Wn/shn/ၸွမ်ၽွင်းလူင် သုၺ်ႇတိၼ်ႇ လႄႈ ႁၢင်ႇၵေႇရီႇ ဢုပ်ႇဢူဝ်း တႃႇၶဝ်ႈပဵၼ်လုၵ်ႈၸုမ်း NATO

ဝၼ်းပုတ်ႉ၊ ၸၼ်ႇဝႃႇရီႇ 31၊ 2024 

ပလိၼ်ႇၵႅၼ်ႇ ႁူပ်ႉထူပ်းၵၼ်တင်း Jens Stoltenberg (ၶႅပ်းႁၢင်ႈၵဝ်ႇ)

ပေႃးဝၼ်းၽတ်းတေမႃး တီႈပၢင်ၵုမ်ထႅၼ်ႈ ၸုမ်းၽွမ်ႉႁူပ်ႉယူးရူပ်ႉၼၼ်ႉ ၸွမ်ၽွင်းလူင်ႁၢင်ႇၵေႇရီႇ လႄႈ ၸွမ်ၽွင်းလူင်သုၺ်ႇတိၼ်ႇၶဝ် တေဢုပ်ႇဢူဝ်းမွၵ်ႇၶၢင်ႈ ဢၼ်ၵဵဝ်ႇၵပ်း လွင်ႈမိူင်းသုၺ်ႇတိၼ်ႇ တေႇၶဝ်ႈၼႂ်းၸုမ်း ၼေႇတူဝ်း ၸုမ်းသိုၵ်းဢူၺ်းလိၼ် ဢတ်ႉလႅၼ်းတိၵ်ႉပွတ်းႁွင်ႇ ၼၼ်ႉယဝ်ႉ။ တွၼ်ႈတႃႇပဵၼ် လုၵ်ႈၸုမ်းၼေႇတူဝ်းၼႆႉ လူဝ်ႇလႆႈ ၶေႃႈၽွမ်ႉၸႂ် ၸိူဝ်းပဵၼ်လုၵ်ႈၸုမ်းတင်းသဵင်ႈၼၼ်ႉယဝ်ႉ။

ၵိုတ်းမိူင်းႁၢင်ႇၵေႇရီႇ ၵူၺ်း ဢၼ်ပႆႇပၼ်ၶေႃႈၽွမ်ႉၸႂ် ၼိူဝ် ၶေႃႈဢၼ်သုၺ်ႇတိၼ်ႇ ယွၼ်းၶဝ်ႈၸုမ်းၼၼ်ႉယဝ်ႉ။ ဝၢႆးသေ ရတ်ႈသျႃး ၶဝ်ႈတိုၵ်းမိူင်းယူႇၶရဵၼ်ႈယဝ်ႉ ႁိုင်သၢမ်လိူၼ် ဢၼ်ပဵၼ် မိူင်းသုၺ်ႇတိၼ်ႇ လႄႈ မိူင်းၾိၼ်ႇလႅၼ်ႇၶဝ် လႆႈတၢင်ႇ တႃႇၶဝ်ႈၸုမ်း ၼေႇတူဝ်းသေ ၸိူဝ်းပဵၼ် ဢမၢတ်ႈပႃႇတီႇၵမ်ဢႃႇၼႃႇဝႆႉၼၼ်ႉ ၶဝ်လႆႈယိုတ်းၶၢဝ်းယၢမ်း ပၼ်ၵၢင်ၸႂ် တႃႇသုၺ်ႇတိၼ်ႇ ပဵၼ်လုၵ်ႈၸုမ်းမႃးၼၼ်ႉယဝ်ႉ။

မိူဝ်ႈဝူင်ႈပူၼ်ႉမႃးၼၼ်ႉ ၸွမ်ၽွင်းလူင်ႁၢင်ႇၵေႇရီႇ ဝိတ်ႇတႃႇဢေႃပၢၼ်း လၢတ်ႈဝႃႈ တႃႇ မိူင်းသုၺ်ႇတိၼ်ႇ တေၶဝ်ႈၼႂ်းၸုမ်းၼေႇတူဝ်းၼၼ်ႉ မၼ်းၵမ်ႉထႅမ်ၸွမ်းယူႇ၊ ပေႃးဝႃႈ သၽႃးၶိုၼ်းတႄႇ ၼႂ်းၵၢင်လိူၼ်ၾႅပ်ႇဝႃႇရီႇၼၼ်ႉ မၼ်းတေလၢတ်ႈ ဢမၢတ်ႈတီႈပႃႇတီႇမၼ်း တႃႇပၼ်ၵၢင်ၸႂ် ဝႃႈၼႆယဝ်ႉ။ ၵူၺ်းၵႃႈဝႃႈ ၽူႈၼမ်းသၽႃး Laszlo Kover မွၵ်ႇလၢတ်ႈဝႃႈတႄႉ တွၼ်ႈတႃႇသုၺ်ႇတိၼ်ႇ တေၶဝ်ႈပဵၼ်ၼႂ်းၸုမ်း ၼေႇတူဝ်းၼၼ်ႉ ဢမ်ႇမီးဝႆႉလွင်ႈတၢင်း တႃႇႁဵတ်းႁိပ်ႈၼႅတ်ႈသင် လႄႈ မၼ်းႁၼ်ထိုင်ဝႃႈ တီႈပၢင်ၵုမ်ၽႄ ၽၢႆႁႅင်းသၢၼ်ၶတ်းၶဝ် တေၸၢင်ႈၶတ်းၸႂ် ယႃႇႁႂ်ႈမၼ်းပဵၼ်မႃး ဝႃႈၼႆယဝ်ႉ။ တီႈပၢင်ၸႅင်ႈၶၢဝ်ႇ ဢၼ်ႁဵတ်းမိူဝ်ႈဝၼ်းၸၼ်ၼၼ်ႉ ဢၼ်ပဵၼ် ၽွင်းလူင်ၵၢၼ်ၼွၵ်ႈမိူင်း ဢၼ်ႇထေႃႇၼီႇပလိၼ်ၵၼ်ႇ ဢၼ်ဢုပ်ႇဢူဝ်းၵၼ်တင်း ၸွမ်ၽူႈၼမ်းၼႂ်းၼေႇတူဝ်းၼၼၼ်ႉ မၼ်းလႆႈတိုၵ်းသူၼ်းႁၼ်ႇၵေႇရီႇ ၵဵဝ်ႇၵပ်းသုၺ်ႇတိၼ်ႇ ၶဝ်ႈၼႂ်းၸုမ်းၼေႇတူဝ်းၼၼ်ႉ ႁႂ်ႈၸတ်းၵၢၼ်ဝႆးဝႆး ၼႆယဝ်ႉ။ မၼ်းၵေႃႈ လႆႈမုင်ႈမွင်းဝႆႉဝႃႈ ပေႃးသၽႃးႁၢင်ႇၵေႇရီႇ ၶိုၼ်းတႄႇၼႆ လွင်ႈၼႆႉၵေႃႈ တေပဵၼ်မႃးယူႇ ၼႆယဝ်ႉ။

ငိူၼ်ႈငဝ်ႈတိုၼ်း

• VOA. "NATO အဖွဲ့ဝင်ဖြစ်ရေး ဆွီဒင်နဲ့ ဟန်ဂေရီ ဝန်ကြီးချုပ်နှစ်ဦးဆွေးနွေး" — VOA, January 31, 2024

• Boldizsar Gyori. "Hungarian opposition seeks extraordinary session of parliament on Sweden NATO bid" — Reuters, January 29, 2024