Wp/isv/Dick Schoof
Dick SchoofДик Схоф (nid.: Dick Schoof), polno ime: Hendrikus Wilhelmus Maria SchoofХендрикус Вилхелмус Марија Схоф (Santpoort, obč. Velsen, 8 marca 1957 g.) jest niderlandsky politik i byvši činovnik, ktory od 2-ogo julija 2024 g. do 23-ogo fevruara 2026 g. byl premier-ministr Niderlandov.
Kariera kako činovnik
[edit | edit source]Dick SchoofДик Схоф studioval planologiju na Katoličskom universitetu v gradu NijmegenНејмеген v lětah 1975-1982. Potom nastupila dolga kariera kako činovnik, medžy drugymi v Asociaciji niderlandskyh občin (VNG) i v Ministerstvu obrazovanja, kultury i nauk. V lětah 1996-1999 byl zastupnik generalnogo sekretara (vtory najvysši činovnik) v Ministerstvu Spravědlivosti, v lětah 1999-2003 byl glavny direktor Služby za imigraciju i naturalizaciju (IND), v lětah 2003-2010 generalny direktor za publičny poredok i bezpečnost v Ministerstvu vnutrišnjih děl, a v lětah 2010-2013 generalny direktor za policiju v novom Ministerstvu bezpečnosti i spravědlivosti.
V lětah 2013-2018 SchoofСхоф izpolnil funkciju Narodnogo koordinatora borby s terorizmom i bezpečnosti (NCTV), poslě čego stal generalny direktor Občej služby razvědky i bezpečnosti (AIVD). Nakonec, v 2020-om godu stal generalny sekretar v niderlandskom Ministerstvu spravědlivosti i bezpečnosti.
Premier-minister
[edit | edit source]Parlamentarne izbory v novembru 2023 neočekyvano izigrala krajno pravičarska Partija za svobodu (PVV) Geerta WildersaГерта Вилдерса. Druge pravičarske partije, ktore prědže izključali vsekako surabotničstvo s PVV, tutčas byli prinudžene k surabotě ili s lěviceju, ili s PVV. V koncu tri partije izbrali vtoru opciju i suglasili se na stvorjenje koalicije s PVV: liberalna Narodna partija za svobodu i demokraciju (VVD), partija Novy socialny kontrakt (NSC, odščepjenje od hristijansko-demokratičnogo CDA) i Zemjedělsko-gradžansko dviženje (BBB). Jednakože uslovje bylo, že WildersВилдерс ne stane premier-ministr, i vodži vsih četyreh partij ostanut v parlamentu. Togda načelo se dolgo iskanje kandidata na premier-ministra, podčas ktorogo razni kandidati odpadli ili odkazali se. V dnju 28-ogo maja 2024 g. bezpartijny SchoofСхоф byl prědstavjeny kako obči kandidat na premier-ministra[1], a 2-ogo julija togože goda jegova nova vlada byla zaprisežena.[2]
Vlada SchoofСхофa ne byla uspěšna. Od samogo početka medžu učestvujučimi partnerami byli spory o politikě odnosno azilantov. Osoblivo PVV – največša partija v koaliciji – povodila se bolje kako opozicija neželi kako partner. Poslě neudačnogo ultimatuma Wildersa, PVV opustila koaliciju 3 junija 2025 g., čto v praktikě značilo upadok vlady. Vlada SchoofСхофa prodolžila svoju dějateljnost v formě prěhodnoj menšinstevnoj vlady. 19 junija 2025 portfelje ministrov iz PVV prějeli členi ostalyh treh partij. Jednakože odnošenja i togda ne ulěpšili se. 22 avgusta prědstavitelji NSC takože odšli iz vlady, a 5 septembra vladu dopolnili prědstavitelji VVD i BBB.
Parlamentske izbory 2025 g. skončili se poražkoju vsih partij, ktore naležali do vlady SchoofaСхофа. 23 fevruara 2026 g. byla inavgurovana nova, centropravičarska vlada pod vodstvom Roba Jettena.[3]
Iztočniky
[edit | edit source]- ↑ "Topambtenaar Dick Schoof (ex-AIVD, ex-NCTV) kandidaat-premier". nos.nl. 28 maja 2024. Data dostupa: 16 oktobra 2024.
- ↑ "Ministers en staatssecretarissen kabinet-Schoof beëdigd". NOS. 2 julija 2024. Data dostupa: 16 oktobra 2024.
- ↑ "Kabinet-Jetten officieel beëdigd en kan aan de slag". NOS.nl (na niderlandskom). 23 februara 2026.
