Wp/bew/Igama di Indonésia
Igama di Indonésia entu macem-macem. Di sènsus resmi nyang diririk ama Kementrian Dalem Negeri tahon 2021, deri 273,32 juta orang nyang ada di Indonésia, 86,93%-nya nganut igama Selam, 10,55%-nya – Serani (7,47% Protèstan, 3,08% Katolik), 1,71% Hindu, 0,74% Buda, 0,05% Konghucu, èn 0,03% laèn-laèn igama.
Ada sisik-melik igama nyang dijalanin di ni negara, èn dia punya embatan barengan dalem pulitik, èkonomi, ama kebudayaan negara besar punya. Bagèn kata kebèbasan beigama dijamin di dalem wèt dasar, guwernemèn semprakan tahon 1965 cuman ngakuin enem agama: Selam, Serani (Katolik digero Katolik, Protèstan – Kristen, èn diakuin kepisah), Hindu, Buda, ama Konghucu. Di entu tahon juga', guwernemèn ngedantain kalo guwernemèn kaga' ngerarang laèn-laèn agama, èn secara danta nyebutin Yahudi, Majusi, Sinto, ama Tao. Berales beslit Mahkamah Wèt Dasar Indonésia tahon 2017, aliran kepercayaan–agama suku dengen atu harkat igama baru–misti diakuin èn diserèntain di dalem Kartu Tenger Penduduk (KTP). Berales data Konperènsi Agama èn Perdamian Indonésia (ICRP) punya kumpul, ada 245 igama nyang kaga' resmi di Indonésia.
Semprakan 1975 ampé 2017, hukum Indonésia ngewajibin saban warga negara nyerèntain agama di dalem KTP-nya, nyang orang kudu milih salah atu deri enem nyang diakuin resmi. Walakin, semprakan 2017, warga negara nyang kaga' masup atu deri itu enem agama bolé ngosongin itu bagèan di KTP-nya. Bagèn kata kaga' ada hukum ridah nyang ngrarang orang Indonésia pinda igama, Indonésia kaga' ngakuin paham ahnostik (paham orang kaga' tau) ama paham atéis (kaga' betuhan). Sebagé lagi, penistaan agama entu haram hukumnya di Indonésia. Selamanya tahon 2018 punya statistik resmi, 86,7% deri orang Indonésia pada ngaku sebagé orang Selam (99% Ahlusunah, 1% Si'ah, èn 0,2% Ahmadiah), 10% Serani (7,6% Protèstan, 3,12% Katolik), 1,74% Hindu, 0,77% Buda, 0,03% Konghucu, èn 0,05% laènnya.