ↑ Luk 24:47
  11. ↑ Yoh 1:7; Efes 6:11 b.t.
  12. ↑ Rom 12:2; Yak 4:4
  13. ↑ KorI 7:31; FetI 1:24
  14. ↑ FetI 4:7; TesII 2:3 b.t.; YohI 4:3; YohII 1:7
  15. ↑ HalZin 20:30; KorI 11:19
  16. ↑ KorII 1:21,22
  17. ↑ Faigi 2:18; Yoh 20:31; FetII 2:1
  18. ↑ Faigi 4:15; Yoh 5:23; YohII 1:9
  19. ↑ Yoh 14:23
  20. ↑ Faigi 5:11; Yoh 10:28
  21. ↑ Yoh 14:26; 16:13
  22. ↑ Yoh 15:4; Faigi 4:17
  23. ↑ Faigi 3:7–10

Fabaliŵa lala[edit source]

Olayama Zura Yohane I: 1 • 2 • 3 • 4 • 5

Amabu'ulali Sibohou: Mataio • Mareko • Luka • Yohane • Halöŵö Zinenge • Roma • Korindro I • Korindro II • Galatia • Efeso • Filifi • Kolose • Tesalonika I • Tesalonika II • Timoteo I • Timoteo II • Tito • Filemo • Heberaio • Yakobo • Fetero I • Fetero II • Yohane I • Yohane II • Yohane III • Yuda • Fama'ele'ö

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö
Retrieved from "https://incubator.wikimedia.org/w/index.php?title=Wb/nia/Yohane_I/2&oldid=6229877"