Jump to content

Wn/shn/ၽွင်းလူင်ၵၢၼ်ၼွၵ်ႈမိူင်း မိူင်းၶႄႇ တေႁူပ်ႉထူပ်း ႁူဝ်ၼႃႈ ၶွင်ႇသီႇသိုၵ်းမၢၼ်ႈ

Add links
From Wikimedia Incubator
< Wn‎ | shn
Wn > shn > ၽွင်းလူင်ၵၢၼ်ၼွၵ်ႈမိူင်း မိူင်းၶႄႇ တေႁူပ်ႉထူပ်း ႁူဝ်ၼႃႈ ၶွင်ႇသီႇသိုၵ်းမၢၼ်ႈ

ဝၼ်းပုတ်ႉ၊ ဢေႃးၵၢတ်ႉ 14၊ 2024

လိၵ်ႈႁွမ်တွမ် ၸိူဝ်းၵဵဝ်ႇၵပ်း
ဢွင်ႈတီႈ မိူင်းမျၢၼ်ႇမႃႇ
ႁူမ်ႈသၢင်ႈ!
Wn/shn/မျၢၼ်ႇမႃႇ
Wn/shn/မျၢၼ်ႇမႃႇ
ၽွင်းလူင်ၵၢၼ်ၼွၵ်ႈမိူင်း မိူင်းၶႄႇ ဝၢင်းယီႈ

ၶုၼ်ၽွင်းၵၢၼ်ၼွၵ်ႈမိူင်း မိူင်းၶႄႇ ဝၢင်းယီႈ တေၶဝ်ႈမိူင်းမၢၼ်ႈသေ တေႁူပ်ႉထူပ်း ႁူဝ်ၼႃႈ ၶွင်ႊသီႇသိုၵ်းမၢၼ်ႈ ၽွင်းဝၼ်းလိုဝ်ႈၵၢၼ်ၼႆႉ ၼႆယဝ်ႉ။ ၽူႈမီးပုၼ်ႈၽွၼ်း ၼႂ်းၶွင်ႇသီႇသိုၵ်း ၵေႃႉ႞ လၢတ်ႈဝႃႈ ၽွင်းလူင်ၵၢၼ်ၼွၵ်ႈမိူင်း မိူင်းၶႄႇ တေႁူပ်ႉထူပ်း ႁူဝ်ၼႃႈသိုၵ်းသေတႃႉ တေဢမ်ႇႁူပ်ႉထူပ်း ၽူႈၵိူဝ်းၵုမ်ၸိုင်ႈမိူင်း တေႃႇဢွင်ႇသၢၼ်းၸုၵျီႇ ဢၼ်ထုၵ်ႇၵုမ်းၶင်ဝႆႉ ၸဵမ်မိူဝ်ႈ သိုၵ်းယိုတ်းဢႃႇၼႃႇ ပီ 2021 ၼၼ်ႉ ၼႆယဝ်ႉ။

ၵူၺ်းၵႃႈ လွင်ႈတၢင်းႁူဝ်ယွႆႈ ၽႅၼ်ၵၢၼ်တႃႇတေႁူပ်ႉၵၼ်ၼၼ်ႉတႄႉ ဢမ်ႇပိုၼ်ၽၢဝ်ႇ။ ၼႂ်းၶေႃႈပိုၼ်ၽၢဝ်ႇ ထၢၼ်ၽွင်းလူင် ၵၢၼ်ၼွၵ်ႈမိူင်း မိူင်းၶႄႇ မိူဝ်ႈၼႆႉၵေႃႈ ပႃးဝႆႉဝႃႈ တေၵႂႃႇဢႅဝ်ႇမိူင်းမၢၼ်ႈ ၽွင်းမိူဝ်းတေ ၵႂႃႇၶိုၼ်ႈႁွတ်ႈ ပၢင်ၵုမ်ၽွင်းလူင် ၵၢၼ်ၼွၵ်ႈမိူင်း လွင်ႈႁူမ်ႈသၢင်ႈ လၢၼ်ႇၶျၢၼ်း-မႄႈၶွင် ပွၵ်ႈၵမ်း (9) ဢၼ်တေၸတ်းႁဵတ်းတီႈမိူင်းထႆး ၼႂ်းလိူၼ်ဢေႃးၵၢတ်ႉ 14 ဝၼ်း တေႃႇထိုင် ဝၼ်းတီႈ 17 ၶၢဝ်းတၢင်းသၢမ်ဝၼ်း ၼႆသေတႃႉ ဢမ်ႇလႆႈလၢတ်ႈပႃး လွင်ႈတၢင်းႁူဝ်ယွႆႈမၼ်းၼင်ႇၵဝ်ႇ။

ယၢမ်းၶုၼ်ၽွင်းၵၢၼ်ၼွၵ်ႈမိူင်း မိူင်းၶႄႇ မႃးဢႅဝ်ႇမိူင်းမၢၼ်ႈ ၼႆႉ မႅၼ်ႈၽွင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၶဝ် ၵုမ်းၵမ်ဝႆႉ တီႈ မိူင်းတႆး ပွတ်းႁွင်ႇ ဢၼ်တိတ်းၸပ်း မိူင်းၶႄႇ လႄႈ မိူင်းမၢၼ်ႈၼၼ်ႉသေ ၶွင်ႇသီႇသိုၵ်းမၢၼ်ႈ လႆႈသုမ်းဝႆႉ ငဝ်ႈငုၼ်းတိူင်းသိုၵ်း ပွတ်းႁွင်ႇဝၼ်းဢွၵ်ႇ လႄႈ တပ်ႉပၢင်သဝ်း တင်းၼမ်ယဝ်ႉ။ ၾၢႆႇၶႄႇတိုၵ်းသူၼ်း ႁႂ်ႈၸုမ်းၸိူဝ်းၵဵဝ်ႇၶွင်ႈၶဝ် ၵိုတ်းတိုၵ်းၵၼ်သေ မိူဝ်ႈပူၼ်ႉမႃးလၢႆဝၼ်းၼၼ်ႉၵူၺ်း ၶႄႇသူင်ႇတူဝ်တႅၼ်းၶိုၵ်ႉတွၼ်း ၽၢႆႇဢေးသျႃး ထၢၼ်ၽွင်းလူင် ၵၢၼ်ၼွၵ်ႈမိူင်းၶႄႇ ၵႂႃႇတီႈၼေႇပျီႇတေႃႇ။

ၽွင်းယၢမ်းၼင်ႇၼၼ်ၵေႃႈ ၶဝ်ႁၢင်ႈႁႅၼ်းတႃႇတေတႅင်ႇတင်ႈ ၼၢင်းယိင်းၵေႃႉၼိုင်ႈ ၸိုဝ်ႈဝႃႈ ၼၢင်းမႃႇၵျႃႇ ဢၼ်တေပဵၼ်ၽွင်းတၢင်မိူင်းၶႄႇ တီႈမိူင်းမၢၼ်ႈ။ မိူဝ်ႈပူၼ်ႉမႃးဢမ်ႇႁိုင်ၼႆႉ မီးၶၢဝ်ႇဢွၵ်ႇမႃးဝႃႈ ၶွင်ႇသီႇသိုၵ်းမၢၼ်ႈ တေဢမ်ႇၶဝ်ႈပႃးၼႂ်းၵၢၼ်ဢုပ်ႇဢူဝ်းၵိုတ်းတိုၵ်းၵၼ်တင်း ၸုမ်းၸၢဝ်းၶိူဝ်း ဢၼ်ၶႄႇၵမ်ႉၸွႆႈၼၼ်ႉယဝ်ႉၼႆလႄႈ လွင်ႈၵပ်းသိုပ်ႇၵၢၼ်မိူင်း ဢိၵ်ႇတင်း လွင်ႈတူင်ႉၼိုင်ၼႂ်းၵႄႈၶႄႇ လႄႈ မိူင်းမၢၼ်ႈၵေႃႈ တိူဝ်းၼမ်မႃးလွႆးလွႆး။


ငိူၼ်ႈငဝ်ႈၶၢဝ်ႇ

Retrieved from "https://incubator.wikimedia.org/w/index.php?title=Wn/shn/ၽွင်းလူင်ၵၢၼ်ၼွၵ်ႈမိူင်း_မိူင်းၶႄႇ_တေႁူပ်ႉထူပ်း_ႁူဝ်ၼႃႈ_ၶွင်ႇသီႇသိုၵ်းမၢၼ်ႈ&oldid=6345906"