Wp/vmf/Affld

Mä ko ned sooch wos für an fränggischen Dialägd dä Adiggl hod. (Adigl nach Dialägd).

Affld (Eichfeld) is ä Kaff in Unnäfrangn des wo zu dem Schdäddla Volgach (Volkach) im Landgreis Kitzinge (Kitzingen) gherd und wo fei zirga 450 Eenwohner had.

Des Käffla liicht ô dä Meeschleifn un is landwirdschafddlich gebräächd.

Gschichdn

Des ärschde môl wo ma des ghörd had wa 906, abär damôls had des no Aachiveld ghessn, was so was wie Lichdung in dem Aachnwôld bedoid. Affld wa damals fei ah noch glennä und had nuä aus so äm Bauänhof un den Wohnungä von dennä Leibaichene beschdannä. Des Kaff had dem frängghischn Kaisä Arnulf von Kärndn ghert, ôba dea had des dann dennä Läid vo dem Raichsglosder vo Fulda gschenggd.

Also ungfäär 1200 had's dem Grafn vo Gasdell gherd, abär da hads dann fei scho Echfelt ghessn. So ab 1300 ham sich a bôôr Adliche die Herrschafdd übär des Kaff gedaild, un am 16. Novembär im Jôôr 1339 wurd's dann als ärschdär Deil vo Volgach ä selbsdschdändigä Pfarrai. Die Sanggd Sdefanusgirchn (St. Stephanuskirche) ham se im waarschainlich im 14. Jôôrhunnerd gebaud, un die ganzn Gaden (so rundä Räim wo ma als Lôôcher nemm kann) ham se damals no als Gfängnis benudsd.

Zirga 1550 had des Kaff dann Eichuelt ghessn und dann ham die Läid des evangelisch gmachd. Die Läid die wo im Umfäld (des wo fei gadolisch war) drodsdem ihre evangelische Religion bragdiziern wolldn sin dann ä zaid lang nô Affld gangä um da Zufluchd zu findn. Wail Volgach un die annern Käffer größdndails gadolisch sin is Affld said 1977 ah für die evangelische Gemainde in Volgach zuschdändich.

Said 1972 is Affld offiziell ä Gemaindn vo Volagch un deswegn ham se die Schuln, des Radhaus un die Posdschdelln zugemachd. Im Jôôr 1989 (da wo fei ah die Mauär in Bärlin umgflochn is) ham die Afflder des 1100-järiche Jubiläum gfaierd.

Nachbôrkaff Rimbi

Also ungfähr 3 Kilomedär nördlich vo Affld is des Nachbôrkaff Rimbi (Rimbach) und die möchn sich fei ned so ganz, wail der enne immer denggd er is bessär als der annere un andersrum. Die schdraidn ah immär wer die besseren Fesde had. Die Rimbier ham no zusädslich zu den annern Fesdn (Kirchwai, Dorffesd, Johannesfeuer un so) des Amifest, wo vo so äm Ami veranschdalded wird. Ledsdendlich is zu erwardn dass der Schdraid no bis in die Ewichgaid waidergehd.

Sehnswürdichgaidn un Eenrichdungä

Sanggd Schdefanusgirchn
Friedhofsbordal
Griecherdengmal
Dorfbrunnä
Kuldurschäine Affld
Evangelischär Kindergardn
Schbordverain (SV 1973 Eichfeld e.V.), da kô'mma Fußbôll, Dennis un Wollibôll schbieln.

Gwellnbeleche

Eichfeld: 1100 Jahre Ortsgemeinde. 650 Jahre Kirchengemeinde, Festschrift
Castell - Grafschaft und Dekanat, Eichfelder Chronik von Pfarrer Heinrich Thum

Im Nedz