Jump to content

Wn/shn/NATO ၵမ်ႉထႅမ် မိူင်းဢူၺ်းလီ သုၼ်ႇပၼ်တၢင်းၸွႆႈထႅမ် တႃႇ သိုၵ်းၵႅတ်ႇၵင်ႈ ယူႇၶရဵၼ်း

Add links
From Wikimedia Incubator
< Wn‎ | shn
Wn > shn > NATO ၵမ်ႉထႅမ် မိူင်းဢူၺ်းလီ သုၼ်ႇပၼ်တၢင်းၸွႆႈထႅမ် တႃႇ သိုၵ်းၵႅတ်ႇၵင်ႈ ယူႇၶရဵၼ်း

ဝၼ်းသဝ်၊ ၸုၼ်ႇ 1၊ 2024

ၶၢဝ်ႇ ၸိူဝ်းၵဵဝ်ႇၵပ်း
ၼေႇတူဝ်း တီႈ ဝီႇၶီႇၶၢဝ်ႇ
ၸွႆႈသၢင်ႈ!
ၸဵၼ်းသတူဝ်းလ်ထႅၼ်းပၢၷ်ႉ ၸွမ်ၽူႈၼမ်းၼႂ်း ၸုမ်းဢူၺ်းလီၵၢၼ်သိုၵ်း ဢၵ်ႉလၼ်းတိၵ်ႉပွတ်းႁွင်ႇ (NATO)

ၸဵၼ်းသတူဝ်းလ်ထႅၼ်းပၢၷ်ႉ (Jens Stoltenberg) ဢၼ်ပဵၼ် ၸွမ်ၽူႈၼမ်းၼႂ်း ၸုမ်းဢူၺ်းလီၵၢၼ်သိုၵ်း ဢၵ်ႉလၼ်းတိၵ်ႉပွတ်းႁွင်ႇ (NATO) မွၵ်ႇလၢတ်ႈဝႃႈ မိူဝ်ႈဝၼ်းသုၵ်းၼၼ်ႉဝႃႈ လႆႈၸွႆႈထႅမ်ႁၼ်ထိုင်ၸွမ်းၼိူဝ် သုၼ်ႇၸွႆႈထႅမ် မိူင်းဢူၺ်းလီ ၸိူဝ်းဢၼ်ၸွႆႈထႅမ်ႈ ယူၶရဵၼ်း ဢၼ်တိုၵ်ႉၵႅတ်ႇၵင်ႈ ၽေး ရတ်ႈသျႃးယူႇၼၼ်ႉ ဝႃႈၼႆယဝ်ႉ။

ၼႂ်းၵႃႈၼၼ်ႉ ၶဝ်ႈပႃး လွင်ႈဢၼ်ပၼ်သုၼ်ႇယူႇၶရဵၼ်း တႃႇႁႂ်ႈဢဝ် ၶိူင်ႈလၢၵ်ႈၼၢၵ်ႈ ဢၼ် NATO ၶဝ် ၵမ်ႉထႅမ်ဝႆႉပၼ်ၼၼ်ႉ ပိုတ်းယိုဝ်းယိူင်းမၢႆ ၸိူဝ်းမီးတီႈၼႂ်းမိူင်းရတ်ႈသျႃးၼၼ်ႉၵေႃႈ ၶဝ်ႈပႃးဝႆႉယူႇယဝ်ႉ။ ဝၢႆးသေ ပၢင်ၵုမ် ၽွင်းလူင်ၵၢၼ်ၼွၵ်ႈမိူင်း NATO ဢၼ်ႁဵတ်းတီႈ ဝဵင်း ပရႂၷ်ႉၼၼ်ႉယဝ်ႉသေ ၸဵၼ်းသတူဝ်းလ်ထႅၼ်းပၢၷ်ႉ (Jens Stoltenberg) ၸင်ႇလႆႈပၼ်ၵႂၢမ်းမၢႆတီႈ ၽူႈဢဝ်ၶၢဝ်ႇၶဝ်ၼင်ႇၼၼ်ယဝ်ႉ။ ၵပ်းၵၢႆႇလူၺ်ႈ လွင်ႈလႅၵ်ႈလၢႆႈ လၵ်းၵၢၼ်ပေႃႇလသီႇ ဢၼ် ၸုမ်းဢူၺ်းလီၼေႇတူဝ် မိူၼ်ၼင်ႇ ဢႇမႄရိၵၢၼ်ႇ လႄႈ မိူင်းၵျႃႇမၼီႇၶဝ် ပၼ်သုၼ်ႇ တႃႇႁႂ်ႈၸႂ်ႉတိုဝ်း ၶိူင်ႈလၢၵ်ႈၼၢၵ်ႈၶဝ် တီႈ လွင်ႈၶိုၼ်းပိုတ်းယိုဝ်းၸူး တပ်ႉရတ်ႈသျႃး ဢၼ်ႁဵတ်းၶဵၼ်မႃးတေႃႇ ယူႇၶရဵၼ်း လႄႈသင် ၸိူဝ်းပဵၼ် တပ်ႉရတ်ႈသျႃး ၼႂ်းမိူင်းရတ်ႈသျႃး ၸိူဝ်းဢၼ်ႁၢင်ႈႁႅၼ်း တႃႇႁဵတ်းၶဵၼ်တေႃႇယူႇၶရဵၼ်းၼၼ်ႉလႄႈသင် ၼၼ်ႉသေ လုၵ်ႉတီႈ ၽူႈယႂ်ႇၼေႇတူဝ်း ၸင်ႇလႆႈမီး ၵႂၢမ်းမၢႆဢွၵ်ႇမႃးၼင်ႇၼႆယဝ်ႉ။

မိူဝ်ႈတွၼ်ႈၸဝ်ႈဝူင်ႈဝၢင်ႈၼႆႉၼၼ်ႉတႄႉ ၸဝ်ႈၸွမ်ၸိုင်ႈရတ်ႈသျႃး ဝလႃႇၻီႇမီႇရ်ပူႇထိၼ်ႇ လႆႈမၢပ်ႇလၢတ်ႈဝႃႈ လွင်ႈဢၼ် ၼေႇတူဝ်း လႄႈ ဢမႄႇရိၵၢၼ်ႇၶဝ် တိုၵ်ႉဝူၼ်ႉ တႃႇပိၼ်ႇလၢႆႈ ပေႃႇလသီႇၼႆႉ မၼ်းပဵၼ် တႃႇႁႂ်ႈယုၵ်ႉပၢင်တိုၵ်း ႁႂ်ႈႁၢဝ်ႈႁႅင်းမႃးသေ မၼ်းလႆႈပၼ်ၽၢင်ႉ ၽွၼ်းပၢင်ႈမၼ်းဝႆႉယဝ်ႉ။ ၵူၺ်းၵႃႈဝႃႈ သတူဝ်းလ်ထႅၼ်းပၢၷ်ႉ (Stoltenberg) လႆႈၶိုၼ်းတွပ်ႇလၢတ်ႈ မိူဝ်ႈဝၼ်းသုၵ်းၼၼ်ႉဝႃႈ “သုၼ်ႇၵႅတ်ႇၵင်ႈတူဝ် ဢၼ်ဝႃႈၼႆႉ မၼ်းဢမ်ႇၸႂ်ႈ လွင်ႈတၢင်ႇႁႅင်းၵၢၼ်သိုၵ်း“ ဝႃႈၼႆယဝ်ႉ။ “သုၼ်ႇၵႅတ်ႇၵင်ႈတူဝ်ဢၼ်ဝႃႈၼႆႉ မၼ်းပဵၼ်သုၼ်ႇပိုၼ်ႉထၢၼ်ဢၼ်ၼိုင်ႈ။ ယူႇၶရဵၼ်းၼႆႉ မၼ်းမီးပုၼ်ႈၽွၼ်း လႄႈ သုၼ်ႇ တႃႇၵႅတ်ႇၵင်ႈ တူဝ်ၸဝ်ႈၵဝ်ႇ လႄႈ ၶိူဝ်းၵူၼ်းမၼ်းသေ ႁဝ်းၶႃႈၵေႃႈ မီးသုၼ်ႇတႃႇၸွႆႈထႅမ်ၼိူဝ် သုၼ်ႇၵႅတ်ႇၵင်ႈတူဝ် ယူႇၶရဵၼ်းယူႇ“ ဝႃႈၼႆယဝ်ႉ။

သတူဝ်းလ်ထႅၼ်းပၢၷ်ႉ (Stoltenberg) ယိုၼ်ႁပ်ႉဝႃႈ ၵပ်းၵၢႆႇလွင်ႈၼႆႉသေ ၽၢႆႇရတ်ႈသျႃး တေဢမ်ႇလႆႈၸႂ် ၼႆယူႇ။ “ပူႇထိၼ်ႇၼႆႉ မၼ်းၶႂ်ႈႁႄႉႁၢမ်ၼိူဝ် လွင်ႈဢၼ် ၸုမ်းဢူၺ်းလီၼေႇတူဝ်း ၵမ်ႉထႅမ်ပၼ် ယူႇၶရဵၼ်းယူႇၼၼ်ႉယဝ်ႉ။ ၵူၺ်းၵႃႈဝႃႈ မၼ်းတေ ႁႄႉႁၢမ်ႈႁဝ်း ဢမ်ႇလႆႈ“ ဝႃႈၼႆယဝ်ႉ။

မိူဝ်ႈဝၼ်းၽတ်းၼၼ်ႉ ဢမႄႇရိၵၢၼ်ႇ လႆႈပၼ်ၶႂၢင်ႉ ယူႇၶရဵၼ်း တႃႇၸႂ်ႉၶိူင်ႈလၢၵ်ႈၼၢၵ်ႈ ဢၼ်ၶဝ်ၵမ်ႉထႅမ်ဝႆႉပၼ်ၼၼ်ႉသေ ပိုတ်းယိုဝ်း ယိူင်းမၢႆရတ်ႈသျႃးၼၼ်ႉယဝ်ႉ။ ၵူၺ်းၵႃႈဝႃႈ လွင်ႈၶႂၢင်းပၼ်ဢၼ်ၼႆႉၼႆႉ မၼ်းပဵၼ် တွၼ်ႈတႃႇၸႂ်ႉ တီႈ ပိုၼ်ႉတီး ၶႃၶိပ်ႉၾ်(Kharkiv) ဢၼ်လႅၼ်လိၼ် ဢိူမ်ႈၸပ်းၵၼ်တင်း ရတ်ႈသျႃးၼၼ်ႉၵူၺ်း။ လွင်ႈတႅပ်းတတ်းဢၼ်ၼႆႉ မၼ်းပဵၼ် လွင်ႈပိၼ်ႇလၢႆႈလူင်ဢၼ်ၼိုင်ႈ တီႈ ၵဵဝ်ႇၵပ်းလူၺ်ႈပေႃႇလသီႇၼၼ်ႉယဝ်ႉ။ ႁၢၼ်ႉတေႃႇထိုင်ယၢမ်းလဵဝ်တႄႉၸဝ်ႈၸွမ်ၸိုင်ႈဢမႄႇရိၵၢၼ်ႇ ၵျူဝ်းပၢႆႇတႅၼ်ႇ လႆႈထဵင်ဝႆႉ တႃႇၸႂ်ႉလၢၵ်ႈၼၢၵ်ႈဢမႄႇရိၵၢၼ်ႇသေ တိုၵ်းတေႃးၼႂ်း ၼႃႈလိၵ်ႈရတ်ႈသျႃး ၼၼ်ႉယဝ်ႉ။ ၽူႈမီးၸၼ်ႉဢမႄႇရိၵၢၼ်ႇၵေႃႉၼိုင်ႈ လၢတ်ႈဝႃႈတႄႉ ဢၼ်ပဵၼ်ပေႃႇလသီႇ ဢမႄႇရိၵၢၼ်ႇ ဢၼ်ဢမ်ႇပၼ်ၶႂၢင်ႉတႃႇၸႂ်ႉ ပိူင်မၢၵ်ႇမိသ်ႉသၢႆး ဢၼ်ယိုဝ်းတီႈၵႆ ဢၼ်ႁွင်ႉဝႃႈ ATACMS ၼၼ်ႉတႄႉ ဢမ်ႇမီးလွင်ႈလႅၵ်ႈလၢႆႈ ဝႃႈၼႆယဝ်ႉ။

ၽွင်းလူင် ၵၢၼ်ၼွၵ်ႈမိူင်း ဢမႄႇရိၵၢၼ်ႇ ဢႅၼ်ႇထူဝ်ႇၼီႇ ပလိၼ်ႇၵႅၼ်ႇ ၵေႃႈ ယိုၼ်ယၼ် ၽူႈဢဝ်ၶၢဝ်ႇၶဝ်ဝႆႉဝႃႈ မိူဝ်ႈဝူင်ႈပူၼ်ႉၼၼ်ႉ ယူႇၶရဵၼ်းၶဝ် လႆႈၶဝ်ႈၸမ်ၸူး ဢမႄႇရိၵၢၼ်ႇသေ လႆႈယွၼ်းၶႂၢင်ႉ တႃႇၸႂ်ႉၶိူင်ႈလၢၵ်ႈၼၢၵ်ႈဢမႄႇရိၵၢၼ်ႇ တီႈၵၢၼ်တိုၵ်းတေႃး တပ်ႉရတ်ႈသျႃး တီႈလႅၼ်လိၼ်ၶဝ်ၼၼ်ႉ ဝႃႈၼႆယဝ်ႉ။ လႆႈဢဝ် ၶေႃႈတုၵ်းယွၼ်းၼၼ်ႉ သူင်ႇထိုင် ၸဝ်ႈၸွမ်ၸိုင်ႈသေ ၸဝ်ႈၸွမ်ၸိုင်ႈပၢႆႇတႅၼ်ႇၵေႃႈ လႆႈယိုၼ်ယၼ်ပၼ်မႃးယဝ်ႉ ဝႃႈၼႆ။

ဝၢႆးသေ ဢမႄႇရိၵၢၼ်ႇ တႅပ်းတတ်းၼင်ႇၼၼ်ယဝ်ႉ မိူင်းၵျႃႇမၼီႇၵေႃႈ လႆႈပိုၼ်ၽၢဝ်ႇ မိူဝ်ႈဝၼ်းသုၵ်းၼၼ်ႉဝႃႈ ၶဝ်ပၼ်ၶႂၢင်ႉယူႇၶရဵၼ်း တႃႇဢဝ်ၶိူင်ႈလၢၵ်ႈၼၢၵ်ႈ ၸိူဝ်းၶဝ်ၵမ်ႉထႅမ်ဝႆႉပၼ်ၼၼ်ႉသေ ပိုတ်းယိုဝ်းၶိုၼ်း ရတ်ႈသျႃး လႆႈယူႇ ဢၼ်ဝႃႈၼၼ်ႉယဝ်ႉ။


ငိူၼ်ႈငဝ်ႈတိုၼ်း[edit | edit source]

Retrieved from "https://incubator.wikimedia.org/w/index.php?title=Wn/shn/NATO_ၵမ်ႉထႅမ်_မိူင်းဢူၺ်းလီ_သုၼ်ႇပၼ်တၢင်းၸွႆႈထႅမ်_တႃႇ_သိုၵ်းၵႅတ်ႇၵင်ႈ_ယူႇၶရဵၼ်း&oldid=6297168"