Wp/blc/Qw'litq

Tic ti qw'litq tc ti ts’xuulhliwa ti tsitstsipii alh ti alhqulhuus t’ayc. Sulutlh tc stsitsipiis – kalhsmlhkaw wa tsay wa qw'litq. Knicit wa kalaalhmit wa snknic. Anusyamit wa smlhk ts, wa qatsx, wa k'inacw ts n wa alh7ay c ti ts'ikwa tc.

Ti qw'litq tc

Tic tsk ti tsitsipii t’ayc ti qw'litq tc.^[1]^[2] ts’xw wa spuxulhanks tc, alh7ays tuu wa spuxulhiixws tc. Ts’us kuks wa spuxulhiks tc. Axw sk’cs wa spuxlxsnks tc. Axtuu sk’cs wa kulhlxs wa kw’pwalhts tc. Alhi lhuu ka mukw alh ti qwlqwlilxs ti maaxsas tc. Tic ma ti tsitsipii t’ayc ti “xilc”-tum ti qw'litq, qulhayc c tu Franz Boas. Wic “Glaucous-winged gull” wa itts’xlhiixw wa skwatstas ti tsitstsipii t’ayc. Axw mas waltulhs ti qw'litq t’ayc, alhis cats sutkams was amlhams. tam7imantas tc ala qnklst ts.

ti mucwmukwlxs ti qwlqwliitqi tc

Lhkw’s ti qw'litq t’ayc ala tsay wa qw'litq ts. Paaxim kw ca sQwlqwliitqi.^[3] Axw alhnapits sipaaxim c txw, alh7ays tc slhkw’s tc. K’caynicim tuu ka mukw alh ti maaxsas tc – axkuks quulhlxsaycs tc ca sk’c, alh7ays tc c tu smatmcuks. Ama7itsk stics ti qw'litq t’ayc ti “muxmukwalkws”-tum tc, wa skwatsta ts, alhqulhim c Boas. Wic tsk “mucwmukwlxs” wa s7alh7ayutsmilh wa skwatsta ats.^[4] Mucwmukwlxs-tuu wa alh7ayutsmtim wa "glaucous-winged" wa qw'litq tc.

Axw iixwamiis ti qw'litq t’ayc ala kulhuuts wa sulut ts. Alhitimuts tc alh Nuxalk sutkams. Mulms ula smlhk ts, tl’antl’aps tc ala ka sulh ts, icyaasnms ca kanusyam wa s7aylh – tl’aps tuu tc ula umatstulh wa s7aylhilh ts. Wic “Herring Gull” wa itts’xlhiixw wa skwatstas ti qwlitq t’ayc.

ti kitiwiik-lit ti qw'litq tc

Kitiwiik-lit ti smaw ti alh7ay ti qw'litq. Qwlculhtsutaw stanapsulhaw ala amataw ts ala iklhii ts ala sulut ts. Sak’ayalhtimutaw kw’ uuxnk ula qla ts skasmlhkaw ts. Ts’xulhanks tc, ts’uulhiks was ts’u wa spuxutsaks tc. Sk’c ti spuxlxsnks tc – sk’clxsakstuu tc – sk’cs ala kulhlxs wa kw’pwalhts tc. Sk'calhaw tuu. Alhitimutaw alh Nuxalk ssutkams. Wics “kittiwake” wa itts’xlhiixw wa skwatstas ti qw'litq t’ayc.

ti lqw'liitqi tc

Qwlqwlis ti maaxsas ti qiqti ti qw'litq t’ayc. Qiqtis tc ala qw’las wa alh7ay wa qw'litq ts. Ts’u wa spuxulhikaw ts. Ts’xw kuks wa spuxulhankaw ts. Alhitimutaw ts ala nustl’cw ts, wa tsalh ts, n wa anuxum ts. Ayalhaw ts ula sulut ts sutkams. . Alhitimut mas tc alh Nuxalk. Qwlqwli tuu wa maaxsanaw ts. Wics “Mew-gull” wa itts’xlhiixw wa skwatstas ti qw'litq t’ayc.

ti “k’mlxs” ti qw'litq

Ays ti qw'litq t’ayc, s7kalaalhmim tc ala apsulh ts. Kalaalhmim tuu tc ala umatstus wa s7aylhilh ts. K’caynicicw ka sk’c ala kulhlxs wa spuxlxsnks tc. K’cicw tuu squulhlxsaycs tc ca sk’c alh ti maaxsas tc. Alh7ays s7ask’mlxss tc. Lhkw’s ti alh ti kitiwiik-lit tc. Wics “Ring-billed” wa itts’xlhiixw wa skwatstas ti qw'litq t’ayc.

Ti nusk’cikulhaqw’s ti “k’mlxs” tc

Kalaalhmim tuu ti lhkw’ ti qw'litq, alh7ayuulhliwas c ti k’mlxs tc. Smaw ti sqw’lass tc – nusk’cikulhaqw’s tc. Wics “California gull” wa itts’xlhiixw wa skwatstas tc. K’am7ayliwas tuu ti sininitss ti nusk’cikulhaqw’s t’ayc c ti sininits ti suuxis tc, ti “k’mlxs” tc. Axw slaxaw wa alh7ay wa qw'litq alh Nuxalk.

References

[1] David Moody

[2] Felicity Walkus

[3] Ross Saunders

[4] Dale McCreery

[1]

[2]

[3]

[4]