Wb/nia/Ruti/1

I. Awu'a Gelimelekhi, i'ohe wo'omonia ba iraononia

1 Me luo zanguhuku andrö, ba samuza ma'ökhö, ba lofo ba danö. Ba so zaheta, banua Mbetilekhema Yuda, i'ohe wo'omonia ba ononia matua, dombua, ba isaŵa danö Ndraono Moabi. 2 Töi zawu'a andrö, ba Elimelekhi, ba Na'emi döi wo'omonia ba Maloni ba Khiliyoni döi nononia andrö — mado Geferayi, banua Mbetilekhema Yuda. Ba larugi danö Ndraono Moabi ba la'iagö da'ö.

3 Ba mate wo'omo Na'emi andrö, Elimelekhi, ba hatö ya'ia ba ononia andrö si dombua. 4 Ba mangowalu nononia andrö, ono Ndraono Moabi lahalö; Orafa döi zi sambua ba Ruti zi sambua. Ba soso ira ba da'ö, mato mewulu fakhe.

5 Ba mate göi zi darua andrö, Maloni ba Khiliyoni, ba ira alawe andrö zi tosai, lö'ö sa'ae ononia andrö, si darua, ba lö fo'omonia andrö.

II. Mangawuli Na'emi

6 Ba maoso Na'emi, i'ohe numönönia andrö, mangawuli, aheta ia ba danö Ndraono Moabi, me no irongo ba da'ö, ba danö Ndraono Moabi, no ihakhösi tödö mbanuania Yehowa ba no ifuli ibe'e khöra mbalazo. 7 Ba iröi mbanua andrö, ba zi soso ia mege, ba fao khönia numönönia andrö si dombua. Ba me ba lala so ira, ba wangawuli ba danö mado Yuda, 8 ba imane Na'emi khö numönönia andrö, si dombua:

Mi'ae mifuli ami, sökhi na faoma mangawuli ami yomo khö ninami! Yamusulöni khömi Yehowa wa'omasimi zi mate andrö ba fa'omasimi ndra'odo! 9 Na mitema da'ö khö Yehowa, ba lö zi lö misöndra zahono ami, yomo khö ndra matuami dania, darua ami! Ba fa'ago bawa ia khöra.

10 Ba mege-ege sibai ira, ba lamane khönia: Fao sa'ae ndra'aga khöu ba niwami andrö!

11 Ba imane Na'emi: Mifuli ami, onogu, hadia, wa fao ami khögu? Hadia, so na nono matua ba dalugu, fo'omomi dania? 12 Mifuli ami, ya'ami onogu, mi'ae'e! satua sa'ae ndra'odo; tebai sa'ae möido nihalö. Ba na umane dödögu ena'ö: So na dötönafögu! ba na bongi andre falukhado ndra matua ba na mo'onodo ono matua, ena'ö, 13 ba hadia, mibase'ö irege ebua da'ö? Hadia, nitaha manö ami, lö möi nihalö? Böi, ya'ami ira onogu! Abu sibai sa dödögu ami; ya'odo sa, ba no si göna tanga Yehowa!

14 Ba ifuli mege-ege sibai ira; ba Orafa, ba fa'ago bawa khö ninania, ba Ruti andrö, ba i'olembai ia.

III. Lö faröi khönia Ruti andrö

15 Ba imane Na'emi: Me no ifuli ia kala'edomö ba niwara ba khö Lowalangira, ba fuli'ö göi, o'ö gala'edomö!

16 Ba imane Ruti: Böi forege khögu, uröi ndra'ugö, fa ufulido, lö faodo khöu! Ba zi möi ndra'ugö sa, ba da'ö möi ndra'o göi, ha ba zi so'ö, ba da'ö göi sodo, iwau niwagu, ba Lowalangiu Lowalangigu; 17 ba zi mate ndra'ugö, ba da'ö göi matedo, ba ba da'ö ndramuko'o ndra'odo; yamulau khögu nilau dödönia Yehowa — ha fa'amate zamabali ya'ita!

18 Ba me i'ila Na'emi, no aro dödö da'ö, ba wefao khönia, ba ibato wamarou ya'ia. 19 Ba mofanö zi darua andrö ba larugi Mbetilekhema. Ba me möi ira miyomo ba Mbetilekhema, ba humufa mbanua ma'asambua, ba khöra andrö, ba lamane: Da'ö Na'emi andrö?

20 Ba imane khöra: Böi mibe'e töigu Na'emi (wa'omasigu) Mara (sabu tödö) mibe'e töigu; noa sa'ae oya nifatörö Zi lö ambö fa'abölö khögu fa'abu dödö. 21 Si so ndra'o, me mofanödo ba si lö'ö, me i'ohe mangawuli ndra'odo Yehowa; ba hadia wa mibe'e töigu Na'emi, me noa sa'ae ihöndrögö ndra'o Yehowa, me no ifatörö khögu wa'abu dödö Si lö ambö fa'abölö?

22 Ba böröta wamasi gandru, me larugi Mbetilekhema Na'emi andrö ba umönönia Ruti andrö, Iraono Moabi, si no fao khönia, moroi ba danö Ndraono Moabi.

Famotokhi ba gahe

Fabaliŵa lala

Olayama Ruti: 1 • 2 • 3 • 4

Amabu'ulali Siföföna: Moze I • Moze II • Moze III • Moze IV • Moze V • Yosua • Sanguhuku • Ruti • Samueli I • Samueli II • Razo I • Razo II • Nga'ötö I • Nga'ötö II • Esera • Nehemia • Esitera • Yobi • Sinunö • Amaedola Zelomo • Sangombakha • Sinunö Sebua • Yesaya • Yeremia • Ngenu-Ngenu Yeremia • Hezekieli • Danieli • Hosea • Yoeli • Amosi • Obadia • Yona • Mikha • Nakhumi • Habakuki • Sefania • Hagai • Sakharia • Maleakhi

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö