Wp/vmf/Käldn

Der Adigl is in Nämbercherisch gschriim.

Di Käldn (Hoaloisch: Keldâ) sinn a Volgsschdamm, där bis vor gnabb zwaadausnd Jôôr no in Frangng gleebd hôd.

Wôrschainlichs Urschbrungsgebiid und schbädäre Ausbraidung vo di Käldn zwischär 800 und 400 v. Gr.; gelb: Hallschdaddkuldur (ca. 750–500/450 v. Chr.); grea: La-Deene-Kuldur; rood: Käldische Schbrôôchng im 3. Jôôrhundärd v. Gr.

Ausbraidung und Undergang

Es vermudliche Urschbrungsgebiid fo di Käldn lichd im haidichng Ostfranggraich und Südwesddaidschland. Mä gädd haid dafu aus, dass di Käldn ned in däi Gebiide aigwandärd sinn, sondern, dass se sich aus di voorheerichng brôôsedsaidlichng Kuldurn, wäj zum Baischbill där sognanndn Urnafeldärkuldur endwiggld hômm. Di ärschdn Käldn dauchng in där Hallschdadd-dsaid auf. Im Verlauf fo derer Eboche is in Middloiroba die Aisndsaid oobrochng. In där folchngden La-Deene-Dsaid hômm se si dann immär waidä ausdeend. Am End sind bis Schbanien, Anadolien und af di Bridischn Insln kumma.

In Frangng hômm di Käldn an gandsn Haufm Burchng oddä Siidlunga af Buggl naufbaud. Zum Baischbill af´m Schdafflbärch, afs Walbärla, af die Houbirch und af´m Hesslbärch. Do sichd mär zum Daal bis haid nu die käldischn Wallresde. Im Verlauf vom 1. vorgrisdlichng Jôôrhundärd is di Käldische Kuldur dann in Frangng langsam verschwundn, wall di Römer die käldischn Kärngebiide in Gallien und Süddaidschland aignumma hômm und vo Noddn her germanische Schdämm aibrochng sinn. Die Käldn sinn dann in di massdn Gebiide fo Oiroba rächd schnell romanisiird oddär germanisiird worn, je nachdem woo´s gwoond hômm.

Di Käldn haidzudôôch

Käldische Schbroochn hen si in Wäjls (Wales) und daalwais aa in Ârland (Ireland), Schoddland, Koornwôll (Cornwall) und där Bredanje bis haid ghaldn. A bôôr käldische Oddsnôma sinn obbä aa in Frangng iibri bliim, zum Baischbill där Maa (daidsch: Main). Zu dämm hômm scho di aldn Käldn Moin gsachd.

Beleech

Markus Schußmann: Die Kelten in Bayern. Archäologie und Geschichte (Archäologie in Bayern Monografien). Friedrich Pustet, 2. Auflage, Regensburg 2020.
Astrid Petersmann: Die Kelten. Eine Einführung in die Keltologie aus archäologisch-historischer, sprachkundlicher und religionsgeschichtlicher Sicht. Universitätsverlag Winter, Heidelberg 2016

Im Nedz