Wb/nia/La'a-la'a gowi
Lö aröu sibai gowi si möi ya'aga. Lö na i ahori sara nafo ba no tarugi ia. Anehe sibai ndra'o da'ö, börö me ero marugi ia, inganga-nganga na sa nafonia inagu na ibörötaigö wohalöŵö.
Ba hiza ma'ökhö no fabö'ö manö moroi ba zi to'ölö. "Hana, Na?", ubali'ödo furi. "Lö wö, nogu. Ha abua dölagu ma'ifu," itema ligu. "Ba hana no afusi mbawau, Na?" Lö hede-hedenia. Ifa'ese ia ma'ifu ba ilau dumadao ba dete gara-kara si so ba zinga lala andrö.
Ufakhölö ndra'o ba u'ila sambua moyo si hombo-hombo ba dalu mbanua. No baga-baga sibai wohombonia. Sökhi sibai. Hulö zanari-nari, abölö töra sökhi moroi ba wanari Nina Wobörö, niha sabölö onekhe manari ba mbanuama.
Urongo li sadö'u-dö'u, itugu ara itugu abölö-bölö. "Hana wa me'e ndra'ugö, Na?" Uhatö'ö ndra'o. U'ila nidanö hörönia mangatoru tou ba gahitania. Itörö tödögu wa asese ihagi-hagi ndra'o ba gahetania andrö me föna me ide-ide nasa ndra'o. Irugi ma'ökhö anehe sibai ndra'o nasa wa ero ihagi ndra'o ba no owua-wua sibai dödögu. Hulö wa'owua-wua dödö Lazaro si dadao ba gahita Gaberahamo ba Zura Ni'amoni'ö sa sese ibaso-baso khögu ba zi bongi fatua lö alau hörögu.
U'efa'ö ndraga moroi ba hulunia. Uhare'ö dangagu ba hulunia ba utalagui ia. Taŵa hörönia mowöi mitou ba dangagu. Urasoi no okafu-kafu, tenga si mane taŵa hörö si to'ölö sanaukhu-naukhu. Lö okafu sibai ba hiza isösö guligu mibakha irugi dölagu. Urasoi wa'abu dödö sawakhö sibai. Hulö na adada dödögu mitou. Ufahasu ndra'o.
Me alö wa'adö'u-dö'unia iŵa'ö khögu, "Talabu, nogu." Ifezaŵa ndraga ba ifalu'igö ba hulunia. "No bagia khö Lowalangi wö, nogu."
Matohugö wofanö irugi marugi gowi khöma. Idölö ia mitou ba zinga göli. Ibe tou ba danö ndraga ba belewa. Ilau manuhi tanö ba ibörötaigö mangandrö. Si mane si to'ölö ilau, ilau mangandrö fatua lö ibörögö wohalöŵö. Lö u'ila hadia nösi wangandrönia. Utötöna wa lumalö miyaŵa ngarö-ngarö dödönia andrö irugi Zokhö, si mane zimbo galitö na mutunu nowi, muhombo hulö zanari-nari irugi mbanua si yaŵa.
"Oi bagiada da'ö, nogu. Heŵa'ae mofökhö-fökhö mboto si lötolalö'ö mohalöŵö ita. Na lö'ö, ba lö öda gowi ba nomo owi." Itörö dödögu wa'ami gowi nirino ba ginötö wemanga. Ami sibai, heŵa'ae ba wa'amarase ba si fao daŵa hörö wangai ya'ia ba danö.
Itörö dödögu namagu si dao-dao ba nomo. Hadia tola göi i'ila daŵa hörö ninagu ba la'a-la'a gowi ni'ania?
Nifa'anö: Sirus Laia (ae fahuhuo)
Umbu: Wikibuku Nias
Nitöngöni: Omuso dödögu na öfazaewe nidunö-dunö andre ba media sosial ma Internet. Böi ya'i olifugö wanötöi heza tehalö ia, ya'ia da'ö moroi ba Wikibuku Nias (simane nisura yaŵa andre).