Wn/shn/ပၢႆႇတႅၼ်ႇ တေၸတ်းႁဵတ်း ပၢင်ၵုမ်လူင် Quad ပေႃးသႅပ်ႇထႅမ်ႇပႃႇ 21 ဝၼ်း တီႈဝဵင်းတႄႇလႃႇဝႄႇ
ဝၼ်းသုၵ်း၊ သႅပ်ႇထႅမ်ႇပႃႇ 13၊ 2024
မိူဝ်ႈဝၼ်းၽတ်းၼၼ်ႉ ႁိူၼ်းၽိူၵ်ႇ ပိုၼ်ၽၢဝ်ႇဝႃႈ ၸွမ်ပွင်ၸိုင်ႈ ၵျူဝ်းပၢႆႇတႅၼ်ႇ တေၸတ်းႁဵတ်း ပၢင်ၵုမ်လူင် ၽူႈဢွၼ်ႁူဝ် ၸုမ်း Quad ဢၼ်ပႃး မိူင်းဢမႄႇရိၵၢၼ်ႇ၊ မိူင်းဢေႃးသထရေးလီးယႃး၊ ၵျႃႇပၢၼ်ႇ လႄႈ ဢိၼ်းတီးယႃးၼၼ်ႉ ၼႂ်းလိူၼ်သႅပ်ႇထႅမ်ႇပႃႇ 21 ဝၼ်း တီႈၸႄႈမိူင်း တႄႇလႃႇဝႄႇ ၼႆယဝ်ႉ။
တီႈပၢင်ၵုမ်ၼၼ်ႉ ၸွမ်ပွင်ၸိုင်ႈ ၿၢႆႇတႅၼ်ႇ တေႁပ်ႉၶႅၵ်ႇ ၸိူဝ်းပဵၼ် ၽူႈဢွၼ်ႁူဝ်ၸုမ်း Quad ဢၼ်တေမႃးထႅင်ႈ ဢၼ်ပဵၼ် ၸွမ်ၽွင်းလူင် မိူင်းဢေႃးသထရေးလီးယႃး ဢႅၼ်ႇထူဝ်ႇၼီႇ ဢႄးလ်ပႃႇၼီႇ၊ ၸွမ်ၽွင်းလူင် ဢိၼ်ႇတိယ ၼရႅၼ်ႇတရႃႇမူဝ်ႇတီႇ လႄႈ ၸွမ်ၽွင်းလူင် ၵျႃႇပၢၼ်ႇ ၶိတ်ႉသျိတႃႇ ၽူႇမီႇယႃႇ ပဵၼ် ပွၵ်ႈၵမ်းသွင် လႄႈ ပွၵ်ႈၵမ်းလိုၼ်းသုတ်း ၼႆယဝ်ႉ။
ပၢင်ၵုမ်လူင်ပွၵ်ႈၼႆႉၵေႃႈ လႆႈၸတ်းႁဵတ်းပဵၼ်ပၢင်ၵုမ်ၽၢႆႇၼႃႈ မိူဝ်ႈပၢင်ၵုမ်လူင် ၸၢတ်ႈၸိုင်ႈလုမ်ႈၾႃႉ ၸတ်းႁဵတ်းတီႈ ဝဵင်းၼိဝ်းယွၵ်ႉၼၼ်ႉယဝ်ႉ။ တီႈပၢင်ၵုမ်ပွၵ်ႈၼႆႉ ပိူင်လူင်မၼ်းတႄႉ ပဵၼ်တႃႇတေႃႇသူႈ လွင်ႈၶႄႇပူၼ်ႉပႅၼ် ၼႂ်းပၢင်ႇလၢႆႇၶႄႇၸၢၼ်းၼၼ်ႉယဝ်ႉ။ တေဢုပ်ႇဢူဝ်းၵၼ် လွင်ႈပူၵ်းပွင် လွင်ႈႁူမ်ႈမိုဝ်း ၼႂ်းၸုမ်း ပႃးၸဵမ် လွင်ႈႁူမ်ႈမိုဝ်း ၵၢၼ်ပၢႆးၼမ်ႉ ဢၼ်မီးဝႆႉ ၼႂ်းပိုၼ်ႉတီႈ ဢိၼ်ႇတူဝ်ႇပၸိၾိၵ်ႉၼၼ်ႉ ၼႆယဝ်ႉ။
ၽူႈၶၼ်ပၢၵ်ႇ ႁိူၼ်းၽိူၵ်ႇ Karine Jean-Pierre လၢတ်ႈဝႃႈ ၼႂ်းၵႄႈ ၸိုင်ႈမိူင်းၽူႈၶဝ်ႈၸုမ်းၼၼ်ႉ မီးလွင်ႈသူၼ်ၸႂ် ၼိူဝ်ၼႃႈတီႈလမ်ႇလွင်ႈ ၼႂ်းပိုၼ်ႉတီႈ ဢိၼ်ႇတူဝ်ႇပၸိၾိၵ်ႉ ႁၢဝ်ႈႁႅင်းၼႆယဝ်ႉ။ ႁႂ်ႈမီးလွင်ႈလွတ်ႈလႅဝ်း လႄႈ လွင်ႈပိုတ်ႇၽုၺ်ႇ ၼႂ်းပိုၼ်ႉတီႈ ဢိၼ်ႇတူဝ်ႇပၸိၾိၵ်ႉ ၼမ်လိူဝ်ၵဝ်ႇ။ ၼႂ်းၶေႃႈပိုၼ်ၽၢဝ်ႇၼၼ်ႉ ၽူႈဢွၼ်ႁူဝ် ၸုမ်း Quad ၶဝ် တေဢုပ်ႇဢူဝ်းၵၼ် တႃႇတေႁဵတ်းႁႂ်ႈ လွင်ႈႁူမ်ႈမိုဝ်းၵၼ် ၽၢႆႇၽႅၼ်ၵၢၼ် ၼမ်မႃး။ ၸွမ်ပွင်ၸိုင်ႈ Biden လႆႈၸတ်းႁဵတ်း ပၢင်ၵုမ် ၽူႈဢွၼ်ႁူဝ် Quad ၶဝ် ႁူပ်ႉထူပ်းၵၼ် လူၺ်ႈတူဝ်ထူပ်း ပွၵ်ႈဢွၼ်တၢင်းသုတ်း တီႈႁိူၼ်းၽိူၵ်ႇ မိူဝ်ႈပီ 2021 ၼၼ်ႉယဝ်ႉ။ တေၸတ်းႁဵတ်းတီႈမိူင်းဢိၼ်းတီးယႃး ၼႂ်းပီ 2025 ၼႆယဝ်ႉ။
ငိူၼ်ႈငဝ်ႈၶၢဝ်ႇ
- Reuters. "Biden to host Quad summit September 21 in Delaware" — Reuters, September 12, 2024
- Patsy Widakuswara. "Biden to host Quad summit in Delaware" — VOA News, September 12, 2024
- India Today World Desk. "Biden to host Quad summit next week, PM Modi to attend event in US" — India Today, September 13, 2024
