Wn/cdo/大雪日火種相傳 福一中平話開講

【2018年12月8號福州訊】

囫圇教室都是學生

今旦（12月8號）是廿四節氣其大雪。日中，福州第一中學其福州話研究性學習課程也如期舉辦。

每蜀隻學生都有發遘學習材料

先生乞每蜀隻學生發了字表。格格裏勢其字都是特神意按規律排其，韻母蜀樣其字放遘同蜀行，聲調蜀樣其放同蜀列。

學生聽講其樣式

上堂其時候，先生教大家讀榕拼。榕拼是蜀種福州話其拼音，前兩個月日做好詞庫其福州話輸入法就有使遘榕拼。

黑板懸頂寫了「火種研學」

只蜀芘課程由福州一中口語社發起，面向高一其學生。策劃其儂由火種方言保育組來。保育組裏勢基本都是福州一中其學生，有其畢業了，有其固敆一中𡅏讀書。

今年春天，火種其儂頭蜀回做福州話其研究性學習活動，做了蜀學期。只蜀學期其平話堂，由前蜀拜五（11月30號）開始，每蜀禮拜做蜀回。今旦是只蜀學期第二回上堂。