Wp/arq/موسيقة جازايرية

موسيقى جزايرية

موسيقى جازايرية مشهورة ببزاف طبوع كاين لكلاسيك،أندلسي،شعبي،ر٘اي، لقبايلي،ش٘اوي،تيندي،لعلاوي،لقصبة اولبدوي . ولا٘ لغنا تاع شعبي

لنواع تاع لموسيقى

لموسيقى الكلاسيك تع جازاير يقولولها العربية-الاندلسية

موسيقى اندلسية فَل جازاير

نشوفو بلي  : "الموسيقى تع الاندلسي"و "الموسيقى العربيةلاندلسية"سماوات جدد جابوها العلماء تع الموسيقى الغربية كيما ج.رواني،امالا الاسم تع "الموسيقى الكلاسيك تع المغرب" راح يكون يوالم كثر. في الصح كان كاين ربعة و عشرين نوعية وحدة لكل ساعة من النهار بصح خسارة برك ستاعش (كاين فيهم ربعة ما كملوش ) قعدو شادين فيهم حتى لذروك فال جازاير. هذا الي يخلي دزاير البلاد اللي عندها بزاف النوعيات و هذا الشي ماشي بومبي ،في الصح دزاير ضيفت بزاف شعوب و لاجئين اندلسيين وموريسكيين. البارون دي ارلانجر يشوف بلي الموسيقى الكلاسيكية العربية-لاندلسية ،بلغة العربية (كلاسيك)،كاينة ف دزاير من ثلاث ليكولات مهمين :الغرناطي تع تلمسان اللي مرتبط بليكول تع غرناطة الكانا تع الجي اللي يقولو من قرطبة و المالوف تع قسنطينة اللي يرتبط بليكول تع سيفيل. كل ليكول من هاذو يخدم هاذي الموسيقى بشوية تع الاختلافات .في ليكولات الثلاثة هادي لابراتيك معروفة بالنوبة ،اللي هي تكون دور فعال و صخب و الللي يتبنى على نظام و قواعد ايقاعية و شكال مخدومين مليح كل نوبة مصنوعة على عفسة (تبويب)معينة اللي تدي اسمها. كي نشوفو لدراسة تع المدينة تع تلمسان اللي دارها جاك سوستال ،تلمسان كانت لا كابيتال تع الموسيقى العربية-الاندلسية اللي ترجع جازاير. و كانت البلاد اللي زادو فيهاالفنانين لكبار من هاذ الستيل . كاين زوج ليكولات قدم تع الموسيقى العربية الاندلسية ف دزاير. تع تلمسان و تع قسنطينة. ليكول تع دزاير تولد من جديد بصح روتار تحت تاثير تع ليكول تع تلمسان .هذي المدينةهي الدوح تع الحوزي، و الللي هو نوع وحدوخر تع الموسيقى اللي لوريجين تاعو من الموسيقى الاندلسية و الللي يمثلها الموسيقار-الشاعر (تع القرن سبطاعش) بن مصاييب . النوبة تع تلمسان مكومبوزيامن حركات مختلفين و اللي راهم يجرو و اللي هوما:

• 1.دايرا:مورصوفوكال تع ريتم ليبر في انسجام كامل.
• 2.مستخبر:بديةانسترومونتال تع ريتم ليبر، في انسجام تام.
• 3.توشيا:مورصو ايسونسيال تع البدية، متبني على ريتم ثنائي و لا رباعي (2/4; 4/4)،مع ليكسيبسيون تع توشيا غريب الي هي ريتم ثلاثي.
• 4.مسدر: هو المورصو فوكال و انسترومونتال اللي مهم في النوبة ،يتلعب على ريتم ربعة على ربعة 4/4.
• 5.بتايحي:المروصو لانسترومونتال و الفوكال الزاوج، متبني على نفس الريتم تع مسدر(4/4روتار شوية).
• 6.درج:عفسة فوكال و انسترومونتال مبنية على ريتم ثنائي ،تجري كثر من هدوك زوج مورصوات لوالا.
• 7.توشيات الانصرافات:مورصوانسترومونتال يعطي الطاقة و لينارجي ،مبني على ريتم ثلاثي.
• 8.انصراف:عفسة فوكال و انسترومونتال عندها ريتم ثلاثي(5/8).
• 9.خلاص:المورصو التالي لي يتغنى تع النوبة، يتحدم على ريتم يرقص(6/8).
• 10.توشيات و كمال:مورصو انسترومونتال مبني على ريتم ثنائي ولا رباعي.

لنواع المهمين تع الموسيقى لاندلسية الجزايرية سبعة و اللي هوما:موال ،اراك ،جاركا، رمل مايا، زيدان، سيكا، مزموم.لنواع ديل ،راسدديل ،مايا جايين من الموال .لنواع حسين و غريب جايين من الاراك.النوع راصد جاي من الرمل مايا.لنواع مجنبة و رمل جايين من زيدان.ف دزاير،الموسيقى لندلسية قاع فيها ستاغش نوع بلا ما نحسبو النوع الساحلي اللي معروف ف قسنطينةبالاسم رحاوي.هذا النوع يوالم الموسيقى الحضرية الشعبية كيما الشعبي و المحجوز، بصح غير هنا هنا البروفسور نور الدين ساعوديدار نوبة في النوع الساحلي و اللي سماها: نوبة دزيرية. لنواع لمهمين قاع عندهم استخبار(مورصو فوكال بلا موسيقى ليبر).النوع غريب اللي اصلو جاي من الاراك هو فان عندو استخبار.من الربعة و عشرين نوبة اللي يقولو كاينين ، نعرفو غير ثناعش كاملين و الللي هوما:نوبة ديل ،نوبة غريب ،نوبة حسين ،نوبة مايا، نوبة مزموم، نوبة مجنبة، نوبة راصد، نوبة راصد ديل، نوبة رمل ،نوبة رمل مايا، نوبة سيكا، نوبة زيدان. و كاين فان مع هادو النوبات الكاملين شوية انصراف و خلاص في النوع تع الموال ،اراك جركا.النوع غريبات حسين عندو توشيا.

• انقلاب:بازيادة على "النوبة"،عندنا فان ف دزاير،لينقلاب اللي هو مورصو فوكال وانسترومونتال يستعملو فيه نقس النصوص تع النوبة بصح الرنات تعها المعزولين(خاطيهم النوبة)جينيرالمون يكونو خفاف شوية.لينقلاب عندو بلاصة تع اختيار في الموسيقى لاندلسية الدزيرية.قبل ما نديرو لينقلاب،نديرو استخبار و نختارولو نوع تع موسيقى متبوع بالكرسي و اللي هو كومبوزيسيون موسيقية صغيرة تع واحد التدابير اللي هوما مقدمة تع لينقلاب.الكرسي جاي كيما الاستخبار في لزوج مبنيين علا نفس النوع تع لينقلاب. بالنسبة للمكونات تاعو الموسيقية،لينقلاب يستعمل هذوك لنواع السبعة الاساسيين.خترات يصرا وين الموسيقيين يديرو انقلاب قاع في البدية تع النوبة، في بلاصة التوشيا بح قاع هكاك لينقلاب جامي لا يكون جزء من النوبة.خترات برك وين لي يدربو لوركسترا تع الموسيقى لندلسية يديرو استخبار جوست ورا البتايحي و قبل الدرج.
• الكاديرية:خترات ورا خلاص نديرو كاديرية و اللي هي مورصو فوكال يتغنى بااللهجة الشعبية، مخصص للنسا ،بصح من جيهة وحدوخرا لنواع تاوعو، مرتبطين بالموسيقى لندلسية.

الشيوخة الكبار تع هذي الموسيقى هوما:محمد بن تفاحي ، رضوان بن ساري ، شيخ العربي بن ساري ، عبد الرزاق فخارجي،محي الدين بشتارزي،عبد الكريم دالي ،دحمان بن عاشور،الشيخة يامنة ،الشيخة تتمة،محمد خزنادي ، صادق البجاوي، سيد احمد سري ،محمد سفينجة،حاج مولاي بن كريزي .و بالنسبة للجيل الجديد عندنا شيوخا بزاف ممتازين كيما :مراد الباز.، حبيب قرومي،اللي هو تلميذ تكون في الجمعية تع الموسيليا تع دزاير مم الوقت اللي كان عندو ثمن سنين ،و الشيخ الكبير اللي حرص على قرايتو هو سيد احمد سري;عندو زوج البومات غناهم وحدو مع العود تاعو و قلد فيهم زرياب ،اللي طلقوهم في لعوام1994و1995،منبعد ثلاث البومات واحدوخرين مع مرتو حسينة بالدربوكة و فالتالي زوج ليزالبوم واحدوخرين في اطارإعادة النظر في التراث الأندلسي مع زوج من الموسيقيين من العالم الكلاسيكي الغربي.... جديد،بايهجة رحال مغنية سماوها ملكة الموسيقى الكلاسيكية و فان باحثة و شيخة في المجال تع الموسيقى الكلاسيك العربية- لاندلسية. سعدان بن باعلي وبايهجة رحال خرجو كتاب كامل على الموسيقى العربية-لاندلسية. و اللي العنوان تاعو لابلوم ،الصوت و الريشة.

غرناطي

لِيلي بونِيش (1921-2008).

الغرناطي(بالعربية اسم تع المدينة ليسبانية غرناطة،هو الشكل الموسيقي العربي لاندلسي الناتج على ليكول الكبير تع تلمسان. الغرناطي هذا النوع حافظو عليه و طوروه ف تلمسان،عن طريق البلاصة تع المدينة اللي كانت التاقة من غرناطة في أفريقيا، و المدن لزوج تقاسمو تاريخ واحد من المدايق بين ناسريد وزيانيد .مور ما طاحت غرناطة،الاف العايلات الاندلسية راحو لاجئين لتلمسان . الغرناطي يستعملوه فان في المدن الغربية تع دزاير كيما: ندروما،وهران، سيدي بلعباس .خترات، يجي وين نصيبو بزاف جمعيات تع الغرناطي في نفس المدينة. في المروك فان، بزاف جمعيات موسيقية قعدو يقلدو في ليكول تع تلمسان في المدن تع وجدة و رباط. و كان كاين دزيري سموه محمد بن سماعين اللي اسس في1919الجمعية تع الغرناطي التلمساني اللولة في المروك و اللي هي الجمعية "لاندلسية" تع وجدة .و مبعد وراها كاين شيخ دزيري سموه محمد بن غبريت هو فان اسس جمعية تع الموسيقى الغرناطية في الرباط .في البدية تع القرن العشرين ،المراركة بداو يسمو هذا النوع تع الموسيقى :دزيري(يعني :جزائري)باه يفرقو بينو و بين الموسيقى العربية-لاندلسية تع المروك اللي يسموها"الالة"

لموسيقى لجزايريا شعبيا

هاذ لموسيقى تتغنا بال د٘ارجا جايا مل موسيقى لندلسيا ونلقاو فيها

• لحوزي لي جاي ملغرناطي
• شعبي لي كان يسموه لعروبي اللي ترجع لدزاير
• لمحجوز لي جاي ملمالوف

لحوزي

فضيلة دزيرية.

هو نوع من لفن تاع لغنا , هو معروف في ولاية لبليدة و العاصمة وهو يختلف على لمالوف الاندلسي , والحوزي هو مقطوعات شعرية بالدارجة , في قالب موسيقي خاص , هو نوع تاع شعر بدا فلكارطيات في وسط ناس لرياف أو نقدرو نقولو بلي خالد لمنداسي هو لُوُلْ لي غنّا هاذ لموسيقا فلقرن لربعطاش هي قصيدة طويلا لي فيها لي روفران أو لي كوبلي ، ناس لي يعرفو يقولو بلي لأصل تاع هاذ لموسيقى وتاريخ تاعها يولي ل تلمسان أو فلموسيقى ولألحان تاعها جاية ملأندلسي لي تستعمل ثمنيا طوبوع تاع موسيقى معروفين فلموسيقا لأندلسية لجزايريا ولي هي : لموال ، لعراك ، لغريب ، رمل مايا ،في الصح دزاير ضيفت لاجئين اندلسيين و موريسكيين . البارون دي ارلانجر يشوف بلي الموسيقى الكلاسيكية العربية لاندلسية ،بلغة العربية (كلاسيك)،كاينة ف دزاير من ثلاث ليكولات مهمين :الغرناطي تع تلمسان اللي مرتبط بليكول تع غرناطة، جركا ، زيدان ، سيكا أو لمزموم .

أو ليريتم لي يخدمو بيهم بزاف كاين لقباحي ، لبروالي ، لزنداني ، ولمصنع .

لكثرة تاع ناس لي يسمعو هاذ لغنا دوريجن متلمسان جايبينو متراث لندلسي أو من بين هاذ شعرا و لفنانين لمعروفين محمد بن مصايب ، حمد بن تريكي ، محمد بن سهلة أو وليدو بومدين . لازم نقولو بلي لفورما تاع لمدرسة لموسيقيا تلمسانيا هيّا لغرناطي تاع غرناطة في سبانيا لي خارج منو لحوزي وهي سبيسياليتي تاع مدينة تلمسان

لمحجوز

هو نوع تاع موسيقا شعبيا لي جاي ملمالوف وين لغنا يجي معا موسيقا مخدومة بطبع تاع لمالوف أو فهاد نوع ليريتم يجو مبدلين أو ماهومش تاع نوبا لكلمات تاع لقصايد تاع لمحجوز بالعربيا دارجة لجازايريا وين شوعارا مقسنطينا

شعبي

شعبي هي موسيقى فلكلوية جالاصل تاعها من لموسيقى لعربية الاندلسية , يقصد لفنان بهذانوع من لغنا تعبير على حياتو الي عايشها , وقصص حقيقية تاوعو يحكيها على شكل غناء وشعبي هو جزء من التراث لجزايري وهو نوع من الانواع لفنية دايرة بزاف ف لوسط لجزايري , والي عطيها قيمة كبيرة بزاف من لفنانين وخلوه فن عريق يبين صوت شعب , لخطرش تحقي على لحلة الي رانا عايشينها,تعلقت لغنية اشعبية باسما وحد الفنانين ألي وصلو لغناء الشعبي لخارج لحدود ومن بينهم الكاردينال آيت اوعراب محمد ايدير لمعروف باسم بالحاج محمد العنقى . لغنا شعبي جاي ملموسيقى لأندلسية بصّح زادت توسعت او كبرت كي زادو دخلوها عفايس أوروبية،عربية أو افريقية فلألحان تاعها و قناوا و أمازيغية فلإيقاع .

لغنا شعبي بدا فلقرن لعشرين فل عاصمة. و جوايهها سورتو لحاج لملياني تاع لقبايل .ناس تاع دار سينيما </ref> بدا فماك.كي نشوفو للجيهة تاع لهدة اولمعاني تاع لقصايد كاين شيخ امحمد لعنقا او شيخ ناضور هوما لي بداو لولين فهاد لغنا ماشي غير هوما كاين بزاف شيوخ تاع شعبي كيما عمر زاهي،بوجمعة العنقيس,الحاج منور, عمر الزاهي , كمال مسعودي, دحمان لحراشي، شيخ بورحلة، الهاشمي قروابي .

دحمان لحراشي .

لحاج لعنقا.

لْبَدْوي

لبدوي نقصدو بيه رّيف وهوّ موسيقى شعبية بانت ف وهرّن ( لْغرب لْجازايري ) واحد مَشْيوخَتها مصطفى بن براهيم . هاد لْموسيقى هيّ لاَصل تاع رّاي تَنْخدم بَ طَمْبور و لْڤَلاَل و زوج زَمَّارات مصنوعين ب لْڨَصبة هاد نَّوْع دخَل لاَفِيل فْ لَعْوَام لْوَالاَ تاع لْقرن لْعشرين طَوّروه فَمّا وَلاَّ يَهْدر على بزاف صوالح صْراو ( سورتو لِستعمار ) فِ داك لْوقت لبدوي جَابوه لَلْموسيقى جديدة و حولوه لغنيات قصَار خلطوه مع رّاي و نْسَاوْ لاَصْل تاع لَلْحان لْقديمة لِعندو . هاد لْغْنَا يْبَازي على قصيدة شعبية ولا قصيدة ليسموها لْمَلْحون كاين مغنيين كبار و معروفين يغنوه من وهرّن منهم شيخ حمادى و شيخات كيما شيخة ريميتي بصح يغنو قصايد ماهمش ملاح لخاطكش يهدرو فيهم على لامور و حياتهم صعيبة . موسيقى بدوية ولا نقدرو نقولو غربية مخدومة ب زوج مزامير و ضربة على طبل هاد لموسيقى يعيطولها رّاي لْعروبي ، وكاين جِينيرَاسْيو جديدة مَلْ مغنيّين تأثرو بها كيما احمد وهبي و لبلاوي لهواري لعطاولها ستيل جديد معروفة ب اسم لعصري.

بلاوي لهواري.

احمد وهبي(1921-1993)يغنيّ غْنا وهراني متأثر بَلْبدوي.

شيخ حمادى (1889-1968) لِيغَني لْبَدوي.

رّاي

شِيخة رِّيميتي (1923-2006) مغنية تاع رّاي لقديم و لْبَدوي تَنْعَدْ كيما رُّوح تاع رَّاي.

راي هو نوع مَل موسيقى جازايرية يتغن ب دّارجة خارج مَلْبدوي وبدا يْبَان فلَعوام لوالا تاع لْقرن لعشرين ف وهرّن،كلمة رّاي نقصدو بها« لْفهامة » ولاَّ « تَخْمام »،جات من داك لوقت وين كانو شّْيوخا شّعَرا يْمَدو لْوصايات و نصايح فقصايدهم وكانت هدرتهم قاع معاني على لبروبلام الي عايشينهم و كانو يغنوها بلوهرانية، ليغن هاد لموسيقى يشتكي مل مصايب لي صراولو بلا ما يتهم حتى واحد بلعكس يتهم روحو و يلوم نفسو و رايو لخلاه يدير صوالح مكاش منهم،وخطرات لغُنية تاعو تبدا بكلمة : يا رّاي. من وهرّن لغنا تاع رّاي بدا يمش و يشيع فْڤاع لْجازاير. هاد لغنا بدا يمش فلموند لخاطكش زادو وسّعو فيه و خدموه مليح فلوروب كيما لاَلْبوم تاع شّاب خالد "كوشي" لخدمهولو صافي بوتلة فَسبعة و ثمانين وهاد لاَلْبوم تكلاسا 44 بين ميات لاَلْبومات على حساب ماڨالو فلومند ولفناك. هاد لموسيقى جايا مل خْلاَط تاع كامل لَنْواع ثاع لموسيقى فَلْجازير،انْخَدمت بنغمة جديدة (سانتي و لڤيتارة تاع تريسيتي)،دعموها لزيميڤري لكانو يحوسو على موسيقى تْوالَمْهم(رِيتْم جديد مْعَ خادمين لغنا بدارجة لوهرانية مخلطة بكلمات تاع فرنسي و لونڤلي). هاد لموسيقى بانت ففرنسا قبل ما يعاود يسيطر عليها شعب لجازايري وأصلاً هاد نوع هَل موسيقى ماكانوش راضيين بيه مع ُلوُلْ لخطرش هذا نوع يخص لعروبية يعني الي ساكنين في الريف وهوما(فلخارج ليجون لمتحضرين) و وسايل ل إعلام. كاين ڨور عاودو هاد لموسيقى كيما معاونة لفنان جون جاك ڨولد مان مع شاب خالد لِكْتبلو وحدة مل غنيات لْمعروفين فلموند عايشة و معاونة شاب مامي لَْلْمغني ستينڨ و وَحد لڨروب فرانساوي . لعوام توالى راي نقص و وحد لمغنيين بَيّنوه فبلدان واخداخرين كيما شرق ل اوسط و مصر (شوف لموسيقى لمصرية). وليوم فنانين عرب ملكو راي و نْواعو لزادت فلوروب وحولوه على حساب ثقافة تاع بلادهم و هاد صْرى لْكامل لَنواع تاع لموسيقى . من جيهة واخداخرا سونْتْر ليدير لبحث تاع ما قبل تاريخ و لَنتروبولوجي لجازايري س ن ر ب أ ش فتسعة و عشرين أوت ألفين و سَتاعش حَطْ دوسي لَلْ يونسكو باش يكلاسو راي و قصايدو لي صابوها مع لوالي تاع لقرن لي فات ويْعَدو هاد لموسيقي هدرة يعبرو بها من هكذا جيهتو هكذا شرحلهم عبد لقادر بريزيدو تاع إدارة لفنون و لاداب.

شاب حسني مات مقتول.

مهرجان تاع رّاي ف فرانسا م ليمنى ليسرى مامي ٬ خالد ٬ حميد و صحراوي.

لخاوة رشيد و فتحي لي كان عندهم ستوديو كبير وجديد وهوما لِّبِيّْنو بزاف فنانين.

ڤروب تاع راينا راي لي بان ف 1980.

موسيقا قبايليا

سليمان عزَّام (1918–1983) مُغَنَّي أو شاعر تاع لْموسيقى لْفْبايْلِيَة.

بين لعام تاع لخمسينات وسبعينات بزاف ليشونتور قبايل دخلو لموسيقا تاع لوروب فلغنا تاعهم كيما ستيل كلاسيك ميديتيراني كيما فاريد علي ، نوارة ، شريف خدام ، ليزابرانيس ، نوردين شنود فلعوام تاع الستينات لمغنية نوارة وحدة ملأعمدة تاع لغنا لقبايلي دخلت موسيقى جديدة ما كانتش معروفة فشوية ملغنيات تاعها فلعوام تاع لسبعينات سياو يزيدو عفايس جدد للموسيقا لقبايلية كيما صرا معا لفنان إيدير لي كومبوزا و غنا اغنية تاعو لمشهورة أفافا إينوفا لي دارت علا الموند . ليشونتور لي معروفين : سليمان عازم ، زروق علاوة ، الشيخ الحسناوي ، شريف خدام ، صالح سعداوي ، شريفا ، معطوب لوناس ، لونيس آيتمنقلات ، إيدير ، ليزابرانيس ، رابح اسما ، براهيم إيزري ، بوجمعة أقراو ، تاكفاريناس ، جمال علام ، ماسا بوشافا ، محمد علاوا ، حنيفة ، سامي لجزايري ، أكلي يحياتن . كاين غنيات بطبع جديد لي يسمعوهم بزاف فلحفالي أو لعراس أو هاديك هيا لي تمثل الفلكلور تاع الموسيقا القبايلية وين الموسيقى تكون خفيفة لي بارول يحكو علا لحب فلمجتمع لي خلا ليشونتور يديرو لي ديو كيما محمد علاوة . ليوم هاذ نوع تاع لموسيقى بدا يمشي بارتو أو يسمعوه حتا فلبلايص وين ما يفهموش لقبايلية فلعوام تاع سبعينات بانو بزاف ليقروب تاع فنانين لي يغنو لغنا جديد وين دخلو فهاذ لغنا آلات جدد كيما لقيتارة فولك ، لقيتارة إيليكتريك ، لبيانو سانتي من بين هاذ لي قروب كاين :إيناسليين ، إيدفلاون ، إينملاين ، دبزة ، إيمناين أو لي زابرانيس . من جيهة واحدوخرا كاين لي شونتور لي غناو على لبوليتيك ولي جابت عقلية جديدة لناس من بين هاذ الفنانين نهدرو على لفنان لي مشهور فالجزاير و مام فلعالم : إيدير رجع رمز تاع الغنا لقبايلي جديد كيما لغنيا المشهورة تاع أفافا إينوفا لي ترجموها لشحال من لوغة . ليوم لفن تاع لغنيا لقبايليا راهو واسع بزاف ، أو كيما لعادا نلقاو لغنا كوميرسيال لي يسمعوها لي جان أو كاين الموسيقا لي تحكي على الرومنسيا و سوجيات سوسيال والدنيا او من بين لفنانين لي معروفين بهاذ لغنا : علي عمران ، أولحلو ، زيمو ، سي موح ، براهيم طيب ، شيخ سيدي بيمول أو واحدوخرين.

ڤروب قبايلي لي زابرانيس لقروب لول تاع روك فالجزاير .

لوناس معطوب.

ايدير.

لونيس آيت منڤلات .

موسيقا شاويا

شاوي هي موسيقى جزايرية جات من لاوراس وهي ميلونج موسيقى صحراوية وايقاعت,وهذا نوع تاع غنا من اقدم الانواع تاع لموسيقى ف لجزاير وهي موروث ثقافي من قبل الثورة لجزايرية وحتى بعدها وكانو يستعمو فيها القصبة و البندير و الزرنة والبندير ,وفي هذو لعوام توالى زادوانواع تاع الالات الموسيقية كيما كليفيلوا, الني,الكوردي ,القانون,الكلافي,لسانتزور... ,

عِيسى لْجَرْموني (1886 -1946) مغني شاوي.

(جمال صابريلِيْغَن لْغْنا شّاوي)

هيا موسيقا تتغنا ب شاوية ولا ب (لأمازيغيا تاع لوراس) ، فلوراس لموسيقا تاع بكري كاين بزاف ولي يمثلها بزاف فنانين ملوراس ومنبين لولين لي غناو هاد لغنا : عيسا لجرموني ، على لخنشلي. ستيل تاع رحابة معروف قاع عند شاوية أو معروف ببزاف لي ستيل كيما العربي لندلسي لي يعنيه ساليم حلالي . بزاف ليشونتور م لوراس يخدم ولغنا تاعهم من هاذ ستيل كيما يوسف بوخنتاش .

كاين واحد لغنيات لي يقولولهم بلأمازيغيا ' إيزلان' فيهم بين ربعة و خمسة تاع لبيات لي نلقاوهم فلوراس ، فلقبايل ، فلهقار . لوراس معروفة بلكنز تاع لموسيقا لي عندها ن من جوايه تبسا نلقاو ' ركروكي ' ولا ' ركروك ' لي يعني صدا ونلقاوه غير فتبسا ، فايت سالم كاين نوع تاع لغنا تاع نسا لي يسموه ' لازكار 'عند لي ميلوبار أجلاس قدام دواوير تاع أهيدوس فلمروك عندهم ' تينزارين ' لي تعني لقطرات تاع شتا ، يغنوها وين ما تكونش شتا ، أو كاين ثان تيقوقان ولا تاوريال بصح المشهورة فيهم هيا لعياش . نوع جديد تاع لموسيقا شاوية بان وهاذ لغنا نلقاوه مخلط ب روك ، لجاز ، لبلوز ، لفولك أو راي ب شاوية . لغنا تاع زرنة مويقا سطايفية ' ديوان ' مايلعبوها فنانين بزاف أو يلعبوها ب لبندير أو لقصبة لي معروفا بيهم لوراس شطحا تاع شاوية تجي كي يتجمعو جماعا تاع رجال ولا نسا يتقابلو فاسافاس أو يقولو شعر ملحون معا لقصبة أو لبندير لي يلعبو ريتم شاوي لي معروف بيه قاع لغنا شاوي لفنلنين لي معروفين هوما : كاتشو ، حاميد بلباش ، حوريا عايشي ، نصردين حورا ، ماسينيسا ، حاسان دادي ، لي باربار ( قروب تاع روك شاوي ) ....

لموسيقا شعبيا لفلكلوريا

لْڨَصبة

ڨصبة بني صالح ، على لِيمنى لْڨَصبة.

لڨصبة زَمارة ما تَتَلْعبش كيما لْفلوت لڨصبة كيلعبوها و ينفخو فيها جِي مايلة لِيلعب بها لاَزم يتريني عليها و لازم يلقى سونْ باش يبدا ريبَارتْوار تَاعو . سونْ تاعها يجي مَبْحوح وعندو فيبْراسيو كيما صوت تاع ريح من جهة لْغرب ( لْغزوات وهرن عين تموشنت ايت سنوس) كاين تامجا وهي ڨصبة جي طوبلة يْوالَمْها رَڨْص تاع لحرب و مامْ فِ وقتنا لْفنانين ليغنو رّاي لْقديم توالمهم لبلدان شاوية ولا دولة نوميدية تاع بكري (من عنابة لبسكرة حتى لباتنة سطيف وڨالمة ) بداو يخدمو لڨصبة مع وحد لمغنيين و مغنيات لداروها ف لموسيقى اليكتروتية و صنعو غنا شاوي جديد لجاي كونتر لَسْتيل تاع شاوي لقديم . تاكسبت واحد مل فنانين تاع اسَالَْن نقصدو بهم ب لْقبايلية لاَخْبَار وليعيطولهم رَّحابة ب دّارجة لْجازايرية ول اسالن هاد لغنا يرڨصو عليه قروب تاع نسا ولا رجال ولي فيه لَلْحان لقبايلية و شاوية لْمنوّعة ف لصوات تاوعها جايا متّاريخ تاع لاَوْراس و ثّقافة شاوية.

لفريكات

لفريكات بلمعنا تاعها كي نقولو( لفوقارا) وهي نوع ملموسيقا يغنوها نسا فيما بينالتهم فلعراس يغنو فيها لمدايح أو لقصايد دينية . هاد لموسيقا بداها لحاج ناصر وختو (زهور) لي كانو هوما لولين لي بداو هاد ستيل تاع لمدايح لي داوه من عند باباهم ليكان شونتور وشاعر ديني ملخاوة تاع لعيساوا.

لعلاوي

لعلاوي هي موسيقا تقليديا حربيا جايا معلالي تاع وهرن ، نلقاوها في وهرن ، تلمسان ، ندروما ، مغنيا ، لغزوات طورت ف لمروك هاذ لموسيقا هي شطحة حربية قديمة بلكتاف أو ريتم تاع لعلاوي ، هاد ستيل بدا فلعلالي تاع وهران. ، لباحث لجزايري يازلي بن عمار بين بلي لكما تاع لعلاوي ( ماكان ما دخلها معا لعايلة تاع لعلاويين ) جاية منواحد لعايلا ملعرب لإدرسيين بعدما طاحت لمملكة تاع فاس ، أو لازم ما نخلطوش بين هاد لستيل أو ستيل تاع رقادة ولا شطيح تاع لبربر تاع ل رياف لخاطكش يتشابهو بصح ماشي كيفكيف.

زرنة

زرنة ولا الصرناية هي الة موسيقيةهوائية ينسفو فيها باش تخرج منها موسيقى وهي تاع لوح , كاينة ويستعملوهابزاف بلدان كيما شمال العراق , تركيا سوريا وايران , هي موسيقا كانو يلعبوها بكري فلمدينات لي كان لستعمار غالق عليهم كيما لبليدة ، لدزاير ، بجايا أو لقليعا فلقرن سطاعش ، أو كانو يديرو هاد لموسيقا باش يحتفلو بلعياد دينيا لخاطكش تبقا تبع لغنا تاع شعبي...

لموسيقا سطايفيا

لْموسيقى سْطايفيَّا هيّا لموسيقى تَّاليا تاع لْحفَالي فَلْجازاير تْجِي مورَا رّاي ومَمْبعد يْجيِ موراهَا لْقْبايلية و شّاوية ، تْبَازي على ريتم زنداني لي لأصل تّاعو مَقسنطينة ، هاد لْموسيقى نصيبوها فْ كامل لْحفَالي فَلجازاير مَلْمُغنيّين تَاوَعْها شّاب خلاص ،شّاب سمير، بخاشي لخير .

لموسيقا تَرڨية ولأَهَليل

عثمان بالي( 1953 2005 ) ، مغني لغنية تَرڨية

سْتِيل قديم تاع موسيفى يْعَبّْرو بيه ب ترڨية وَلاَّ بَ دَّارْجة لْجازايرية هاد لموسيفى مْٱَثَّر عليها تِينْدي(نوع تاع موسيقى فَ لجنوب لجازايري) و لٱَهَاليل تاع تيميمون. ف ڨورَارا لٱَهَاليل ما زال يخدموه سورتو فَ لْحْفالي تاع دِّين ، هاد نوع تاع لْغْنا باش يِدِيروه لازم يكون ڨروب تاع رجال ولاّّ نْسا يرڨصو وْ حَتّ ليسمع و يشوف لازم يْبارتيسِيبي فيه، شَّاف تاع لْڨْروب يَبْدا يلعب بَ لْجُوق وْ مَمْبعد يَلْحڨُو عْليه بَ طَمْبور ولْڨَلاّل و تّامجة وْ مَْمبعد يْجُو زوج يرڨصو ڨُدّام شّاف تاع لْڨْروب لِيَلعب ب َلجوق. لِيَرڨصو على هاد لغنا يديرو دَوِّيرَة و لازم لْكْتَف حْذا لْكْتَف و لازم يَتْحَرّْكو فِ جِهة وَحْدا وَ تَصْفَاڨ يْكون مْعاكس عْڨارب سَّاعة ولازم يرڨصو على حساب نَّغْمة تاع لموسيقى لٍيصنعها لڨروب. ف 2008 ل يونيسكو دارَتْ أهاليل ڨورارا فَ لِّيسْتا لِّي تّْمَثَّل تُّراث ثَّقافي تاع لْإنسان.

ديوان ڨناوا لجزايري

حميد بارودي

لڤناوي تاع دزاير

موسيقى ترقية ولا موسيقى قناوة هو نوع تاع موسيقى تخص اصحاب الجنوب لجزائري مع زيادة لغة لعربية ,وهذا لغنا جابو سلالة تاع حكام لمغرب لعربي هن افريقيا للجزاير , لموسيقى التندية تتاثر بالموسيقى التيندي الي يستعملوه في اقصى الجنوب الجزايري ,وتيميمون لمعروفة بقورارة و الواحة لحمراء بالاهاليل وهذا النوع من لموسيقى كاين في تونس , مصر, ليبيا. هاد لموسيقى يْسُموّها ديوان ڨْنَاوا باش يْفَرْْقو بِينْها وبين ل ڨناوا تاع لْمرُّوك سْتَمْبْلي تاع تونس. ف 2006 ، سُلطة تاع ثّقافة بغات تْرَجَع هاد لموسيقى لجازايرية وْ فِ عامين دارت مهرجان سْبيسيال لِيها. ليوم بانت هاد لموسيقى فَ سَّاحة لْفَنِّيَة و بْدَاوْ لِّي ڨْروب وْ فَنَانين يَخَدموها ٱَو وَلاَّّت عَنْدْهم لْخِبرة فْهاد لْموسيقى ، مَلِّي ڨْروب كاين ديوان بشار ،كريم زياد لِّي عاونو وحد لْباحثة يْسُموّها زينب مجدولي و دارو لكلمة لي يْسُموّها ڨْناوا.

لموسيقا شرقيا

وردة لجازايرية (1939-2012)مغنية تاع لغنية لعربية.

وردا لجازايريا مُغنيا جازايرية تاع لْغًنية لْعربية لْكلاسيكيا تَنْعد كيما ام كلثوم وصباح وفيروز. هاد لْمُغنية خَرّجت كْثَر من 300 ألبوم فَلْبارْكُورْ تاعها وتْبَاعو لْمْلايِين تاع لألبومات و ماشي غير هي كاين بزاف فنانين وخداخرين معروفين فَستيل شرقي.

لموسيقا تاع ضرك

لْموسيقى تاع ضُرْك بدات فْلَعوام تاع سبعينات أُو لموسيقى لجازايرية تنوّعت وُولاّت متْعَلْقة بثقافة تاع لُوروب شارل ازنافور، ام كلثوم ، فريد الاطرش ، جيمي هندريكس، بيتلز و وَخْداخرين كيما مايكل جاكسون ومادونا لّي أثّْرو على بزاف فنانين جَازايريِين و خلاّوْهم يْديرو ستيل تاع موسيقى منوّع جا مَلُوروب ولمشرق لعربي بثقافة جازايرية على هادا خرجو نواع تاع روك و رّيقي و راب ف لْجازاير.

لْجَاز لجزايري

مَنْ لْمُغَنْيّين تاع لْجَاز لْجازايري كايَن صافي بوتلة ( سورْتو لاَلْبوم تاعو لِيسمّوه لْمَجنون ولي انْتاقدوه بزاف فْ 1992 ) امينوس ، سينوج، مدار ، عزدين طبيبل، حفيظ ،اناس مزيا ، كريم زياد ، عمار ساندي أو ماليك حنوش. َ

لنواع تاع لموسيقا لڨاورية

مَلْمغنيّين لّي معروفين بيها كاين بعزيز ترييانا دالجي ، محمد رضا ، جيمي وحيد ، حميدو ، سعاد ماسي ، زاكي علال ، أمال براهيم-جلول

روك لجزايري

ڤروب تاع روك جازايري .

فلعوام تاع ستينات لقروب ألجيرز و شاف تاعو محفوظ حاج حمو بان فساحة لفنية بلموسيقى جديدا ، رشيد بحري هوا لي زاد للقروب ساكسوفون فسبعينات بداو لي توركيش بلاند قروب تاع بوب أو روك لي داوره ياسين أو ماليك فلكارطي تاع سانتوجان فدزاير نشهرو فلجازاير أو مام في فرانسا كانو متأثرين بالموسيقات تاع بينك فلويد(Pink Floyd) أو رولينق ستونز (Rolling Stones ) أو تاني لغنا تاع جوني هاليداي أو هاكدا روك بدا فلجازاير فلخر تاع لسبعينات قروب واحداخر معروف بزاف هوا تي 34 لي سماوه على لشومبرا وين كانو يربيتيو فيها لي جاية فلباطيمة تي الشومبرة نيميرو 34 تاع لإقامة لجامعية تاع بن عكنون ف دزاير . لغنا تاع روك ف لجازاير بينت بزاف فنانين كيما موح كاجي 2 ، جيمي وحيدي لي زاد دخل فلموسيقات اعو شويا عفايس تاع لبلوز أو ريقي ، هاذ لي قروب كانو يخرجو أو يبانو ملإقامات تاع لجامعات .

لي زارتيست لي معروفين بلغنا تاع روك : لي زابرانيس ، لي باربار ( قروب تاع موسيقا شاويا )، شيخ سيدي بيمول ، حاميد بارودي ، دزاير ، أنداكس ، جمال لعروسي ، جيمي وحيدي ، قود نويس ، موح كاجي دو ، قروب تي 34 ، موح ديناميت ، فريد لو روكور ، بلا ما ننساو لقروب تاع راينا راي دوريجين مسيدي بلعباس لي دارو لغنيا لمشهورة يا زينا ، رشيد طاها ليدوريجين من وهرن فنان فراكو ألجيريان لي راه ف فرانسا . وين خادم لموسيقا تاعو مشعبي ن راي ، تيكنو ، روك أندرول و لفانك

فلبدية تاع تسعينات بدا يطفا أو بداو ينساوه لخاطرش لي ميديا ما يفوتوهش أو ماعلابالهومش بليزارتيست تاع روك بصح هاذي ماخلاتش لي جان ينساوه أو مام هكذا بانو لي قروب جدد كيما لي جينز أو هتلرز سكيلترز
لطفي عطار هو لفوندور تاع لقروب رايناراي قيتاريست لي ولا هوا لقيتاؤيست لمشهور فلجازاير أو مام فلخارج ، لموسيقات اعو متأثرة بلعلاوي ، ديوان ،قناوا ، شعبي ، روك ، لبلوز ولجاز.

رشيد طه.

بعزيز.

لطفي عطار.

رَّاڀ لجزايري

رَّاب لْجازايري بْدَا فَلـْ 1980 ، بداو يغنوه فْلعوام تْوالاَ تاع تسعينات ، يَتْمِيِز بَستيل لْماريكاني أو ستيل تاع فرانسا وزاد فَلْ جازاير فلـ 1985 وين بانت لْغُنيا لَّوْلاَ تاعْ حميدو جَوْلا فَلِّيل ، لّي تأثرت بَسْتيل تاع لْماريكان و فَتْحَتْ بزّاف لِي ڨْروڀ فلجازاير فَلـْ 1980 ، ذاك لوقت كان حاما أو أنتيك بصح بْريزَاوْهًمْ لاَخاطرش ماكَنْتش كَاينا ثقا بينهم وبين لْمًخرجين ولْمُشرفين .
راب لمخير بدا فلـ 1990 فرّاديو و تلفزيون تاع جازاير خرجو شوية غنيات تاع رَّاب أو بانو بزاف مغنيين تاع رَّاب ف وهرّن ( توكس ، تاليسمو ، فيكسيت ... )أو عنّابا .
لغنيا لَوْلا تاع رَّاب خرجوها في فرانسا لي يْسُمُّوها دْزاير رّاب أو هاذا لي خلاَّ واحْد لي ڤروڀ يخرّْجوا لْغْنا تاعهم فَل خارج وَلِّي هوما أم بي سي أو أنتيك بصح ما نَجْحُوشْ لَخاطكس لِّي يسمعوا ما كانوش يَفَّهمُو واش كانو يْڤُولو ( دَّارجا لجازايريا ) .
و فل جازاير بان واحد لْمُغني يسموه لطفي دوبل كانون ( لي كان فَلڤروٻ تاع دوبل كانون ) ، أو ليوم رّاب فَلْ جازاير ( كيما رّوك ) راه جَاب بْلاَصْتو أو بْدَات صّحافة تَهْدَرْ عليه وبداو يْخرّْجو مَنُّو بزاف .

صوالح تاع لموسيقى

فون

• ناي
• لڤصبة
• زورنة
• شكوى
• لغايطة
• دربوكة

كورد

• ڤامبري
• ماندور
• لعود
• فيولو
• لبانجو
• لڤيتارة
• عوداندلسي
• ايمزاد.