Jump to content

Wn/shn/ယူႇၶရဵၼ်း ပိုၼ်ၽၢဝ်ႇဝႃႈ ၶဝ်ၵုမ်းၵမ်လႆႈ ဝဵင်းသုတ်ႉၸႃႇ ဢၼ်ပဵၼ်ၶွင်ရသျႃးၼၼ်ႉယဝ်ႉ

Add links
From Wikimedia Incubator
< Wn | shn
Wn > shn > ယူႇၶရဵၼ်း ပိုၼ်ၽၢဝ်ႇဝႃႈ ၶဝ်ၵုမ်းၵမ်လႆႈ ဝဵင်းသုတ်ႉၸႃႇ ဢၼ်ပဵၼ်ၶွင်ရသျႃးၼၼ်ႉယဝ်ႉ

ဝၼ်းသုၵ်း၊ ဢေႃးၵၢတ်ႉ 16၊ 2024

လိၵ်ႈႁွမ်တွမ် ၸိူဝ်းၵဵဝ်ႇၵပ်း
ဢွင်ႈတီႈ မိူင်းရတ်ႈသျႃး
ႁူမ်ႈသၢင်ႈ!
Wn/shn/ရတ်ႈသျႃး
Wn/shn/ရတ်ႈသျႃး
ဝဵင်းၸုတ်ႉၸႃႇ၊ မိူင်းရတ်ႈသျႃး

မိူဝ်ႈဝၼ်းၽတ်းၼၼ်ႉ မိူင်းယူႇၶရဵၼ်း ပိုၼ်ၽၢဝ်ႇဝႃႈ တပ်ႉသိုၵ်းယူႇၶရဵၼ်း ဢၼ်ၶဝ်ႈတိုၵ်း ၼႃႈလိၼ် ရတ်ႈသျႃးၼၼ်ႉ လႆႈၵုမ်းၵမ် ဝဵင်းသုတ်ႉၸႃႇ ဢၼ်ပဵၼ်ဝဵင်းယႂ်ႇသုတ်း ၼႂ်းပိုၼ်ႉတီႈ ၶိူတ်ႉသ် မိူင်းရတ်ႈသျႃးၼၼ်ႉ တင်းမူတ်းယဝ်ႉ ဝႃႈၼႆ။

ၸွမ်ပွင်ၸိုင်ႈ မိူင်းယူႇၶရဵၼ်း ဝေႃႇလေႃႇတီးမႃးရ် ၸႄးလႅၼ်းသၵီး ပိုၼ်ၽႄၼိူဝ် ဢၵွင်ႉသိုဝ်ႇတူင်ႇဝူင်းၵူၼ်း X မၼ်းဝႃႈ ၽူႈၵွၼ်းသိုၵ်း မိူင်းယူႇၶရဵၼ်း ဢူဝ်ႇလႅၵ်ႉသၼ်ႇတႃႇ သျိတ်ႉသၵီႇ ပၼ်ၶၢဝ်ႇဝႃႈ ဝဵင်းသုတ်ႉၸႃႇ လႆႈလွတ်ႈဢွၵ်ႇ တီႈတပ်ႉသိုၵ်းရတ်ႈသျႃးယဝ်ႉၼႆယဝ်ႉ။ လိူဝ်ၼၼ်ႉ လၢတ်ႈပႃးဝႃႈ တီႈဝဵင်းၼၼ်ႉ ပိုတ်ႇဝႆႉ လုမ်းၵုမ်းၵမ်သိုၵ်း ယူႇၶရဵၼ်း ၼႆယဝ်ႉ။

ဝဵင်းသုတ်ႉၸႃႇ ဢၼ်မီးၵူၼ်းယူႇမွၵ်ႈ 5,000 ၵေႃႉၼၼ်ႉ မီးဝႆႉၼႂ်းၼႃႈလိၼ် ရတ်ႈသျႃး ဢၼ်ယၢၼ်ၵႆလႅၼ်လိၼ် ယူႇၶရဵၼ်း မွၵ်ႈ 6 လၵ်းၼၼ်ႉယဝ်ႉ။ လိူဝ်ၼၼ်ႉ မၼ်းလၢတ်ႈဝႃႈ ၼႃႈလိၼ် ရတ်ႈသျႃး 450 လွၵ်းလၵ်းၼၼ်ႉ သိုၵ်းယူႇၶရဵၼ်းၶဝ် ၵုမ်းၵမ်လႆႈ ၼႂ်းၶၢဝ်းတၢင်း 10 ဝၼ်း ၼႆယဝ်ႉ။ ပိုၼ်ႉတီႈၼႆႉ ပဵၼ်တီႈ သၢႆၼမ်ႉမၼ်း လႄႈ လွတ်ႇၵႅတ်ႉသ် ဢၼ်တေႃႉသူင်ႇၸူး မိူင်းယူးရူပ်ႉသေ တႄႇဢဝ် မိူဝ်ႈတႄႇပၢင်တိုၵ်း တေႃႇထိုင် လႆႈသိမ်းဢဝ် ဝဵင်းၼႆႉၼၼ်ႉ ဢမ်ႇမီးလွင်ႈတုမ်ႉတိူဝ်ႉသင် ၼိူဝ်လွင်ႈသူင်ႇၵႅတ်ႉသ် ၵႂႃႇမိူင်းယူးရူပ်ႉ ဝႃႈၼႆ။ ၵဵဝ်ႇလူၺ်ႈၶေႃႈပိုၼ်ၽၢဝ်ႇ ၸွမ်ပွင်ၸိုင်ႈယူႇၶရဵၼ်းၼၼ်ႉ ၽၢႆႇရတ်ႈသျႃးၶဝ် ယင်းပႆႇတွပ်ႇလၢတ်ႈသင်။ ၵူၺ်းၵႃႈ မိူဝ်ႈၸဝ်ႉဝၼ်းၽတ်းၼၼ်ႉ ႁွင်ႈၵၢၼ်ၽၢႆႇၵႅတ်ႇၵင်ႈ လၢတ်ႈဝႃႈ တပ်ႉသိုၵ်းရတ်ႈသျႃးၶဝ် ႁႄႉႁၢမ်ႈ လွင်ႈဢၼ် ယူႇၶရဵၼ်း ၶတ်းၸႂ် တႃႇတေသိမ်းဢဝ် ၼႃႈလိၼ်တၢင်ႇတီႈၼၼ်ႉၼႆယဝ်ႉ။

တီႈၵၢၼ်တွင်ႈထၢမ် ၽိုၼ်ၶၢဝ်ႇ ဢိင်းၵလဵတ်ႈ The Independent ၼၼ်ႉ ၽူႈပၼ်တၢင်းႁၼ်ထိုင် ၸၼ်ႉသုင် ၸွမ်ၸိုင်ႈ မိူင်းယူႇၶရဵၼ်း လၢတ်ႈဝႃႈ လွင်ႈဢၼ် ယူႇၶရဵၼ်း ၶဝ်ႈတိုၵ်း ၼႃႈလိၼ် ရတ်ႈသျႃးၼၼ်ႉ ႁၼ်ထိုင်ဝႃႈ ပဵၼ်လွင်ႈ ႁဵတ်းသၢင်ႈ ပၢႆးၸႂ် တႃႇတေ တဵၵ်းႁႂ်ႈ ၸွမ်ပွင်ၸိုင်ႈ ရတ်ႈသျႃး မႃးဢုပ်ႇဢူဝ်း တႃႇတေ ၵိုတ်းယိုတ်း ပၢင်တိုၵ်း ယူႇၶရဵၼ်း-ရတ်ႈသျႃး ဝႃႈၼႆယဝ်ႉ။


ငိူၼ်ႈငဝ်ႈၶၢဝ်ႇ

Retrieved from "https://incubator.wikimedia.org/w/index.php?title=Wn/shn/ယူႇၶရဵၼ်း_ပိုၼ်ၽၢဝ်ႇဝႃႈ_ၶဝ်ၵုမ်းၵမ်လႆႈ_ဝဵင်းသုတ်ႉၸႃႇ_ဢၼ်ပဵၼ်ၶွင်ရသျႃးၼၼ်ႉယဝ်ႉ&oldid=6347222"