Wp/rsk/Михайло Фирак
| Михайло Фирак | |
|---|---|
| Народзени | 21. новембра 1897. |
| Умар | 16. юния 1984. |
| Державянство | русийске, югославянске |
| Язик творох | руски, українски |
| Школа | Ґимназия у Заґребе |
| Универзитет | Богословия у Любляни и Сараєве |
| Период твореня | 1921—1962. |
| Жанри | богословиє, редактура |
| Поховани | на заґребским теметове Мирошевац |
Михайло Фирак (*21. новембра 1897—†16. юния 1984) вельорочни редактор Руских новинох и Рідного слова, парох раєвоселски и керестурски.
Биоґрафия
Михайло Фирак ше народзел 21. новембра 1897. року у месце Ляцке Вельке (Україна), од оца Павла и мацери Ирини (дзивоцке презвиско Захарчук). Кед му було 7 роки, його фамилия ше приселєла до Канижи у Славониї. Основну школу Михайло Фирак закончел у Канижи. Ґимназию закончел у Заґребе як питомец грекокатолїцкей семинариї на Ґричу. Богословию студирал у Любляни и Сараєве. По законченю студийох Михайло Фирак ше оженєл зоз Ану Планчак, а за священїка є пошвецени 13. новембра 1921. року. Пошвецел го крижевски владика др Дионизий Няради.
Душпастирска и редакторска робота
Дня 1. децембра 1921. року о. Михайло Фирак поставени за управителя парохиї у Радатовичох (Жумберак). Од 1. октобра 1922. до 30. октобра 1924. року є управитель парохиї у Сибиню, одкаль 31. октобра преходзи за капелана до Руского Керестура и ту служи до 31. марца 1927. року. Од 1. априла 1927. по 30. септембер 1936. року о. Михайло Фирак управитель парохиї у Пишкуревцох.
Под час службованя у Пишкуревцох вон обновел видаванє Руских новинох, гоч формално нє бул їх одвичательни редактор од 28. авґуста 1931. аж по 6. април 1941. року. Видал и два Руски календари (1933-1934).
По шмерци керестурского пароха о. Михайла Мудрого, о. Михайло Фирак з декретом Святого Апостолского Римского Пристолу од 23. юния 1938. року меновани за пароха до Руского Керестура, алє парохиялну управу превжал 1. октобра 1936. року и теди ше приселєл до Керестура. Вироятно на тото вплївовал и факт же бул редактор новинох, а теди закончена и друкарня РНПД у Керестуре, та ше у нєй од Крачуна 1937. року почали друковац и Руски новини. Ту о. Фирак почал видавац и новини на українским язику Рідне слово.
Паноцове Михайло Фирак и Михайло Черняк, обидвоме зоз Ґаличини, заступали радикалнєйшу проукраїнску линию у рускей явносци. Вони предкладали же би Руснаци место свойого локалпатриотизма и язика прилапели українски литературни язик и українску свидомосц. Фирак тото думанє ширел и прейґ Руских новинох хтори ушорйовал од 1931. по 1941. рок. Источашнє, як тварди антикомунисти, у прилогох о шпанскей гражданскей войни потримовали „народне войско“ ґенерала Франка. Паноцец Фирак у руских новинох указовал вельо розуменя за диктатора Мусолиния.
Под час Другей шветовей войни мадярски окупаторски власци вигнали о. Михайла Фирака до Горватскей. Преселєл ше до Осиєку и там жил до 1955. року. Теди ше преселєл до Крижевцох, дзе бул „бележник“ Духовного Стола, дзе 1962. року здобул званє монсиньора.
Стари и хори о. Михайло Фирак ше преселєл до Заґребу и там 16. юния 1984. року умар. Поховани є на заґребским теметове Мирошевац.
Литература
- о. Проф. Др Роман Миз: Священїки дакедишнього Осєцкого викарията; видавателє: Парохия св. Петра и Павла, Нови Сад и Максима друкарня и видавательна хижа, Петроварадин, 2016, б. 320-322.
Вонкашнї вязи
- о. Михайло ФИРАК, Новинарска асоцияция Руснацох НАР, децембер 28. 2017.
- Янко Рамач ПЕРША ФАЗА ВИДАВАНЯ РУСКИХ НОВИНОХ (1924-1930), Годишњак Филозофског факултета у Новом Саду, Књига XXXVIII (2013)
- Янко Рамач РУСИНСКО НАРОДНО ПРОСВЕТНО ДРУШТВО И РЕЦЕПЦИЈА О ПОТКАРПАТСКОЈ РУСИЈИ/КАРПАТСКОЈ УКРАЈИНИ У ЊЕГОВИМ ИЗДАЊИМА 1938–1939. ГОДИНЕ, Универзитет у Новом Саду, Филозофски факултет, Одсек за русинистику, оригиналан научни рад, прихваћено 1. октобра 2013.