Wp/sel/Малҗӓнват эд

Малҗӓнва эд (руж. Молчаново; чуй. Молтя йед, Малтянма йед) - Топӄэл ӄадэрӷэл эд ай хелал Малҗӓнвэл аймат ҷонҗ эя. Нынд кӧншэнанэл 3000 ӄула варгадэт умби (2015 пот 1 кандэл аред ада́ ).

Ҷвэҷ-эӄӄумба

Малҗӓнва Ӄолдэт квэдэл пелекаӷэт ныӈга́. Оӄӄэр кыт ӄэӷыт (эдэт ҷвэҷогэт) ӄэтпароӷэт кыба шӧт ай эд э́я, арӄ Ӄолдэт ӄэт парогыт ӄамҗэмбэдэл нӧр иппа. Начат таэт (ӄвэ́ӷэрэл аре́д) маҗэлӷула чворлаӷэт кэнҗадыт ай у́решпадэт. Лымбэл аред мананҗли́ хелак на нӧрла ӄамҗэмба.

Малҗӓнваӷэт Токовое (Тыковушка ӄулал шэҳе) то э́я, начат хелал таэт ӄула у́решпадэт ай нучелдэлап нӯльҗешпадэт. На эдӷэт ӄэла Топӄот кочея, оӄӄэр эдэт ҷонҗогыт ваттэт кӧӷэт кек пырӷ ӄэ э́я, ундо нача́ӷындо ӄоднай тара́ пактэмба.

Эд уѓот таре эҳа. Малҗӓнват ир чат урук кыбаек тӓнваут. 1702 пот ружэл ма́дурсэӷ Молчанов ай Лавров шэдэӷу́т Ӄолдэт ӄэт и́лӷэт эдэп омдэлҗэмбадыт. Табла шэд кыба эдлап омдэлҗэмбадыт, ундо каче́ оӄӄэрдэл ӄаратӄо эҗембат. Каче́ Малҗӓнват эд конэ́ орвешпыҳа, ныльҗик ти̇ э́помында. Колдэл пелекат илӷэт ти̇ ӄандуна ӄоднай варга́, ако аратпи̇ла ай алка́шла нынд калымба. Ӄолдэт ӄэт ӄӧӷэт ӄвэ́лҷэдэл алаколап ӄвэ́җешпадэт - ти̇ ако́ тӱла́нд ныӈгадэт, уго́т варӷ тӱлалагóла Ӄолдэутэ ҷаҗэшпыҳадэт (пая́лҗыгала ӄадэ́шпат). Угот эдӷэл ӄула Маслозаводӷэт, Рыбзаводгэт ай Кирпичзаводӷэт уҗешпыҳат, нашаӄӄэт на мáдла чаӈгвадэт мо аха уҗӓт. Малҗӓнваӷэндо ӱҷэҗéла квэ́нголбадэт натӄо уҗела а хе́мек.