Wn/shn/ပၢင်ၵုမ်လူင် Quad ၸတ်းႁဵတ်းတီႈ ဝဵင်းတႄႇလႃႇဝႄႇ
ဝၼ်းဢႃးတိတ်ႉ၊ သႅပ်ႇထႅမ်ႇပႃႇ 22၊ 2024
.jpg)
ပၢင်ၵုမ်လူင် ၽူႈဢွၼ်ႁူဝ် ၸုမ်း Quad ဢၼ်ပႃး မိူင်းဢမႄႇရိၵၢၼ်ႇ၊ မိူင်းဢေႃးသထရေးလီးယႃး၊ မိူင်းၵျႃႇပၢၼ်ႇ လႄႈ မိူင်းဢိၼ်းတီးယႃးၼၼ်ႉ ၸတ်းႁဵတ်းၵႂႃႇ မိူဝ်ႈဝၼ်းဢႃးတိတ်ႉၼၼ်ႉယဝ်ႉ။ ၸွမ်ပွင်ၸိုင်ႈ ဢမႄႇရိၵၢၼ်ႇ ၵျူဝ်းပၢႆႇတႅၼ်ႇ ႁပ်ႉတွၼ်ႈ ၽူႈဢွၼ်ႁူဝ်ၶဝ် တီႈႁိူၼ်းမၼ်း ဢၼ်မီးတီႈ ဝဵင်းဝီႇလ်မီႇၵျိၼ်ႇတၼ်ႇ ၸႄႈမိူင်း တႄႇလႃႇဝႄႇၼၼ်ႉယဝ်ႉ။
မိူဝ်ႈမၼ်းပႆႇထွၼ်တူဝ်ဢွၵ်ႇ တီႈၼႃႈတီႈ ၸွမ်ပွင်ၸိုင်ႈ ၼႂ်းၶၢဝ်းတၢင်း 4 လိူၼ်ၼႆႉ မၼ်းၼႄပၼ် လွင်ႈဢၼ် လွင်ႈႁူမ်ႈမိုဝ်း ဢိၼ်ႇတူဝ်ႇပၸိၾိၵ်ႉ ဢၼ်မၼ်းၸဝ်ႈ ပူၵ်းပွင်မႃး ၸဵမ်မိူဝ်ႈ မၼ်းၸဝ်ႈ လႆႈႁပ်ႉပုၼ်ႈၽွၼ်းၼၼ်ႉ တေၶိုၼ်ႈယႂ်ႇမႃး လႄႈ ၵၢၼ်မိူင်း ဢၼ်မၼ်းၸဝ်ႈ ယၢမ်ႈႁဵတ်းမႃးၼၼ်ႉယဝ်ႉ။
မိူဝ်ႈ ပၢႆႇတႅၼ်ႇ ႁပ်ႉပုၼ်ႈၽွၼ်း တီႈႁိူၼ်းၵႅဝ်ႈၽိူၵ်ႇၼၼ်ႉ ပၢင်ၵုမ် 4 မိူင်းၼၼ်ႉ လႆႈဢုပ်ႇၵၼ် ၸၼ်ႉၽွင်းလူင် ၵၢၼ်ၼွၵ်ႈမိူင်းသေ မိူဝ်ႈ ပၢႆႇတႅၼ်ႇ ႁပ်ႉပုၼ်ႈၽွၼ်းၼၼ်ႉ ၽူႈဢွၼ်ႁူဝ်ၸၼ်ႉသုင်ၶဝ် ႁူပ်ႉထူပ်းၵၼ်သေ ယုၵ်ႉယွင်ႈ ၸၼ်ႉထၢၼ်ႈ လွင်ႈႁူမ်ႈမိုဝ်းၵၼ် ႁႂ်ႈပဵၼ် လွင်ႈၶတ်းၸႂ် တႃႇတေဢွၵ်ႇပူၼ်ႉလႆႈ လွင်ႈသုၵ်ႉယုင်ႈ တီႈ ပွတ်းဢွၵ်ႇတွၼ်ႈၵၢင် ၼၼ်ႉယဝ်ႉ။
ပၢင်ၵုမ်လူင် ဢၼ်တေၸတ်းႁဵတ်း ၼႂ်းဝၼ်းလိုဝ်ႈၵၢၼ်ၼႆႉ တေပဵၼ်ပွၵ်ႈၵမ်း 6 ဝၢႆးသေ ပီ 2021 သေ ၽူႈဢွၼ်ႁူဝ်ၶဝ် လႆႈႁူပ်ႉထူပ်းၵၼ် လူၺ်ႈတူဝ်ထူပ်း 4 ပွၵ်ႈယဝ်ႉ။
လိူဝ်သေ ႁပ်ႉတွၼ်ႈ ၽူႈဢွၼ်ႁူဝ် ဢၼ်မႃးဢႅဝ်ႇလႄႇ တီႈႁိူၼ်းမၼ်း ၵူႈၵေႃႉယဝ်ႉ ၸွမ်ပွင်ၸိုင်ႈ ၿၢႆႇတႅၼ်ႇ လႆႈႁူပ်ႉထူပ်း ၽူႈဢွၼ်ႁူဝ် တင်းသဵင်ႈ တီႈႁူင်းႁဵၼ်းၸၼ်ႉသုင် ဢၼ်မၼ်းလႆႈၶိုၼ်ႈမႃး မိူဝ်ႈပူၼ်ႉမႃး 60 ပီလိူဝ်ၼၼ်ႉသေ လႆႈႁၢပ်ႇၵၢၼ် ၵိၼ်ၶဝ်ႈၶမ်ႈ ၼႆယဝ်ႉ။
ၽူႈဢွၼ်ႁူဝ် ၸုမ်း Quad ၶဝ်ၵေႃႈ တေႁူမ်ႈၵၼ် ဢွၵ်ႇၶေႃႈပိုၼ်ၽၢဝ်ႇ ဢၼ်သႄႉသွမ်း ၶႄႇလႄႈ ၵၢဝ်းလီႁွင်ႇ ႁၢဝ်ႈႁႅင်းၼႆ လုမ်း ၿၢႆႇတႅၼ်ႇ လၢတ်ႈၼႄၼင်ႇၼႆ။
ၽူႈပၼ်တၢင်းႁၼ်ထိုင် ၽၢႆႇႁူမ်ႇလူမ်ႈၸိူဝ်ႉၸၢတ်ႈ ႁိူၼ်းၵႅဝ်ႈၽိူၵ်ႇ ၵျဵၵ်ႉသျူႇလီႇဝၼ်ႇ လၢတ်ႈတီႈၽူႈသိုဝ်ႇၶၢဝ်ႇၶဝ် မိူဝ်ႈပၢင်ၵုမ်လူင် မိူဝ်ႈဝၼ်းဢႃးတိတ်ႉၼၼ်ႉဝႃႈ တေဢုပ်ႇၵၼ် လွင်ႈပၢႆးမၢၵ်ႈမီး လႄႈ လွင်ႈႁူမ်ႇလူမ်ႈ ဢၼ်ၵဵဝ်ႇၵပ်း ၶႄႇ ဢိၵ်ႇတင်း ၸွမ်ၽွင်းလူင် ဢိၼ်းတီးယႃး မူဝ်ႇၻီႇ ဢၼ်ဢွၵ်ႇၶၢဝ်းတၢင်းၵႂႃႇ မိူင်းရတ်ႈသျႃး လႄႈ မိူင်းယူႇၶရဵၼ်းၼၼ်ႉ ၼႆယဝ်ႉ။
မူဝ်ႇၻီႇ ဢိၼ်းတီးယႃး ၼႆႉ ပဵၼ်ၽူႈဢွၼ်ႁူဝ် ဢၼ်ၸိုဝ်ႈသဵင်ယႂ်ႇ ၼႂ်းၸိုင်ႈမိူင်း ဢၼ်ဢဝ် ၵၢင်ၸႂ် ၽၢႆႇၵၢင် လွင်ႈရတ်ႈသျႃး ၶဝ်ႈတိုၵ်း မိူင်းယူႇၶရဵၼ်းၼၼ်ႉ ၵေႃႉ႞ယဝ်ႉ။
သူႇလီႇဝၼ်ႇ လၢတ်ႈဝႃႈ ပၢႆႇတႅၼ်ႇ တေဝႆႉၼၵ်းၼႃဝႃႈ “ၸိုင်ႈမိူင်းမိူၼ်ၼင်ႇ ဢိၼ်းတီးယႃး ထုၵ်ႇလီပၼ်ႁႅင်းလႄႈ ၵမ်ႉထႅမ် လၵ်းၵၢၼ် ဢႃႇၼႃႇၽွင်းငမ်းတူဝ်ၵဝ်ႇလႄႈ လွင်ႈၽဵင်ႇပဵင်းၼႃႈလိၼ်” လႄႈ “ၸိုင်ႈမိူင်းလႂ်သေဢမ်ႇဝႃႈ ၼႂ်းလုမ်ႈၾႃႉၼႆႉ ထုၵ်ႇလီၵိုတ်းယိုတ်းလွင်ႈၵမ်ႉထႅမ် ၶိူင်ႈၵွင်ႈၵၢင်ႇသိုၵ်း ရတ်ႈသျႃး” ၼႆယဝ်ႉ။
ၸွမ်ၽွင်းလူင် ဢေႃးသထရေးလီးယႃး ဢႅၼ်ႇထူဝ်ႇၼီႇ ဢႄးလ်ပႃႇၼီႇ၊ ၸွမ်ၶုၼ်ၽွင်းလူင် ဢိၼ်းတီးယႃး ၼရႅၼ်ႇတရႃႇ မူဝ်ႇတီႇ လႄႈ ၸွမ်ၶုၼ်ၽွင်းလူင် ၵျႃႇပၢၼ်ႇ ၽူႇမီႇယူဝ်ႇ ၶိတ်ႉသျိတႃႇ ၸိူဝ်း ဢၼ်ၶိုၼ်ႈႁွတ်ႈမႃး ပၢင်ၵုမ် Quad ၼႆႉ တေၵႂႃႇၶဝ်ႈႁူမ်ႈ ပၢင်ၵုမ်လူင် ၸၢတ်ႈၸိုင်ႈလုမ်ႈၾႃႉ ဢၼ်တေၸတ်းႁဵတ်း တီႈဝဵင်းၼိဝ်းယွၵ်ႉ ၼႂ်းဝူင်ႈၼႃႈၼႆႉ ၼႆယဝ်ႉ။
ငိူၼ်ႈငဝ်ႈၶၢဝ်ႇ
- The White House. "2024 Quad Leaders’ Summit" — The White House, September 21, 2024
- Arlette Saenz and Samantha Waldenberg. "Biden aims to put final stamp on Quad partnership with hometown summit" — CNN, September 21, 2024
- Trevor Hunnicutt and David Brunnstrom. "Quad group expands maritime security cooperation at Biden's farewell summit" — Reuters, September 22, 2024
- CBS News. "Biden hosts his final Quad summit at his Delaware home, high school" — CBS News, September 21, 2024
- Sheryl Gay Stolberg. "Biden Hosts a Final ‘Quad Summit’ at His Delaware Home" — The New York Times, September 21, 2024
