Wn/cdo/福州話輸入法詞庫做好了 明年正式發佈

【2018年10月27號訊】

「輸入法詞庫全部完成啦！」

昨暝晡（10月26號）10點41分，福州話輸入法志願者QQ群裏勢，總負責人子善總款宣佈。此刻，群裏勢野価儂比起大拇哥告好，輸入法其開發也就總款行裏新其階段了。

今旦子善接受了維基記者其採訪。伊介紹講，只蜀輪錄裏詞庫，由拍字遘檢查、修改，共總花了蜀年其時間。拍字其志願者有20幾隻。其中，福州一中福州話研學輸入法組其學生貢獻了詞庫三分一其詞。

子善共維基記者講，遘現刻時，輸入法已經支持繁體字共簡體字兩其轉化，也兼容城裏共鄉下其口音。此外，若是講記𣍐定讀音，按感覺拍模糊音也有能耐拍出字。固有普通話反查其功能。也就是講，如果將來有字𣍐仈平話蔣讀，直接拍普通話拼音，也討會著汝卜想使其福州話漢字共讀音。

現刻，輸入法敆𡅏內測。福州一中參加福州話研學其同學各儂有機會先使遘只芘輸入法。

子善對記者表示，接落來固有事計著考慮、著做。比如講，現刻已經有其單字讀音表，臺中幾芘字有賺，需要介好好看蜀回。伊固拍算乞拍字其時候會列出來乞儂揀其候選詞加上普通話解釋。但是全部都乞伊加上解釋，復驚輸入法運行變野慢。嚽就著想囇優化其辦法。

子善講，遘時候開發完，大家可以敆rime懸頂拍平話，也可以下載專門做其福州話輸入法軟件。專門其軟件裏勢功能固価，比如講會使自動更新，比如有根據用戶拍字其情況加裏新詞其雲詞庫，固有前首講其普通話解釋，等等。

子善透露，輸入法拍算明年發佈。先做掏乞電腦使其，之後也會有手機使其版本。