Wn/shn/ယူႇၶရဵၼ်း လႄႈ NATO ပၢၵ်ႈပႅတ်ႈ ၶေႃႈၵႂၢႆႇၵႂၢမ်းၵိုတ်းတိုၵ်း ပူႇထိၼ်ႇ
ဝၼ်းဢႃးတိတ်ႉ၊ ၸုၼ်ႇ 16၊ 2024
.jpg)
ဢမႄႇရိၵၢၼ်ႇ၊ ယူႇၶရဵၼ်း လႄႈ ၸုမ်း NATO ၶဝ် ပၢၵ်ႈပႅတ်ႈ လွင်ႈၵၢႆႇၵႂၢမ်းၵိုတ်းတိုၵ်းယူႇၶရဵၼ်း ဢၼ်ပူႇထိၼ်ႇ လၢတ်ႈဝႃႈ သင်ၸိူဝ်ႉ တပ်ႉယူႇၶရဵၼ်းၶဝ် ထွၼ်ပၼ်တီႈ ထုင်ႉဢၼ်ပိုၼ်ၽၢဝ်ႇဝႃႈ ပဵၼ်ၶွင်ရတ်ႈသျႃး လႄႈ သင်ယူႇၶရဵၼ်း ၵိုတ်း လွင်ႈႁဵတ်းသၢင်ႈ တႃႇၶဝ်ႈၼႂ်းၸုမ်းဢူၺ်းလီ NATO ၼၼ်ႉၸိုင် မၼ်းတေၵိုတ်း လွင်ႈၶဝ်ႈတိုၵ်းယူႇၶရဵၼ်းၼၼ်ႉ ၵမ်းလဵဝ် ဢၼ်ဝႃႈၼၼ်ႉယဝ်ႉ။
ၽွင်းလူင်ၵၢၼ်ၵႅတ်ႇၵင်ႈ ဢမႄႇရိၵၢၼ်ႇ Llyod Austin မွၵ်ႇလၢတ်ႈတီႈ ဝၢႆးပၢင်ၵုမ် NATO ယဝ်ႉ တီႈ ပရႅတ်ႉသႄးလ်ၼၼ်ႉဝႃႈ ၸဝ်ႈၸွမ်ၸိုင်ႈပူႇထိၼ်ႇၼႆႉ မၼ်းလႆႈၶဝ်ႈတိုၵ်းသိမ်းဢဝ် ၼႃႈလိၼ်ယူႇၶရဵၼ်း ဢမ်ႇမႅၼ်ႈၸွမ်းၽိင်ႈမၼ်းလႄႈ မၼ်းဢမ်ႇမီးသုၼ်ႇ တႃႇၸီႉသင်လၢတ်ႈၼိူဝ် ယူႇၶရဵၼ်းဝႃႈ ၵပ်းၵၢႆႇလူၺ်ႈ လွင်ႈငမ်းယဵၼ်သေ တေ လႆႈႁဵတ်းႁိုဝ်ႁဵတ်းသင်ဢၼ်ဝႃႈၼၼ်ႉ ဝႃႈၼႆယဝ်ႉ။ မၼ်းၸၢင်ႈၵိုတ်းလႆႈ သိုၵ်း ဝၼ်းမိူဝ်ႈၼႆႉသေ တင်းသဵင်ႈၵေႃႈလႆႈတိုၵ်းယွၼ်း ႁႂ်ႈၵိုတ်းတိုၵ်းသေ ဢွၵ်ႇၵႂႃႇတီႈၼႂ်း ၼႃႈလိၼ်ယူႇၶရဵၼ်း ဝႃႈၼႆယဝ်ႉ။
ၸဝ်ႈၸွမ်ၸိုင်ႈရတ်ႈသျႃး ပူႇထိၼ်ႇ မွၵ်ႇလတ်ႈ ဝၼ်းလူင်ႈၼႃႈ ပၢင်ၵုမ်ငမ်းယဵၼ်ယူႇၶရဵၼ်း ဢၼ်ၸတ်းႁဵတ်းတီႈ မိူင်းသဝိတ်ႉၸႃႇလႅၼ်ႇၼၼ်ႉဝႃႈ သင်ၸိူဝ်ႉ ထွႆပၼ်တပ်ႉယူႇၶရဵၼ်း တီႈထုင်ႉ ပွတ်းဢွၵ်ႇ လႄႈ ပွတ်းတူၵ်း ယူႇၶရဵၼ်းသေ ယွၼ်းသုမ်းၵွၼ်ႇ ၽၢႆႇရတ်ႈသျႃး ၸင်ႇၵွႆႈၵိုတ်း လွင်ႈတိုၵ်းတေႃး ဝႃႈၼႆယဝ်ႉ။ လိူဝ်သေ ၼၼ်ႉဢမ်ႇၵႃး လႆႈတုၵ်းယွၼ်းပႃးဝႃႈ ၶရၢႆးမီးယႃး ဢၼ်ရတ်ႈသျႃးသိမ်းဢဝ် ၸဵမ်မိူဝ်ႈပီ 2014 ၼၼ်ႉ ႁႂ်ႈမၵ်းမၼ်ႈယိုၼ်ႁပ်ႉပၼ်ဝႃႈ ပဵၼ်ၶွင်ရတ်ႈသျႃးၼႆသေ လႆႈတုၵ်းယွၼ်း ယႃႇႁႂ်ႈ ယူႇၶရဵၼ်းၶဝ် ၼႂ်းၸုမ်း NATO ၼႆယဝ်ႉ။
ၸဝ်ႈၸွမ်ၸိုင်ႈယူႇၶရဵၼ်း ဝေႃႇလေႃႇတီးမႃးရ် ၸႄးလႅၼ်းသၵီး ၵေႃႈ လၢတ်ႈဝႃႈ လွင်ႈၵၢႆႇၵႂၢမ်းၵိုတ်းတိုၵ်း ၸဝ်ႈၸွမ်ၸိုင်ႈ ပူႇထိၼ်ႇၼႆႉ မၼ်းပဵၼ် လွင်ႈပၼ်ၶေႃႈပူင် ဢၼ်ဢမ်ႇလီယုမ်ႇယမ်ၼၼ်ႉယဝ်ႉဝႃႈၼႆ။ ၸဝ်ႈၸွမ်ၸိုင်ႈယူႇၶရဵၼ်း ဢၼ်ႁွတ်ႈၽႅဝ် ဢီႇတႃႇလီႇ တႃႇၶိုၼ်ႈႁွတ်ႈ ပၢင်ၵုမ် G7 ၼၼ်ႉ မၼ်းလၢတ်ႈဝႃႈ ၸိူဝ်သေၼၼ်ႉဢမ်ႇၵႃး ႁူမ်ႈဝႃႈ မၼ်းလႆႈၵႂႃႇ ၸိူဝ်းဢၼ်မၼ်းတုၵ်းယွၼ်းဝႆႉၼၼ်ႉယဝ်ႉၵေႃႈ မၼ်းတေ ဢမ်ႇၵိုတ်းလွင်ႈတိုၵ်းတေႃးယူႇၶရဵၼ်းဝႃႈၼႆယဝ်ႉ။ ၽူႈပၼ်တၢင်းၶႆႈၸႂ် ၸဝ်ႈၸွမ်ၸိုင်ႈယူႇၶရဵၼ်း Mykhailo Podolyak ၵေႃႈလၢတ်ႈဝႃႈ လွင်ႈၵၢႆႇၵႂၢမ်း ၸဝ်ႈၸွမ်ၸိုင်ႈရတ်ႈသျႃးၼႆႉ မၼ်းဢမ်ႇမီးတီႈပွင်ႇ ဝႃႈၼႆယဝ်ႉ။
ငိူၼ်ႈငဝ်ႈတိုၼ်း
- Dasha Litvinova. "Putin offers truce if Ukraine exits Russian-claimed areas and drops NATO bid. Kyiv rejects it" — AP News, JUNE 15, 2024
- Vladimir Soldatkin. "Putin demands more Ukrainian land to end war; Kyiv rejects 'ultimatum'" — Reuters, JUNE 15, 2024
- AFP - Agence France Presse. "US, NATO Slam Putin's Ukraine Peace Demands" — Barron's, JUNE 14, 2024
- Yash Roy. "Ukraine rejects Putin’s cease-fire proposal of ceding land on eve of peace summit" — The Hill, JUNE 14, 2024
