Wn/shn/ၶၢဝ်းတၢင်း ၽွင်းလူင်ၵၢၼ်ၼွၵ်ႈမိူင်းၶႄႇ ၵႂႃႇ ဢေႃႉသထရေးလီးယႃး လႅပ်ႈႁႃၶေႃႈၵႄႈ လွင်ႈၵႃႉၶၢႆ
ဝၼ်းဢင်းၵၢၼ်း၊ မၢတ်ႉၶျ် 19၊ 2024
_(cropped).jpg)
ပေႃးဝၼ်းပုတ်ႉတေမႃးၼႆႉ ၽွင်းလူင်ၵၢၼ်ၼွၵ်ႈမိူင်းၶႄႇ ဝင်ယီႈ ၼႆႉ တေၵႂႃႇမိူင်း ဢေႃႉသထရေးလီးယႃးသေ ပဵၼ်ၶၢဝ်းတၢင်းပွၵ်ႈဢွၼ်တၢင်းသုတ်း ၼႂ်းၵႃႈ 7 ပီ ဝႃႈၼႆယဝ်ႉ။ တီႈၼႂ်းၶၢဝ်းတၢင်းၼႆႉ မိူင်းသွင်မိူင်း တေမီးလွင်ႈဢုပ်ႇဢူဝ်းၵၼ် ၵပ်းၵၢႆႇလူၺ်ႈ ၵၢၼ်ငၢၼ်းလုမ်းၽွင်း လႄႈ ပၼ်ႁႃလွင်ႈႁူမ်ႇလူမ်ႈၼႆသေတႃႉ ၵူၼ်းလဵပ်ႈႁဵၼ်းၶဝ် လႆႈထတ်းသၢင်ဝႃႈတႄႉ တေၶဝ်ႈပႃး လွင်ႈတႃႇႁႃၶေႃႈၵႄႈလိတ်ႈ ဢၼ်ပဵၼ်လွင်ႈလႆႈထဵင်ႈမေႃးၵၼ် တီႈ ၵၢၼ်ၵႃႉၶၢႆၼၼ်ႉယူႇ ဝႃႈၼႆယဝ်ႉ။
ႁွင်ႈထၢၼ်ၵၢၼ်ၼွၵ်ႈမိူင်းၶႄႇ မွၵ်ႇလၢတ်ႈဝႃႈ တီႈၼႂ်းၶၢဝ်းတၢင်းၼႆႉ ၽွင်းလူင် ဝင်ယီႈ တေမီးတႃႇထူပ်းၵၼ်တင်း Anthony Albanese ဢၼ်ပဵၼ် ၸွမ်ၽွင်းလူင်ဢေႃႉသထရေးလီးယႃး၊ Penny Wong ဢၼ်ပဵၼ် ၽွင်းလူင်ၵၢၼ်ၼွၵ်ႈမိူင်း ဢေႃႉသထရေးလီးယႃး ၸိူဝ်းၼႆႉ ဝႃႈၼႆယဝ်ႉ။ မိူဝ်ႈပီ 2020 ၼၼ်ႉ ၽွင်းမိူဝ်ႈ မီးလွင်ႈထဵင်မေႃးၵၼ် ၼႂ်းၵႄႈ ၵၢၼ်ၽွင်းမိူင်းသွင်မိူင်းၼၼ်ႉ ၶႄႇၶဝ် လႆႈၵဵပ်းၶွၼ်ႇၼိူဝ် လဝ်ႈ၊ ဝၢႆႇ ဢေႃႉသထရေးလီးယႃးဝႆႉသေ တွၼ်ႈတႃႇ ပူတ်းပွႆႇပၼ် လွင်ႈၼၼ်ႉၵေႃႈ တေၶဝ်ႈပႃးၼႂ်း ၶပ်ႉမၢႆတႃႇဢုပ်ႇဢူဝ်းၵၼ်ယူႇဝႃႈၼႆယဝ်ႉ။ မိူဝ်ႈၽွင်းၵဵပ်းၶွၼ်ႇၼၼ်ႉ ၽူႈမီးပုၼ်ႈၽွၼ်းၶႄႇၶဝ် လၢတ်ႈဝႃႈ မိူင်းဢေႃႉသထရေးလီးယႃးၼႆႉ ပဵၼ်မိူင်း ဢၼ်သၢၼ်ၶတ်း လွင်ႈၶႄႉၶဵင်ႇလွၵ်းၵၢတ်ႇ ဝႃႈၼႆယဝ်ႉ။
ဝၢႆးသေ လူင်ပွင်ၸိုင်ႈဢေႃႉသထရေးလီးယႃး လႆႈၵမ်ႉထႅမ် လွင်ႈၵူတ်ႇထတ်းၶေႃၶေႃႈ ဢၼ်ပဵၼ် ငဝ်ႈငႃႇၽေးၵႃႇလ တၢင်းပဵၼ်ၶူဝ်းဝဵတ်ႉ 19 ဢၼ်တႄႇလႆႈႁၼ် တီႈ မိူင်းၶႄႇၼၼ်ႉသေ ၽၢႆႇၶႄႇၶဝ် လႆႈတိူဝ်းၵဵပ်းၶွၼ်ႇၼိူဝ် လဝ်ႈ၊ ဝၢႆႇ ဢေႃႉသထရေးလီးယႃး မႃးယဝ်ႉ။ ယွၼ်ႉပိူဝ်ႈလွင်ႈႁဵတ်းသၢင်ႈ ၸိူင်ႉၼၼ်လႄႈ ၵႃႈၶၼ်ဝၢႆႇ ဢေႃႉသထရေးလီးယႃး ဢၼ်တၢင်ႇၸူးၶႄႇ ဢၼ်မီးမႃး တေႃႇလႃႇ 662 လၢၼ်ႉၼၼ်ႉ ထိုင် ပီ 2023 မႃး လႆႈလူင်းထိုင်ၵႂႃႇ တေႃႇလႃႇ 6.6 လၢၼ်ႉ ယဝ်ႉ။ တီႈ ၶေႃႈပိုၼ်ၽၢဝ်ႇ ဢၼ်ၽၢႆႇ ႁွင်ႈထၢၼ်ၵၢၼ်ၵႃႉၶၢႆၶႄႇ လႆႈပိုၼ်ဢွၵ်ႇမႃး မိူဝ်ႈဝူင်ႇပူၼ်ႉမႃးၼၼ်ႉတႄႉ လၢတ်ႈဝႆႉဝႃႈ လွင်ႈဢၼ်တိူဝ်းၵဵပ်းၶွၼ်ႇၼၼ်ႉ တေၸၢင်ႈ ပူတ်းပွႆႇပၼ်လႆႈ ၼႂ်းၶၢဝ်းတၢင်းလၢႆလၢႆဝူင်ႈၼႆႉ ဝႃႈၼႆယဝ်ႉ။
ငိူၼ်ႈငဝ်ႈတိုၼ်း
- William Yang. "Chinese Foreign Minister Visits Australia Amid Efforts to Stabilize Trade Relations" — VOA News, March 18, 2024
- VOA News. "တရုတ်နိုင်ငံခြားရေးဝန်ကြီး ဩစတြေးလျခရီး ကုန်သွယ်ရေးအငြင်းပွားမှု အဖြေရှာဖွယ်ရှိ" — VOA News, March 19, 2024
