Jump to content

Wp/blc/Tcncni

From Wikimedia Incubator
< Wp‎ | blc
Wp > blc > Tcncni
Ti nutsalh-tum ti tcncni

Wicanaw wa tcncni wa kalhnmnmk' wa lhk'ulhiixw wa tsitsipii, alh7ayxwiinaw k'u ka ntl's - ic7ntl'alhaw k'u. Axw waltulht si7ixwamaw ka sutkams, aymit s7alhitimutaw ala awcwa. Nulhk'ulhaqw'saw ala qw'las wa tsitsipii ts, was nucsalhtimutaw mas ssqw'aw ts ula ka umatalhaw ts, alh7ay nucsliwa wa kw'pwalhtaw ts. Xlxl ti tcncni.[1][2]

alh7ays wa suunkwstanaw ts[edit | edit source]

Acwsanaw wa tcncni ts slhxanmaw ka ntl's. Nulhk'ulhaqw'saw tu, was lhkw'alsikanaw tuu - lhkw's wa tankstanaw ts. Axw lik'uulhmlcaw sinuk'calxinaw - sik'caw ula kulhulhikaw ts. Lhkw'aw wa cnaaslh ts ala imlaakwlh ts. Wicanaw wa cnaaslh ts wa asimlt ts ala q'panaw ts. Wicanaw kuks wa imlaakwlh ts wa alhpstutit wa cnaaslh ts ula snitsmaw wa qiqipinaw ts.

s7alh7aynaw ala ts'ktanaw[edit | edit source]

tl'kukwtsm wa tcncni ts - tl'apamkit ka nmnmk' ca skulhlxsalhaw ts. Alhpsaw ca ank'pts, ca qax, aytutitkwtuu wa laakts, n wa tsitstsiipi. Tutu7imantanaw (was asimltaw) wa acwlhts ala stn ssutkamslhuu - ka Alhtu7ntstimuts, alhitimutaw tuu ala asikaax ts, iklhis ala sqwli, wa umatalhaw slhxanmaw ts.

wa tsay wa s7alh7ay wa tcncnii ala kulhulmcilh ats[edit | edit source]

kwakwas[edit | edit source]

ti imlaakwlh ti kwakwas

wicanaw wa kwakwas ts wa qiqti ts ala tcncni ts ala awcwa. Axw ixwamnaw wiclha awcwa, alhitimutaw cats ssutkams, aynakwtuu s7amlhams. Yanicit ska mtiinaw ala stnaax ts, ala amats staq'aaxliwas. Tu-tu-tu-litaw wa kwakwas ts s7a7mlhanmis - acwsaynicticw ts siqyulcs, aytuticw tuu ula si7is7amlhs. Yanicitkw ska iklhiitimutaw ala amats wa qla - wa tsalh ts n wa anuxum ts. Tutu7imantanaw ts ala nutsq ts - yanicit wa xamlc wa sq'usa, n wa aykmlh wa imantanaw wa stl'xlxlxsm ts. Nuusqnamkit ulas txuulhulhs wa q'pa ulh ts. Wicanaw tsk wa ank'pts n wa alh7ay wa qiqti wa nmnmk' ts wa sininitsaw ts. ic7ntl'alhaw wa alh7ay wa kwakwas, tsitumanawkw' ka suncws.[3]

Kaluusmtim tuu wa tcncni, wa alh7ay c ti kwakwas, ama7itsk tuu skwakwastutim tuu wa alh7ay, stsitumanaw kamalh-ntl's. kamalh-acwsaanicicw ti s7ayutss ti kwakwas ka suncws, tics ti "Northern pygmy". Kamalh acwsaanicicw tc ka ntl's, tics kuks ti "saw-whet".

nutsalh[edit | edit source]

Yanicit wa Nutsalh ts ska tsitumanaw ka axw ntl's

Wicanaw wa nutsalh ts wa lhkw' ts ala tcncni ts ala awcwa. Axw ixwamnaw wiclha awcwa - alhitimutaw sutkams, aynakwtuu s7amlhams. Wicanaw wa nutsalh wa tcncni sy7asimltaw ssutkams - s7alhtu7ntstimuts. Wicanaw wa tsay wa sulutlh wa tsitsipii wa sininitsaw ts - knicaynictit kw tuu wa tsay wa acwlh wa qiqti wa nmnmk' ts. Wic its'ik siyanicit ska alhitimutaw ala axw ixw ts ala saaxwan ts. Kamalhninitsaw ulaatl's, alhpsaw ca qax n wa acwlh wa tsitsipii alhtxw, wa qw'litq ts n wa alh7ay. cucuculitaw wa imlaakwlh ts skalhcnasaw ts. Yustamkit wa ayk'mlh wa imantanaw wa ts'lkt ts. alats'itumulhs Joshua Moody s7alhayusliwas ti nutsalh c ti walasya.[4] Ayk'liwanaw sninitsaw - atmanaw tsk wa acwlh ts s7asmusams wa ts'klaktlancw ti slhkw'lcaw tc. Slaxaw wa nutsalh ts ala kulhulmcaw wa Atl'smc ts.[4] Knicaynictim wa slax wa nutsalh ts c tu Atl'smc ts, axkuks aytum ts c tu Nuxalkmc txw - samwis s7aytulh ka usxlhalhhaycilh.[5] Axw mas yustamkim wa spuxaw ts n wa tsapaw ts.[5] Tsuts Captain Schooner s7alh7ayutss ti nutsalh c tu naniixwik.[3]

wa tcncni-tutim ts[edit | edit source]

ti tcncni alh ti anutsq ti stn

Lhnus wa alh7ay wa tcncni-tutim wa tsitstsipii ts - smaw ti alh7ay, alh7ayusliwas c ti nutsalh, tanksnaycs tc, axkuks alh7ays ti slhkw's tc alh tu s7alh7ays ti nutsalh. Screech-owl-tutim ats s7itts'xlhnu. mtiinaw k'u ala asiixws wa stn ts slhxanmnaw - k'caw uuxnk ula sk'caynicit ka snknic. Asimltaw ala nutsq. Kalaalhmtim ats alh Nuxalk.

ti ktl'alsikan ti tcncni ala kulhulmc ts

Axkuks alh7ayusliwas ti qw'las tc - yalxuusliwas tc, alh7ays splalsikans tc. Tic ti ktl'alsikan ti tcncni tc. tutu-imantas ala kulhulmc ts. Alhpsaw ca ank'pts ts. Acwsnictim kw' alh Nuxalk.

Wa tcncni ts n wa tl'msta[edit | edit source]

qulhax c ats ca lhnus wa smsma - wa tcncni wa umats ti cicmanwasuuts ti tl'msta s7atmas... n ti ts'ktatumt kamalh-acwsnicicw ti kwakwas. Apsulhs ti tcncni ala sulhs S7ayulh.

Alats'iitumulhs Captain Schooner skamalh-wnts'im ti wal c ti puts'tn, c ti sp'iixwta, ays sasts ti cicmanasuutss ulh ti tcncni. Aynawk' alh tu ayk' txw skastsayulhtit kw ti tcncni swals - ays ti tcncni s7analhas, tsutmis kw wa skwatstas.

Kamalhplikms ti wal alh ti satl'as, aystuu ti cmanwass, tl'aps tc ulh ti tcncni.[3]

References[edit | edit source]

  1. Vanessa Moody
  2. Rhonda Schooner
  3. 3.0 3.1 3.2 Captain Schooner
  4. 4.0 4.1 Joshua Moody
  5. 5.0 5.1 Louie Hall