Wb/nia/Turia Somuso Dödö/Mareko/4
Mamahaö ia faoma amaedola[edit | edit source]
1 Ba ifuli ibörötaigö mamahaö ia ba zinga mbaŵa.[1] Ba ato sibai niha sowulo, andrö möi ia ba nowo, ba mudadao ia ba da'ö. Ba fefu niha sato oi fasösö ba mbaene.
2 Ba ifahaö ira oya ngawalö faoma amaedola. Ba imane khöra ba wamahaönia andrö:
Amaedola zamazaewe tanömö[edit | edit source]
3 Mifondrondrongo! So samösa zohalöŵö ba danö si möi mamazaewe tanömö khönia. 4 Ba wamazaewenia, so ösa danömö saekhu ba lala. Ba tohare wofo ba la'a ia. 5 Ba so ösa zaekhu ba zokara, ba zo'amböta tanö. I'anema'ö motalinga ia me anifi-nifi danö khönia. 6 Ba hiza me möi yaŵa luo, asoso ba aleu ia, börö me lö ŵa'ania. 7 Ba so ösa zaekhu ba gotalua ndroi, ba manöi ndroi ba ibunu zinanö andrö, ba lö mowua ia. 8 Ba so ösa zaekhu ba danö si sökhi, tumbu ba manöi ia, ba mowua, so zowua tölu ngafulu kali, önö ngafulu kali ba ngaotu kali wa'oya danömönia.
9 Ba imane, "Haniha zi so tögi dalinga ba yamufondrondrongo!"
Si tobini ba gamaedola Yesu[edit | edit source]
10 Ba me hatö ya'ia ba si felendrua andrö awö zi fao khönia bö'ö, lasofu khönia zanandrösa ba gamaedola andrö.
11 Ba imane khöra: Si tobini ba gamatöröŵa Lowalangi andrö no tebe'e khömi, ba ba zi so baero, khöra tefa'ema fefu ba gamaedola, 12 ena'ö anehe höröra ba lö la'ila, ba larongo tögi dalingara ba lö'ö aboto ba dödöra, fa lö lafuli ira ba tebe'e aefa khöra horöra.[2]
Eluaha gamaedola zamazaewe tanömö[edit | edit source]
13 Ba imane khöra: Hadia lö mi'ila geluaha gamaedola andre? He moroi tola aboto ba dödömi gamaedola bö'ö fefu?
14 Samazaewe tanömö andrö no samazaewe taroma-li.[3] 15 Tanömö saekhu ba lala, ya'ia niha samondrondrongo taroma-li andrö ba i'anema'ö tohare Zatana ba i'oloi'ö daroma-li si no mufazaewe ba dödöra.
16 Tanömö saekhu ba danö sokara, ya'ia niha samondrondrongo taroma-li andrö ba latema ia fao fa'omuso dödö. 17 Ba hiza börö me lö moŵa'a ia, lö anau gölönia. Me alua wa'afökhö ma folohi börö daroma-li andrö, i'anema'ö laröi ia.
18 Tanömö bö'ö saekhu ba gotalua ndroi, ya'ia niha samondrongo taroma-li andrö; 19 imama daroma-li andrö fefu fa'abu dödö, famaelungu gana'a[4] awö gisö-isö dödö andrö, irege lö mowua ia.[5]
20 Tanömö saekhu ba danö si sökhi, ya'ia niha samondrongo taroma-li ba samonahia ya'ia ba same'e mowua ia; so zi tölu ngafulu, so zi önö ngafulu, ba so göi zi ngaotu fabali mbuania.[6]
Amaedola wandru[edit | edit source]
21 Ba imane khöra: Hadia, andrö so wandru, ena'ö tabe'e barö dumba yöu, ba ma barö warate? Tenga andrö so ia, ena'ö tabe'e ba naha wandru yaŵa?[7] 22 Lö'ö sa hadia ia zi tobini, na tenga ba wama'ele'ö ya'ia dania, ba lö hadia ia zi lö oroma, ha ba wangoroma'ö ya'ia dania.[8] 23 Na so zi so tögi dalinga ba wamondrongo, ba yamufondrondrongo!
24 Ba imane khöra: Mitöngöni nirongomi! Su'a-su'a ni'anu'a'ömi, la'anu'a'ö khömi, ba ladou'ö na khömi.[9] 25 Ba zi so, ba tebe'e na, ba ba zi lö'ö, ba teheta göi hadia zi so khönia.[10]
Amaedola danömö zinanö[edit | edit source]
26 Ba imane: Si mane mbanua Lowalangi andrö, hulö na itibo'ö ba danö danömö zinanö niha. 27 Ba mörö ia ba maoso, bongi ma'ökhö, ba motalinga danömö andrö ba manöi, lö'ö sa i'ila,[11] 28 mowua manö danö, ha ya'ia, öföna döla, awena ngalai, awena zi ndruhu nösi ba ngalai. 29 Ba na basitö, ba i'anema'ö ifatenge zamasi, me no irugi famasi.
.jpg)
Amaedola danömö lada[edit | edit source]
30 Ba imane:[12] Hadia tabe'e famaedo mbanua Lowalangi andrö? Ba heza tahalö gamaedolania? 31 Hulö mbua lada,[13] si no fondrege zide-ide mbua zinanö, na tefazaewe ba danö. 32 Ba na no mufazaewe ia, ba manöi ba tobali ebua moroi ba ngawalö gule-gule fefu ba modaha sebua ia, tobali la'ila mangazuni ba lumönia fofo, si so ba dalu mbanua.
-
Tanömö zinanö Brassica nigra -
Töla zinanö nifotöi Brassica nigra
33 Ba oya ngawalö gamaedola si manö ilau khöra, wamahaö ya'ira; ifaigi zi tola lafondrondrongo. 34 Lö'ö sa huhuonia khöra, si tenga amaedola. Ba khö nifahaönia i'ombakha'ö geluaha fefu, ba zi ha ya'ira.
Ifahono mbade[edit | edit source]
35 Ba me luo da'ö, me tanö owi, ba imane khöra:[14] Möi ita miyefo. 36 Ba me no lafofanö niha sato, ba la'ohe manö ia baowo; ba so zi fao khönia owo bö'ö.
37 Ba ilabu bade sabe'e ba ihawui nowo dulu, tobali abuso sa'ae idanö. 38 Ba no so ia ba gi'o, mörö, no manandraya ia. Ba lasusugi ia, lamane khönia: He samahaö! hadia, lö ba dödöu, na tekiko ita?
39 Ba maoso ia ba itenaŵa nangi ba imane ba ndrulu: Böi hede-hede sa'ae, honogö'ö!
Ba tebato nangi, ba tobali ahono sibai.[15]
40 Ba imane khöra: Hadia wa ada'u-da'u ami si manö? Hana wa lö famati khömi? 41 Ba ata'u sibai ira, ba faoma lamane khö nawöra: Ha niha da'ö, wa lafondrondrongo göi linia angi ba dulu?
Famotokhi ba gahe[edit source]
- ↑ Ayati 1-25: faigi Mat 13:1-23; Luk 8:4-18
- ↑ Yes 6:9.10
- ↑ Teks asli Yunani ayati 14-20 andre abua wangali ya'ia ba li Niha, me konstruksi-nia ambö adölö, irege ambö aboto ba dödöda ia na ta'o'ö wangali ya'ia. Andrö wa te'alösö'ö wangali ayati andre.
- ↑ Famaelungu gana'a: ba teks asli Yunani tesura ἀπάτη τοῦ πλούτου (apatē tou ploutou), eluahania famaelungu börö wolohi-lohi harato simane kefe ba okhöta tanö bö'ö.
- ↑ Faigi 10:23
- ↑ Yoh 18:57
- ↑ Mat 5:15; Luk 11:33
- ↑ Mat 1:6
- ↑ Mat 7:2; Luk 6:38
- ↑ Mat 13:12
- ↑ Sin 127:2
- ↑ Ayati 30-34: Mat 13:31,32,34; Luk 13:18,19
- ↑ "Lada": sinanö andre tumbu ba danö Timur Tengah ba lö ba Danö Niha andrö wa ifo'eluaha manö ia Sundermann "lada". Töla ba bulunia fakhili ba lönga, simanö göi mbuania. Ba li Indonesia latötöi ia sesawi hitam (töi ilmiahnia Brassica nigra). Fa'alaŵania tola irugi 1,2 m.
- ↑ Ayati 35-41: Mat. 8:18,23-27; Luk 8:22-25
- ↑ Faigi 6:51
Fabaliŵa lala[edit source]
Injil Mareko: 1 • 2 • 3 • 4 • 5 • 6 • 7 • 8 • 9 • 10 • 11 • 12 • 13 • 14 • 15 • 16
Turia Somuso Dödö: Mataio • Mareko • Luka • Yohane
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö