Wn/cdo/福一中福州話研學兩個月日 公佈活動成果
【2018年6月18號福州訊】
今旦（18號）是五月節。今年4月，福建省福州第一中學開展了福州話研究性學習課程，面向高一學生。策劃茲蜀芘研究性學習其儂，也是後生囝，由火種方言保育組來。保育組其儂基本都是福州一中其學生，有其畢業了，有其固敆一中𡅏讀書。
上世紀60年代，陳寶琛其囝陳立鷗敆美國出版了蜀本福州話教材，號𡅏《閩語入門》。研學開始之後，每蜀禮拜，先生都會共報名研學其學生教茲蜀本書。教書其先生，就是高二學生澤生。澤生對維基記者表示，伊茲蜀學期上堂，也有趁緊張遘熟悉其過程。伊回憶頭輪上堂其辰候，「哇，儂會茲滿価去！」乞坐滿個郎芘階梯教室其儂驚了蜀下，霎無長時變緊張去。之後伊趁介紹平話其歷史起手，遘講解課本拼音其用法，聽𡅏學生很齊其跟讀其聲音，伊復有了仂滴自信。慢慢喏，伊也有了蜀套怎其上堂其方法，課程也變順利了。講遘對未來其展望，澤生表示，伊上堂辰候，一般是個郎篇課文先讀蜀回，介依次下𡅏講詞、語法。但是伊也講：「總款鐵實會臭悶去。」伊認爲，或者也可以合蜀兜，敆課文裡共詞、語法齊講去，總款同學會更好瞭解課文，詞共語法也會記其清楚仂囝。關於教平話其辦法，伊認爲除去基礎其讀共寫，其實也可以加仂囝其他其乇。學平話其歷史、文章、字典，去使平話讀報、詩詞、古文，都是野有味其，若是會加仂囝裡，就會好野価去。
-
平話研學學生坐其位（資料圖） -
教室其講臺（資料圖）
除𡅏敆蜀堆學課本，研學固分了三芘組：輸入法組、採訪組、維基組，每蜀組活動儥蜀樣，學生選俤蜀組都在伊。
輸入法組其負責人，是一中畢業學生子善。子善敆𡅏開發蜀芘福州話其拍字法，名字號𡅏榕拼輸入法。茲蜀芘拍字法使其福州話拼音方案，繼承陳澤平、趙麟斌其方案，復做了仂囝修改，希望方便拍字。比如拍「oe」會出「ë」，拍「y」或「v」會出「ü」。茲蜀組其任務就是做拍字法其詞庫。遘六月，伊各儂已經將李榮版《福州方言辭典》全部錄裏詞庫。子善希望，以後可以建設起包括拍字法、電子課文、電子辭典其福州話資料庫，方便後生囝學平話。
採訪組由澤生負責。乍起手其辰候，對澤生來講，頭頭芘問題就是學生什乇主題會好。基本個郎組其學生以前都儥仈怎其寫平話，連𡅏固有儂仂滴都儥仈講平話，故此澤生揀了「福州傳統民間節日共習俗」茲蜀芘逢儂都會曉講蜀兩句其主題，告學生去思考研究。之後雖然講伊共組裡其學生無交流很価，大部分其小組做其都比較認真，儷是講對拼音掌握儥好、野価漢字儥仈寫其情況固是普遍都有其。澤生表示，採訪伓啻對手學生了解鄉土，也幫助自己學了知識。比如講改完亮燈、迎神其採訪稿，伊也學了仂滴以前儥仈其習俗共故事。按澤生其觀察，學生應應是頭回試𡅏去使平話寫文章，故此伊固是很滿意伊儂其成果。澤生也指出，作爲組織其儂，可能著提供蜀份字表，可能著多共伊儂交流蜀下進度。
維基組其活動內容，就是學習怎其參與維基。負責組織其維基儂寫了講義，幫助學生了解維基其事計。教其內容，趁編輯維基百科，遘敆維基共享資源上傳多媒體文件。固根據閩東語維基百科其實際情況，教學生認識羅馬字其網站界面文字。負責教百科其維基儂表示，寫條目其學生都野認真，會共伊確認遣詞用字是伓是地道。五月遘今旦，學生寫其條目都領有七篇，共總有四千字左右。
研學做遘現在，差無多有兩個月日了。澤生坦言，有簽到者制度，平話研學乍無像其他研學蜀色，來其儂罔變罔少去。不過伊也表示，來上堂其儂，大部分可實是有興趣、有熱情敆茲懸頂其。比如講每蜀禮拜伊教《閩語入門》其辰候，跟𡅏讀課文其聲音遘尾了都野大聲，做筆記其儂也很価。嚽讓伊野感動。
現在，研學固長半個月日結束。
採訪
[edit | edit source]福州一中福州話研究性學習其採訪組，選了「福州傳統民間節日共習俗」做採訪其話題。下底是蜀部分採訪其成果，齊看蜀看吧。
做年做節
[edit | edit source]《做年做節》採訪稿，由組員傅抒言採訪。
維基新聞 - 答：做年都差無多啊。正月十五有儥蜀樣其。我細辰候正月十五有亮燈啊。
維基新聞 - 答：就是遊街，亮燈。舊底街道都有組織，每蜀隻街道都有組織做蜀隻大頂其燈。正月十五暝晡敆福州主要街道遊街，每家每戶其大儂都帶兒囝哥去看亮燈，野熱鬧。尾了有一年亮燈有兒囝哥乞儂踩死去，政府就取消去。現在正月十五暝晡就儥鬧熱了。
維基新聞 - 答：固有七月半。舊底市區野嫩，現在其二環都算鄉下了。鄉下都有做半段。
維基新聞 - 答：就是迎神，保平安。村裡鄉里都有告人扛𡅏菩薩，大街小巷總款迎去。每家每戶辦酒都野熱鬧，請親戚大細，固有朋友。炮仗複放野価。
維基新聞 - 答：你看街中野価店每蜀月初二十六會燒錢紙，供土地公。為去保佑做生意順順利利，生意興隆。
維基新聞
拗九·游神
[edit | edit source]《拗九·游神》採訪稿，由組員鄭燕婷、侯天莅、陳胤戎採訪。
維基新聞 - 答：拗九節著舊曆正月廿九，是福州其傳統節日。著茲蜀日，各儂都著煮拗九粥孝敬依爸依媽。
維基新聞 - 答：我做細其辰侯，鄉里都是新婦著拗九節茲蜀日自家煮拗九粥乞依爸依媽食。不過茲久我自家當了老媽，平常也會直接去超市買拗九粥乞個郎厝儂食，麻太嚽就是蜀種社會思想其變化。
維基新聞 - 答：有啊。儂家鄉其迎神都是著正月其辰侯，有野価頂轎抬𡅏菩薩，有白馬王、臨水奶等，路邊覷其儂人野価，盡鬧熱。
維基新聞 - 答：現今野価儂見覺封建迷信，我見覺古早其辰侯，科學儥發達，各儂著有困難其情况下平常想遘其是神來庇佑，嚽野是各儂其蜀種精神其寄托，讓自家無許大其負擔，也有各儂對生活其美好祝願吧。
消息來源
[edit | edit source]
|
茲篇報導講遘了維基媒體基金會或者基金會倛附屬計劃（比如講維基新聞、維基百科）等等內容。 |