Wn/shn/ၵူၼ်းယိပ်းမိတ်ႈ ႁဵတ်းႁၢႆႉၵူၼ်း တီႈၵၢတ်ႇလူင် သိတ်ႉၼီႇ မိူင်းဢေႃႉသထရေးလီးယႃး

ဝၼ်းသဝ်၊ ဢေႇပရႄႇ 13၊ 2024 

ၵၢတ်ႇပွတ်ႇၼီႇ တီႈ ဝဵင်းလူင်သိတ်ႉၼီႇ မိူင်းဢေႃႉသထရေးလီးယႃး

မိူဝ်ႈဢေႇပရႄႇ 12 ၼၼ်ႉ ယွၼ်ႉပိူဝ်ႈ ၵူၼ်းယိပ်းမိတ်ႈၵေႃႉၼိုင်ႈ ၶဝ်ႈႁဵတ်းႁၢႆႉ တီႈၼႂ်း ၵၢတ်ႇၵူၼ်းၵိုၼ်းဢၼ်ၼိုင်ႈ ဢၼ်မီးတီႈ ဝဵင်းလူင်သိတ်ႉၼီႇၼၼ်ႉလႄႈ ၵူၼ်းလႆႈတၢႆၵႂႃႇႁူၵ်းၵေႃႉသေ လုၵ်ႈဢွၼ်ႇဢၼ်မီးဢႃႇယု ၵဝ်ႈလိူၼ် ၵေႃႉၼိုင်ႈလႄႈ ၵူၼ်းၵမ်ႈၽွင်ႈ လႆႈတၢင်းၸဵပ်းမၢတ်ႇၵႂႃႇၼႆ ပလိၵ်ႈဢေႃႉသထရေးလီးယႃး လႆႈမွၵ်ႇလၢတ်ႈဝႆႉဝႃႈၼၼ်။

ၵူၼ်းဢၼ်ဢမ်ႇပႆႇလႆႈႁူႉၸိုဝ်ႈမၼ်းၼၼ်ႉ ယိပ်းမိတ်ႈသေ လေႇႁႃႁဵတ်းႁၢႆႉၸူး ၵူၼ်းတင်းၼမ်လႄႈ ပလိၵ်ႈယိင်းၵေႃႉၼိုင်ႈ လႆႈယိုဝ်းတၢႆပႅတ်ႈ ၵူၼ်းယိပ်းမိတ်ႈၼၼ်ႉ တီႈၼၼ်ႈၵမ်းလဵဝ် ဝႃႈၼႆယဝ်ႉ။

လွင်ႈပဵၼ်ဢၼ်ၼၼ်ႉၼႆႉ လႆႈပဵၼ်ၵႂႃႇ မိူဝ်ႈဝၢႆးဝၼ်း ဢေႇပရႄႇ 13 တီႈ တိူၵ်ႈသိုဝ်ႉၶူဝ်းၶွင် ပွၼ်ႇတီႇၵျႅၼ်းသျိၼ်း ဢၼ်ၵူၼ်းသိုဝ်ႉၶူဝ်း ၵိုၼ်းၼမ်ၼၼ်ႉယဝ်ႉ။ ၵႅမ်ၸွမ်ႁၢၼ်ပလိၵ်ႈ ဢၼ်ႇတၼီၶုၵ်ႉၶ် လၢတ်ႈဝႃႈ “ႁဝ်းၶႃႈ လႆႈႁပ်ႉလွင်ႈပွင်ႇၶၢဝ်ႇဝႃႈ ယွၼ်ႉပိူဝ်ႈ ၵူၼ်းယိပ်းမိတ်ႈႁဵတ်းႁၢႆႉသေ ၵူၼ်းလႆႈတၢႆၵႂႃႇ ႁူၵ်းၵေႃႉ ဝႃႈၼႆယဝ်ႉ“။ တေႃႈလဵဝ်တႄႉ ႁူမ်ႈဝႃႈ ဢမ်ႇပႆႇလႆႈႁူႉ တၢင်းယိူင်း လွင်ႈဢၼ်ႁဵတ်းႁၢႆႉၼႆႉသေတႃႉ တႃႇတေ ပၢၵ်ႈပႅတ်ႈ လွင်ႈဢၼ်ၸၢင််ႈပဵၼ်လႆႈ လွင်ႈၵေႃႇၵၢၼ်ႁၢႆႉၼၼ်ႉတႄႉ ပႆႇပဵၼ်လႆႈ ဝႃႈၼႆယဝ်ႉ။

ၸိူဝ်းဢၼ်လႆႈတၢင်းၸဵပ်းမၢတ်ႇ ၵူၼ်းပႅတ်ႇၵေႃႉၼၼ်ႉတႄႉ ဢဝ်ၶဝ်သူင်ႇဝႆႉၸူး ႁူင်းယႃ တီႈဝဵင်းသိတ်ႉၼီႇယဝ်ႉသေ ၼႂ်းၵႃႈၶဝ်ၼၼ်ႉ ၶဝ်ႈပႃးဝႆႉ လုၵ်ႈဢွၼ်ႇၵေႃႉၼိုင်ႈလႄႈ လုၵ်ႈဢွၼ်ႇၼၼ်ႉၵေႃႈ ဢဝ်သူင်ႇၸူးပၼ် ႁူင်းယႃ လုၵ်ႈဢွၼ်ႇ ဢၼ်မီးတီႈ ဝဵင်းသိတ်ႉၼီႇယဝ်ႉၼႆ ၽူႈမီးသုၼ်ႇလၢတ်ႈ ၽၢႆႇလူတ်ႉတၢင်ႇၵူၼ်းပဵၼ် ၸႄႈမိူင်းၼိဝ်းသွၵ်ႉဝေးသ် လႆႈမွၵ်ႇလၢတ်ႈ ႁွင်ႈၵၢၼ်ၶၢဝ်ႇဢေႇဢႅပ်ႉၾ်ပီႇဝႆႉဝႃႈၼၼ်။

တီႈၼႂ်းငဝ်းတူင်ႉ ဢၼ်သိုဝ်ႇၼႂ်းပိုၼ်းဢွၵ်ႇၼၼ်ႉတႄႉ ၵူၼ်းၸၢႆးၵေႃႉၼိုင်ႈ ဢၼ်ၼိုင်ႈသိူဝ်ႈၵျႃႇၸီႇရႅတ်ႉပီႇလိၵ်ႉၶ် ဢေႃႉသထရေးလီးယႃးဝႆႉၼၼ်ႉ ယိပ်းမိတ်ႈလူင်မၢၵ်ႈၼိုင်ႈသေ လေႇႁႃႁဵတ်းႁၢႆႉၵူၼ်းၸိူဝ်းမီးၼႂ်းၵၢတ်ႇယူႇသေ ၵူၼ်းၶမ်ႈၵေႃႈ လႆႈတၢင်းၸဵပ်းမၢတ်ႇသေ လူမ်ႉယူႇၼိူဝ်ၽၢၵ်ႈၵေႃႈ ၼႄ ဝႆႉယဝ်ႉ။

ၵူၼ်းဢၼ်တူဝ်ထူပ်းတႃႁၼ်လၢတ်ႈဝႃႈတႄႉ မၼ်းပဵၼ်လွင်ႈဢၼ်လီၵူဝ်ႁေတူၵ်းၸႂ် ၼႆသေ ပလိၵ်ႈၶဝ် လႆႈၶတ်းၸႂ်ဢဝ်ပၢႆးႁူမ်ႇလူမ်ႈသေ ၵူၼ်းၸိူဝ်းမီးၼႂ်းၵၢတ်ႇၵေႃႈ လႆႈဢွၼ်ၵၼ် လႅၼ်ႈပၢႆႈႁႂ်ႈလွတ်ႈၽေးၼၼ်ႉယဝ်ႉ။ ဝၢႆးသေ ပဵၼ်လွင်ႈၼၼ်ႉယဝ်ႉ လႆႈဢိုတ်း တၢင်းၶဝ်ႈတၢင်းဢွၵ်ႇၵၢတ်ႇၼၼ်ႉသေ ပလိၵ်ႈၶဝ် လႆႈတိုၵ်းသူၼ်းၵူၼ်းမိူင်း ယႃႇၽူမ်ႈႁႂ်ႈၵႂႃႇတီႈၼၼ်ႈ ဝႃႈၼႆယဝ်ႉ။

ၸွမ်ၽွင်းလူင် ဢေႃႉသထရေးလီးယႃး ဢႅၼ်ႇတၼီႇဢႄႇလ်ပၼိသ်ႉ တႅမ်ႈတၢင်ႇတီႈ သိုဝ်ႇသၢၼ်တူင်ႇၵူၼ်း X မၼ်းဝႃႈ လႆႈပဵၼ်ဢၼ်တမ်ႇၼွႆႈမွင်ၸႂ်ၸွမ်း ၽူႈၸိုဝ်းလႆႈတၢႆ၊ လႆတၢင်းၸဵပ်းမၢတ်ႇ လႄႈ မုင်ႉႁိူၼ်းၶဝ် သေ လွင်ႈႁဵတ်းႁၢႆႉဢၼ်ၼႆႉ ပဵၼ်ဢၼ်လႆႈတူၵ်းၸႂ်တႄႉတႄႉ ဝႃႈၼႆယဝ်ႉ။

ယွၼ်ႉပိူဝ်ႈဝႃႈ တီႈမိူင်းဢေႃႉသထရေးလီးယႃးၼႆႉ လွင်ႈႁဵတ်းႁၢႆႉမဵဝ်းၼႆႉၼႆႉ ဢမ်ႇသူႈမီးဢမ်ႇသူႈပဵၼ်လႄႈ ၸင်ႇလႆႈဝႃႈ ပဵၼ်ဢၼ်လီတူၵ်းၸႂ်ၼႆယဝ်ႉ။

ငိူၼ်ႈငဝ်ႈတိုၼ်း

• Tiffanie Turnbull & Katy Watson, in Bondi, & Doug Faulkner. "'It was carnage' - Eyewitnesses describe Sydney stabbing horror" — BBC, April 13, 2024
• Liam Woods, Henry Austin လႄႈ Mahalia Dobson. "Stabbing rampage at Sydney mall leaves at least seven dead, including attacker" — NBC News, April 13, 2024
• Rachel Clun လႄႈ Patrick Begley. "Multiple dead, injured in Sydney’s eastern suburbs; PM, NSW Police Commissioner speak" — The Sydney Morning Herald, April 13, 2024
• Michael E. Miller လႄႈ Victoria Bisset. "Man kills six in stabbing attack at mall in Sydney’s Bondi Junction" — The Washington Post, April 13, 2024
• Kirsty Needham လႄႈ Jill Gralow. "Sydney knife attacker shot dead after killing 6 in Bondi mall" — Reuters, April 13, 2024