Wp/syl/ꠎꠣꠚꠟꠋ

tourist attraction
Country	Bangladesh
Coordinate location	25°9′48″N 92°1′3″E

ꠎꠣꠚꠟꠋ ꠅꠁꠟꠧ ꠉꠤ ꠛꠣꠋꠉꠟꠣꠖꠦꠡꠞ ꠍꠤꠟꠐꠞ ꠉꠥꠀꠁꠘꠊꠣꠐ ꠃꠚꠎꠦꠟꠣꠔ ꠄꠉꠥ ꠚꠣꠈꠣꠘꠤꠞ ꠎꠣꠉꠣ ⁕ ꠎꠣꠚꠟꠋ ꠨ ꠍꠤꠟꠐ ꠐꠣꠃꠘ ꠕꠘꠦ ৬২ ꠇꠤꠟꠥꠝꠤꠐꠣꠞ ꠃꠔ꠆ꠔꠞ-ꠚꠥꠛꠦ ꠖꠤ ꠨ ꠄꠘ꠆ꠒꠀꠞ ꠝꠦꠊꠣꠟꠄ ꠛꠒꠣꠞꠞ ꠟꠉꠦ ꠈꠣꠡꠤꠀ-ꠎꠂꠘ꠆ꠔꠣ ꠐꠤꠟ꠆ꠟꠣꠞ ꠚꠣꠠꠅ ꠨ ꠀꠞ ꠁꠈꠣꠘ ꠐꠤꠟ꠆ꠟꠣ ꠀꠞ ꠉꠣꠋ ꠄꠈꠟꠉꠦ ꠝꠤꠡꠍꠦ ꠈꠞꠤ ꠛꠣꠋꠉꠟꠣꠖꠦꠡꠞ ꠄꠉꠥ ꠚꠣꠈꠣꠘꠤꠞ ꠎꠣꠉꠣ ꠢꠤꠡꠣꠛꠦ ꠢꠈꠟꠦ ꠍꠤꠘꠦ ⁕

ꠛꠞ꠆ꠘꠘꠣ[edit | edit source]

ꠛꠣꠋꠟꠣꠖꠦꠡꠞ ꠍꠤꠟꠐꠞ ꠛꠒꠣꠞ ꠄꠟꠣꠇꠣꠔ ꠎꠣꠚꠟꠋ ꠚꠞꠍꠦ ⁕ ꠁꠈꠣꠘꠞ ꠃꠟꠐꠣꠛꠣꠄ ꠜꠣꠞꠔꠞ ꠒꠣꠅꠇꠤ ꠅꠘ꠆ꠌꠟ ⁕ ꠒꠣꠅꠇꠤ ꠅꠘ꠆ꠌꠟꠞ ꠚꠣꠢꠣꠠ ꠔꠘꠦ ꠒꠣꠅꠇꠤ ꠉꠣꠋ ꠎꠣꠚꠟꠋ ꠝꠥꠇꠣꠄ ꠛꠣꠋꠟꠣꠖꠦꠡ ꠢꠣꠝꠣꠁꠍꠦ ⁕ ꠝꠥꠟꠔ ꠙꠤꠀꠁꠘ ꠉꠣꠋꠉꠞ ꠚꠣꠠꠞ ꠝꠣꠏꠦ ꠎꠣꠚꠟꠋ ꠎꠥꠠꠤꠀ ꠀꠍꠦ ⁕

ꠛꠣꠋꠟꠣꠖꠦꠡ ꠍꠣꠁꠞ ꠎꠣꠔꠤ ꠒꠣꠐꠐꠣ ꠚꠣꠔ꠆ꠔꠞ ꠝꠤꠟꠦ ꠨ ꠄꠞꠝꠣꠏ ꠔꠘꠦ ꠜꠥꠟꠣꠉꠘ꠆ꠎ-ꠎꠣꠚꠟꠋꠅ ꠝꠤꠟꠦ ꠈꠘꠣꠈꠘꠣ ꠒꠣꠐꠐꠣ ꠚꠣꠔ꠆ꠔꠞ ⁕ ꠄꠍꠣꠠꠣ ꠛꠣꠞꠤꠡꠣꠔ ꠁꠘꠒꠤꠀꠞ ꠛꠒꠣꠞꠞ ꠟꠣꠉꠣ ꠡꠤꠟꠋ ꠝꠣꠟꠜꠥꠝꠤꠞ ꠚꠣꠢꠣꠠ ꠅꠈꠟ ꠈꠦꠍꠣꠈꠦꠍꠤ ꠝꠦꠊ ꠅꠁꠟꠦ ꠅꠔꠣ ꠚꠣꠢꠣꠠ ꠔꠘꠦ ꠒꠣꠅꠇꠤ ꠉꠣꠋꠉꠞ ꠚꠥꠔꠞ ꠟꠉꠦ ꠛꠣꠁꠣ ꠀꠄ ꠛꠣꠘꠣꠛꠣꠘꠣ ꠛꠟꠒꠣꠞ ꠅꠈꠟ ⁕ ꠄꠞꠖꠣꠄꠅ ꠍꠤꠟꠐ ꠄꠟꠣꠇꠣꠞ ꠎꠣꠚꠟꠋ-ꠅꠞ ꠉꠣꠋꠉ ꠎꠔ ꠚꠣꠔ꠆ꠔꠞ ꠝꠤꠟꠦ ⁕ ꠀꠞ ꠁ ꠄꠟꠣꠇꠣꠞ ꠛꠃꠔ ꠝꠣꠘꠥꠡꠞ ꠎꠤꠛꠘ ꠎꠤꠛꠤꠇꠣ ꠉꠠꠦ ꠃꠑꠦꠍꠦ ꠁ ꠚꠣꠔ꠆ꠔꠞ ꠔꠥꠟꠣꠞꠦ ꠜꠤꠔꠔꠤ ꠈꠞꠤ ⁕

ꠎꠣꠚꠟꠋ ꠚꠣꠔ꠆ꠔꠞ ꠍꠣꠠꠣꠅ ꠝꠤꠟꠍꠦ ꠖꠟꠣꠝꠣꠐꠤ ꠛꠣ ꠍꠤꠘꠣꠝꠣꠐꠤꠅ ꠨ ꠎꠥꠖꠤꠘꠅ ꠢꠤꠘꠅ ꠝꠣꠐꠤ ꠛꠣ ꠛꠣꠟꠥ ꠍꠣꠈꠣꠞ ꠝꠔ ꠇꠥꠘꠔꠣ ꠘꠣꠁ ⁕

ꠁ ꠄꠟꠣꠇꠣꠔ ꠎꠦꠟꠣꠘ ꠡꠣꠗꠣꠞꠘ ꠛꠣꠋꠉꠣꠟꠤ ꠅꠈꠟꠦ ꠊꠞꠉꠣꠁꠐ ꠈꠞꠂꠘ ꠨ ꠅꠟꠣꠘ ꠊꠞꠉꠣꠁꠐ ꠈꠞꠂꠘ ꠃꠚꠎꠣꠔꠤ ꠅꠈꠟꠦꠅ ⁕ ꠎꠣꠚꠟꠋ-ꠅꠞ ꠛꠟ꠆ꠟꠣ ꠨ ꠡꠋꠉ꠆ꠞꠣꠝꠙꠥꠘ꠆ꠎꠤ ꠨ ꠘꠇꠡꠤꠀꠙꠥꠘ꠆ꠎꠤ ꠨ ꠟꠣꠝꠣꠙꠥꠘ꠆ꠎꠤ ꠀꠞ ꠙ꠆ꠞꠔꠣꠙꠙꠥꠞ ꠎꠥꠠꠤꠀ ꠞꠁꠍꠦ ৫ꠐꠣ ꠈꠣꠡꠤꠀꠙꠥꠘ꠆ꠎꠤ ⁕ ꠝꠣꠘꠥꠡꠉꠘꠣ ꠀꠘꠝꠣꠘ ꠎꠣꠚꠟꠋ-ꠅ ১ ꠨৯৫৩ ꠎꠘ ꠈꠣꠡꠤꠀ ꠃꠚꠎꠣꠔꠤ ꠊꠞꠉꠣꠁꠐ ꠈꠞꠂꠘ ⁕

ꠁꠔꠤꠀꠡ[edit | edit source]

ꠁꠔꠤꠀꠡꠛꠤꠖ ꠅꠈꠟꠞ ꠝꠔꠦ ꠈꠄꠈ ꠀꠎꠣꠞ ꠛꠍꠞ ꠗꠞꠤ ꠎꠣꠚꠟꠋ ꠀꠍ꠆ꠟ ꠈꠣꠡꠤꠀ ꠎꠂꠘ꠆ꠔꠣ-ꠞꠣꠎꠣꠞ ꠅꠗꠤꠘꠦ ꠕꠣꠈꠣ ꠄꠈ ꠘꠤꠞꠣꠁ ꠀꠠꠣꠏꠋꠟꠣ ⁕ ১৯৫৪ ꠈꠤꠡ꠆ꠐꠣꠛ꠆ꠖꠔ ꠎꠝꠤꠖꠣꠞꠤ ꠚꠕꠣꠞ ꠡꠦꠡ ꠅꠁꠟꠦ ꠈꠣꠡꠤꠀ-ꠎꠂꠘ꠆ꠔꠣ ꠞꠣꠁꠎ꠆ꠎꠞ ꠅꠛꠡꠣꠘ ꠊꠐꠟꠦꠅ ꠛꠃꠔ ꠛꠍꠞ ꠎꠣꠚꠟꠋꠅꠞ ꠛꠤꠍꠔꠤꠞ꠆ꠘ ꠄꠟꠣꠇꠣ ꠚꠔꠤꠔ ꠀꠍ꠆ꠟ ⁕ ꠛꠣꠖꠦ ꠛꠦꠚꠣꠞꠤ ꠅꠈꠟꠦ ꠚꠣꠔ꠆ꠔꠞ ꠔꠥꠇꠣꠘꠤꠔ ꠛꠃꠔ ꠄꠟꠣꠇꠣ ꠔꠘꠦ ꠉꠣꠊꠉꠦꠖꠤ ꠎꠣꠚꠟꠋ ꠀꠁꠔꠦ ꠡꠥꠞꠥ ꠈꠞꠂꠘ ꠨ ꠀꠞ ꠚꠣꠔ꠆ꠔꠞ ꠛꠦꠛꠡꠣꠞ ꠚꠡꠣꠞ ꠊꠐꠔꠦ ꠕꠣꠈꠟꠦ ꠄꠇꠡꠝꠄꠇꠥ ꠉꠠꠤ ꠅꠑꠦ ꠘꠄꠀ ꠛꠡꠔꠤ ⁕ ১৯৭১ ꠡꠣꠟꠞ ꠛꠣꠋꠟꠣꠖꠦꠡꠞ ꠝꠥꠇ꠆ꠔꠤꠎꠥꠖ꠆ꠖꠞ ꠛꠣꠟꠣ ꠍꠤꠟꠐ ꠝꠥꠇ꠆ꠔꠤꠎꠥꠖ꠆ꠖꠣꠁ꠆ꠔꠞ ꠇꠦꠝ꠆ꠙ ꠀꠍꠤꠟ ꠎꠣꠚꠟꠋꠅꠞ ꠛꠒꠣꠞꠞ ꠢꠚꠣꠞꠦ ꠜꠣꠞꠔꠞ ꠒꠣꠃꠇꠤꠔ ⁕ ১৩ ꠎꠥꠟꠣꠁ ꠁꠙꠤꠀꠞ ꠅ ꠁꠡ꠆ꠐ ꠛꠦꠋꠉꠟ ꠞꠦꠎꠤꠝꠦꠘ꠆ꠐꠞ ꠡꠖꠁꠡ꠆ꠡ ꠅꠈꠟꠞ ꠄꠈ ꠅꠍ꠆ꠞꠗꠣꠞꠤ ꠖꠟ ꠎꠣꠚꠟꠋ ꠓꠥꠇꠦ ⁕ ꠔꠣꠝꠣꠛꠤꠟ ꠡ꠆ꠕꠟ ꠛꠘ꠆ꠖꠞꠞ ꠡꠥꠟ꠆ꠇ ꠅꠚꠤꠡꠞ ꠈꠣꠘꠖꠣꠔ ꠞꠁꠍꠦ ꠝꠥꠇ꠆ꠔꠤꠎꠥꠖ꠆ꠖꠔ ꠡꠢꠤꠖ ꠅꠈꠟꠞ ꠉꠘꠈꠄꠛꠞ ⁕

ꠖꠦꠈꠣꠞ ꠍꠤꠎ[edit | edit source]

ꠎꠣꠚꠟꠋ-ꠅꠞ ꠛꠣꠋꠟꠣꠖꠦꠡ ꠛꠒꠣꠞ ꠃꠛꠣꠁꠟꠦ ꠜꠣꠞꠔ ꠛꠒꠣꠞꠞ ꠜꠤꠔ꠆ꠞꠦ ꠕꠣꠈꠣ ꠃꠍꠣ ꠃꠍꠣ ꠐꠤꠟꠟꠣꠞ ꠢꠣꠁꠞ ꠖꠦꠈꠣ ꠎꠣꠄ ⁕ ꠁꠔꠣ ꠚꠣꠢꠣꠠ ꠘꠝꠦ ꠘꠣꠝꠤ ꠀꠅꠀ ꠏꠘ꠆ꠘꠣ ꠛꠦꠠꠣꠅꠞꠣꠁꠘ꠆ꠔꠞ ꠎꠦ ꠚꠍꠘ꠆ꠖꠞ ⁕ ꠀꠞ ꠜꠣꠞꠔꠞ ꠒꠣꠃꠇꠤ ꠛꠘ꠆ꠖꠞꠞ ꠟꠐꠈꠣꠁꠟ ꠚꠥꠟꠅ ꠚꠣꠉꠟ ꠈꠞꠦ ꠛꠃꠔꠞꠦ ⁕ ꠀꠞ ꠢꠣꠚꠞ ꠟꠣꠈꠣꠘ ꠍꠟꠣ ꠒꠣꠅꠇꠤ ꠉꠣꠋꠅ ꠚꠣꠉꠟ ꠈꠞꠦ ꠛꠃꠔꠞꠦ ⁕ ꠝꠃꠡꠥꠝꠤ ꠀꠛꠢꠣꠅꠀꠞ ꠁ ꠛꠒꠣꠞꠅ ꠈꠦꠍꠣꠈꠦꠍꠤ ꠝꠦꠊ ꠚꠠꠟꠦ ꠉꠣꠋꠉꠞ ꠚꠥꠔ ꠛꠣꠠꠤ ꠉꠦꠟꠦ ꠉꠣꠋꠉꠦ ꠚꠤꠞꠤ ꠚꠣꠞ ꠁꠉꠥꠞ ꠎꠣꠘ ꠨ ꠀꠞ ꠅꠁꠀ ꠃꠑꠦ ꠖꠦꠈꠣꠞ ꠝꠔꠘ ⁕ ꠒꠣꠅꠇꠤ ꠉꠣꠋꠉꠞ ꠚꠘ ꠚꠣꠘꠤ ꠅ ꠎꠣꠚꠟꠋ-ꠅꠞ ꠅꠁꠘ꠆ꠘꠔꠝ ꠀꠇꠞ꠆ꠡꠘ ⁕ ꠚꠄꠟꠣ ꠛꠂꠡꠣꠉꠅ ꠛꠣꠋꠟꠣ ꠘꠄꠀ ꠛꠞꠍꠞꠦ ꠇꠦꠘꠖ꠆ꠞ ꠈꠞꠤ ꠎꠣꠚꠟꠋ-ꠅ ꠛꠂꠡꠣꠈꠤ ꠝꠦꠟꠣ ꠛꠄ ⁕ ꠛꠣꠞꠤꠡꠣ ꠀꠞ ꠡꠤꠔꠅ ꠎꠣꠚꠟꠋ-ꠅ ꠀꠟꠣꠖꠣ ꠀꠟꠣꠖꠣ ꠡꠃꠘ꠆ꠖꠞ꠆ꠎ ꠖꠦꠈꠣ ꠎꠣꠄ ⁕ ꠛꠣꠞꠤꠡꠣꠔ ꠝꠦꠊꠟꠣꠉꠣ ꠈꠍꠥꠀ ꠉꠣꠍꠉꠣꠍꠣꠟꠤ ꠀꠞ ꠚꠥꠔ-ꠀꠟꠣ ꠉꠣꠋ ꠕꠣꠈꠦ ꠖꠦꠈꠣꠞ ꠝꠔ ⁕ ꠀꠞ ꠚꠣꠢꠣꠠꠞ ꠐꠥꠟꠟꠤꠔ ꠈꠣꠟꠘꠤꠞ ꠖꠤꠡꠡ ꠈꠣꠟꠤ ꠖꠦꠈꠣꠞ ꠝꠘꠌꠣꠄ ⁕

ꠎꠤꠛ ꠎꠣꠘꠥꠀꠞ[edit | edit source]

ꠎꠣꠚꠟꠋ ꠅꠘ꠆ꠌꠟꠞ ꠉꠣꠍꠉꠣꠍꠣꠟꠤ ꠚꠎꠣꠔꠤꠞ ꠝꠣꠏꠦ ꠛꠣꠐꠐꠤ ꠎꠣꠔꠞ ꠙꠣꠝ ꠉꠣꠍ (Licuala species) ꠖꠦꠈꠣ ꠎꠣꠄ ⁕

ꠎꠣꠚꠟꠋ ꠘꠣꠁꠇꠟ ꠀꠞ ꠉꠥꠀ ꠉꠣꠍꠞꠦ ꠇꠦꠘ꠆ꠖ꠆ꠞ ꠈꠞꠤ ꠕꠣꠈꠦ ꠎꠔ ꠛꠣꠖꠥꠠꠣꠁꠘ ⁕ ꠄꠍꠣꠠꠣ ꠎꠣꠚꠟꠋ ꠛꠣꠎꠣꠞ ꠘꠣꠄ ꠎꠣꠚꠟꠋ ꠎꠝꠤꠖꠣꠞ ꠛꠣꠠꠤꠔꠅ ꠛꠣꠖꠥꠠꠞ ꠐꠣꠁ ꠞꠁꠍꠦ ⁕ ꠎꠥꠖꠤꠘꠅ ꠈꠣꠘꠤꠞꠡꠋꠇꠐ ꠀꠞ ꠝꠣꠘꠥꠡꠞ ꠃꠔꠚꠣꠔꠦ ꠨ ꠘꠣꠄ ꠛꠦꠘꠣꠟꠦ ꠉꠣꠍꠈꠣꠐꠣꠄ ꠛꠃꠔ ꠛꠣꠖꠥꠠ ꠎꠣꠚꠟꠋ ꠍꠣꠠꠤꠀ ꠎꠂꠘ꠆ꠔꠤꠀ ꠀꠞ ꠉꠥꠀꠁꠘꠊꠣꠐꠞ ꠐꠤꠇꠤꠀ ꠕꠣꠈꠣ ꠀꠠꠣ-ꠎꠋꠟꠣꠔ ꠨ ꠛꠣ ꠟꠣꠉꠣ ꠖꠦꠡ ꠜꠣꠞꠔ ꠎꠣꠞ ꠉꠤ ⁕

ꠚꠞꠤꠛꠦꠡꠞ ꠈꠔꠤ[edit | edit source]

ꠎꠣꠚꠟꠋ-ꠅꠞ ꠚꠣꠔ꠆ꠔꠞ ꠡꠤꠟ꠆ꠙ ꠄꠈꠛꠣꠄ ꠎꠦꠟꠣꠘ ꠁ ꠄꠟꠣꠇꠣꠞꠦ ꠢꠇ꠆ꠇꠟ ꠅꠘ꠆ꠌꠟꠞ ꠉꠦꠍꠦ ꠚꠞꠤꠍꠤꠔ ꠈꠞꠍꠦ ꠨ ꠅꠟꠣꠘ ꠁ ꠚꠣꠔ꠆ꠔꠞ ꠡꠤꠟ꠆ꠙꠞ ꠎꠦꠝꠘꠦꠔꠦꠝꠘꠦ ꠛꠤꠡ꠆ꠔꠣꠞꠞ ꠟꠣꠉꠤ ꠄꠟꠣꠇꠣꠞ ꠛꠣꠔꠣꠡꠞꠦ ꠖꠥꠡꠤꠔ ꠈꠞꠤꠟꠍꠦ ⁕ ꠎꠘ꠆ꠔ꠆ꠞꠞ ꠡꠣꠁꠎ꠆ꠎꠦ ꠇꠥꠟꠣꠝꠦꠟꠣ ꠡꠤꠡꠐꠝꠦ ꠚꠣꠔ꠆ꠔꠞ ꠜꠣꠘꠣꠞ ꠖꠣꠄ ꠜꠣꠋꠉꠣ ꠚꠣꠔ꠆ꠔꠞꠞ ꠉꠥꠠꠣ ꠈꠣꠘ꠆ꠖꠣꠈꠣꠍꠣꠞ ꠄꠟꠣꠇꠣꠔ ꠍꠤꠔ꠆ꠞꠤꠀ ꠚꠠꠍꠦ ꠀꠞ ꠡꠣꠗꠣꠞꠘꠞ ꠝꠥꠀ ꠚꠣꠟꠣꠘꠤꠔ ꠈꠔꠤ ꠈꠞꠦꠞ ⁕ ꠀꠞ ꠡꠞꠇꠣꠞꠤ ꠛꠤꠗꠤꠘꠤꠡꠦꠖꠞ ꠔꠥꠀꠇ꠆ꠇꠣ ꠘꠣ ꠈꠞꠤ ꠉꠣꠋ ꠔꠘꠦ ꠎꠦꠝꠘꠦ ꠝꠘꠦꠍꠣꠄ ꠚꠣꠔ꠆ꠔꠞ ꠉꠣꠋꠉꠞ ꠎꠤꠛ ꠀꠞ ꠉꠣꠍꠚꠣꠟꠣꠞꠦ ꠢꠥꠝꠇꠤꠞ ꠝꠥꠇ ꠚꠣꠟꠣꠁꠍꠦ ⁕ ꠀꠞ ꠛꠤꠘꠣ ꠚꠣꠞꠝꠤꠡꠘꠦ ৩০-৩৫ ꠚꠥꠐ ꠉꠣꠔꠈꠞꠤ ꠚꠣꠔ꠆ꠔꠞ ꠔꠥꠟꠣ ꠉꠣꠋ ꠀꠞ ꠉꠣꠋꠉꠞ ꠟꠛꠞ ꠝꠣꠐꠤꠞꠦ ꠢꠥꠝꠇꠤꠔ ꠚꠣꠟꠣꠁꠍꠦ ⁕ ꠁꠛꠣꠄ ꠃꠎꠣꠘ ꠔꠘꠦ ꠘꠣꠝꠤ ꠀꠅꠀ ꠛꠣꠟꠥ ꠀꠞ ꠚꠣꠔ꠆ꠔꠞꠦ ꠡꠄꠟꠣꠛ ꠅꠁꠀ ꠚꠤꠀꠁꠘ ꠉꠣꠋꠉꠞ ꠘꠤꠘ ꠈꠝꠤ ꠉꠦꠍꠦ ⁕ ꠎꠣꠞꠖꠣꠄ ꠀꠈꠔꠣ ꠃꠎꠣꠘ ꠕꠣꠇꠤ ꠀꠅꠀ ꠓꠟꠦ ꠈꠔꠤ ꠈꠞꠤꠟꠣꠄ ꠈꠣꠘ꠆ꠖꠣꠈꠣꠍꠣꠞ ꠅꠘ꠆ꠌꠟꠞ ꠝꠣꠘꠥꠡꠞ ꠎꠤꠛꠘ-ꠎꠤꠛꠤꠇꠣ; ꠎꠦꠟꠣꠘ: ১৯৮৮ ꠈꠤꠡ꠆ꠐꠣꠛ꠆ꠖꠔ ꠒꠣꠃꠇꠤ ꠛꠒꠣꠞꠅ ꠅꠟꠣꠘ ꠃꠎꠣꠘ ꠕꠣꠇꠤ ꠀꠅꠀ ꠓꠟꠦ ꠛꠤꠒꠤꠀꠞ ꠇꠦꠝ꠆ꠙ ꠡꠢ ꠛꠣꠇꠇꠣ ꠄꠟꠣꠇꠣ ꠟꠘ꠆ꠒꠜꠘ꠆ꠒ ꠈꠞꠤ ꠟꠣꠄ ⁕ ২০০৯ ꠈꠤꠡ꠆ꠐꠣꠛ꠆ꠖꠞ ২০ ꠝꠦ ꠔꠣꠞꠤꠇꠅ ꠅꠎꠣꠔꠤ ꠓꠟꠦ ꠈꠔꠤ ꠈꠞꠦ ꠍꠣ-ꠛꠣꠉꠣꠘ ꠡꠁꠔꠦ ꠛꠡꠔꠤ ⁕ ꠄꠍꠣꠠꠣ ꠘꠤꠡꠤꠖ꠆ꠖ "ꠛꠝꠣ ꠝꠤꠡꠤꠘ" ꠖꠤ ꠉꠣꠋ ꠔꠘꠦ ꠚꠣꠔ꠆ꠔꠞ ꠔꠥꠟꠣꠞ ꠈꠣꠞꠘꠦ ꠔꠣꠘꠤꠅ ꠚꠤꠀꠁꠘ ꠉꠣꠋꠉꠞ ꠛꠘ꠆ꠘꠣ ꠀꠐꠈꠣꠘꠤꠞ ꠛꠣꠘ꠆ꠗ ꠜꠣꠋꠉꠤꠀ ꠛꠃꠔ ꠡꠝ꠆ꠙꠖꠞ ꠅꠚꠍꠄꠅ ꠚꠞꠤꠛꠦꠡ ꠛꠤꠚꠞ꠆ꠎꠅꠞ ꠅꠁꠘ꠆ꠘꠔꠝ ꠄꠈ ꠈꠣꠞꠘ ⁕

ꠀꠅꠀ-ꠎꠣꠅꠀ[edit | edit source]

১৯৮০'ꠞ ꠖꠡꠇꠅ ꠍꠤꠟꠐꠞ ꠟꠉꠦ ꠎꠣꠚꠟꠋ-ꠅꠞ ৫৫ ꠇꠤꠟꠥꠝꠤꠐꠣꠞ ꠡꠠꠇ ꠔꠣꠁꠀꠞ ꠅꠀꠄ ꠖꠦꠡꠞ ꠅꠁꠘ꠆ꠘꠣꠁꠘ꠆ꠘ ꠢꠇ꠆ꠇꠟ ꠅꠘ꠆ꠌꠟ ꠔꠘꠦ ꠁ ꠄꠟꠣꠇꠣꠞ ꠟꠉꠦ ꠡꠠꠇ-ꠎꠥꠉꠣꠎꠥꠉ ꠙ꠆ꠡꠥꠞꠥ ꠅꠄ ⁕ ꠍꠠꠈꠛꠣꠄ ꠍꠤꠟꠐ ꠡꠖꠞ ꠔꠘꠦ ꠁ ꠎꠣꠉꠣ ৫৬ ꠇꠤꠟꠥꠝꠤꠐꠣꠞ ꠖꠥꠞꠁ ⁕ ꠎꠣꠚꠟꠋ ꠎꠤꠞ ꠙꠄꠘ꠆ꠐ ꠞꠁꠍꠦ ꠔꠣꠝꠣꠛꠤꠟ ꠁꠍꠕꠟ ꠛꠘ꠆ꠖꠞ ꠨ ꠁ ꠛꠘ꠆ꠖꠞ ꠖꠤ ꠒꠦꠁꠟꠦ ꠜꠣꠞꠔꠞ ꠟꠉꠦ ꠉꠤꠘꠡ ꠀꠘꠣ-ꠘꠦꠅꠀ ꠈꠞꠣ ꠅꠄ ⁕ ꠛꠤꠡꠦꠡ ꠈꠞꠤ ꠜꠣꠞꠔ ꠕꠣꠇꠤ ꠈꠄꠟꠣ ꠀꠘꠣꠘꠤ ꠅꠄ ⁕