Wn/shn/မိူင်းသုၺ်ႇတိၼ်ႇ ပဵၼ်မႃး လုၵ်ႈၸုမ်း NATO မိူင်းထူၼ်ႈ 32

ဝၼ်းသုၵ်း၊ မၢတ်ႉၶျ် 8၊ 2024 

ၽွင်းလူင်ၵၢၼ်ၼွၵ်ႈမိူင်း ဢမႄႇရိၵၢၼ်ႇ Antony Blinken (ၶႂႃ) လႄႈ ၸွမ်ၽွင်းလူင် သုၺ်ႇတိၼ်ႇ Ulf Kristersson (သၢႆႉ)

မိူင်းသုၺ်ႇတိၼ်ႇ ဢၼ်ၸုၵ်းယၼ် ပဵၼ်မိူင်းယူႇၵၢင် မႃး ၸဵမ်မိူဝ်ႈဝၢႆးပၢင်သိုၵ်းၵမ်ႇၽႃႇပွၵ်ႈသွင်ယဝ်ႉၼၼ်ႉ ယၢမ်းလဵဝ် ၶဝ်ႈၼႂ်းၸုမ်း NATO ယဝ်ႉသေ မိူဝ်ႈဝၼ်းၽတ်းၼၼ်ႉတႄႉ လႆႈပဵၼ်မႃး လုၵ်ႈၸုမ်း NATO မိူၼ်းထူၼ်ႈ 32 ၼၼ်ႉယဝ်ႉ။

ၸွမ်ၽွင်းလူင် သုၺ်ႇတိၼ်ႇ Ulf Kristersson လႆႈၶိုၼ်ႈႁွတ်ႈမႃးတီႈ ထၢၼ်ၽွင်းလူင်ၵၢၼ်ၼွၵ်ႈမိူင်း ဝႃႇသျိၼ်ႇတၼ်ႇတီႇၸီႇ တီႈပၢင်ၵႅဝ်ႈပဵၼ်တၢင်းၵၢၼ် ဢၼ်ၶဝ်ႈၼႂ်းၸုမ်း NATO ၸိူဝ်းပဵၼ် ၸုမ်းဢူၺ်းလီ မိူင်းဝၼ်းတူၵ်း ဢၼ်သၢၼ်ၶတ်း လွင်ႈရတ်ႈသျႃး လႆႈၶဝ်ႈတိုၵ်း ယူႇၶရဵၼ်း လႆႈမႃး သၢမ်ပီ ၼၼ်ႉယဝ်ႉ။

ဝၢႆးပၢင်ၵႅဝ်ႈယဝ်ႉ ၸွမ်ၽွင်းလူင်သုၺ်ႇတိၼ်ႇၼႆႉ တေမီးတႃႇၵႂႃႇတီႈ ႁိူၼ်းၵႅဝ်ႈၶၢဝ်သေ တွၼ်ႈၶမ်ႈမႃး တေၶိုၼ်ႈႁွတ်ႈပဵၼ်ၶႅၵ်ႇ တီႈပၢင်ပွႆး ဢၼ်ၸွမ်ၸိုင်ႈပၢႆႇတႅၼ်ႇ မွၵ်ႇလၢတ်ႈၶေႃႈပူင်လၢႆးငၢၼ်းၸိုင်ႈမိူင်း တီႈ သၽႃးဢမႄႇရိၵၢၼ်ႇၼၼ်ႉယူႇ။

ပီ 2022 ၼၼ်ႉ ၽွင်းမိူဝ်ႈ ၸွမ်ၸိုင်ႈရတ်ႈသျႃး ဝလႃႇတီႇမီႇလ်ပူႇထိၼ်ႇ လႆႈၶဝ်ႈတိုၵ်း ယူႇၶရဵၼ်းၼၼ်ႉ ၸွမ်ၸိုင်ႈပၢႆႇတႅၼ်ႇ လႆႈထၢင်ႇဝႃႈ ၸွမ်ၸိုင်ႈရတ်ႈသျႃးၼႆႉ မၼ်းတေႁဵတ်းႁႂ်ႈ ယူႇရူပ်ႉၼႆႉ ႁႅင်းဢူၼ်ႈၵႂႃႇ လႄႈ တေႁဵတ်းႁႂ်ႈ ၸုမ်း NATO လႆႈတႅၵ်ႇယၢႆႈၵႂႃႇၼႆသေတႃႉ ၼႂ်း လိူၼ်မေႇ ပီ 2022 ၼၼ်ႉၼင်ႇၵဝ်ႇ မိူင်းႁႅင်းသိုၵ်းယႂ်ႇသွင်မိူင်း ဢၼ်ပဵၼ် သုၺ်ႇတိၼ်ႇ လႄႈ ၾိၼ်ႇလႅၼ်ႇ ၶဝ် လႆႈတမ်းလွင်ႈတႅပ်းတတ်းၵိုၵ်းပိုၼ်း တႃႇၶဝ်ႈၼႂ်းၸုမ်း NATO ၼၼ်ႉယဝ်ႉ။

ယၢမ်းလဵဝ်ၵေႃႈ မိူင်းသွင်မိူင်းၼႆႉ ပဵၼ် မိူင်းၶဝ်ႈၸုမ်းဝႆႉယဝ်ႉသေ ယွၼ်ႉပိူဝ်ႈ သုၺ်ႇတိၼ်ႇ လႆႈၶဝ်ႈပႃးမႃးၸိူင်ႉၼႆလႄႈ ႁႅင်း မိူင်း 32 မိူင်းႁူမ်ႈၵၼ်လႄႈ ၸုမ်းလူင် NATO ၼႆႉ တိူဝ်းၵႅၼ်ႇၶႅင်မႃး တိူဝ်းၽွမ်ႉႁူမ်ႈၵၼ်မႃးၼႆ ၸွမ်ၸိုင်ႈပၢႆႇတႅၼ်ႇ လႆႈမွၵ်ႇလၢတ်ႈဝႃႈၼၼ်ဝႆႉယူႇ။

ငိူၼ်ႈငဝ်ႈတိုၼ်း

• VOA News. "Sweden Joins NATO as 32nd Member, Ending Decades of Neutrality" — VOA News, March 7, 2024
• VOA News. "ဆွီဒင်နိုင်ငံ NATO ရဲ့ ၃၂နိုင်ငံမြောက်အဖွဲ့ဝင်ဖြစ်လာ" — VOA News, March 8, 2024