Wb/nia/Ruti/3
I. Möi khö Mboasi ba golayama mbasitö Ruti, niŵa'ö Na'emi khönia
[edit | edit source]1 Ba imane khönia inania Na'emi: Ufaigi khöu zahono Ndra'ugö, onogu, ena'ö sohahau tödö ndra'ugö. 2 Hiza, Boasi andrö, si fao-fao'ö ba nono alawe andrö, ba no ga'ada, ba manöri gandru ia ba golayama mbasitö bongi. 3 Ba ondri, bayoini fanikha ndra'ugö, ba onukha ba ae mitou ba golayama mbasitö; ba böi i'ila wa ya'ugö, irege no aefa manga ia, ba irege no ibadu nagu. 4 Ba na aefa da'ö, na mörö ia, ba töngöni naha, heza mörö ia; ba ae'e ba bokai gambala tanö ba gahenia ba förö tou; ba iŵa'ö dania khöu, he öwisa.
5 Ba imane: Fefu hadia ia niŵa'öu, ba u'o'ö!
6 Ba möi ia mitou, ba golayama mbasitö, ahori i'o'ö niŵa'ö ninania khönia.
7 Ba me no manga Mboasi ba me no ibadu nagu, me ohahau sa'ae dödönia, ba möi ia mörö ba gero mbaho ngamböbö gandru.
Ba so Ruti, ikumo-kumo ia, ibokai gambala, tanö ba gahenia ba ileagö tou ia.
8 Ba me talu mbongi, ba tokea Mboasi, ba me ifaöga ia, ba hiza ndra alawe tanö ba gahenia.
9 Ba imane: Ha niha ndra'ugö? Ba imane Ruti: Ruti ndra'odo, sawuyumö: bologö gafiu yaŵa zawuyumö, me no sananu ndra'ugö.[1]
II. Ifabu'u khönia Boasi ihalö ia
[edit | edit source]10 Ba imane Boasi: Ya nifahowu'ö Yehowa ndra'ugö, onogu! Ebua na wa'omasimö safuria, moroi ba zi föföna andrö, me no lö nigohiu ono matua, he si numana, ba he so'ana'a. 11 Ba hiza, ba böi busi dödöu, ya'ugö onogu! Fefu hadia ia niŵa'öu, ba utörö khöu. Samba banua manö ndra'aga, ba lö si lö aboto ba dödö, wa no ira alawe si sökhi bua-bua ndra'ugö. 12 Ba hiza, si ndruhu sa, sananu ndra'odo; ba so na zananu bö'ö, sahatö moroi khögu. 13 Iagö da'e bongi: ba na isanu ndra'ugö mahemolu mbanua, ba yamusanu'ö; ba na lö omasi ia isanu'ö, ba faya wa no sauri Yehowa, na tenga ya'odo zananu ya'ugö! Förö, irege moluo!
14 Ba mörö ia irege moluo, tanö ba gahenia. Ba maoso ia, gasa-gasa wa'oroma döi niha.
Imane sa dödönia Boasi: Lö tola terongo, wa no möi ba golayama mbasitö ndra alawe andrö! 15 Ba imane: Bologö lembeu andrö!
Ba i'oro'ö.
Ba isu'a khönia gandru, samba lauru a matonga, ifa'ohe'ö khönia.
16 Ba irugi yomo mbanua.
Ba me irugi yomo khö ninania, ba imane da'ö: He wisa khöu, onogu?
Ba idunö-dunö khönia fefu, he wisa niha andrö khönia, ba imane: 17 Gandru andre, si samba lauru a matonga, ibe'e khögu, imane sa: Lö tola lö monoro danga ndra'ugö wangawuli khö ninau!
18 Ba imane inania: Honogö'ö, onogu, irege ö'ila, he wisa lua-lua da'ö! Lö'ö sa ibato niha andrö, balazi ifalua da'ö ma'ökhö!
Famotokhi ba gahe
[edit | edit source]- ↑ Hez 16:8
Fabaliŵa lala
[edit source]Olayama Ruti: 1 • 2 • 3 • 4
Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi
Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö