Wp/rsk/Янко Рамач

Професор доктор Янко Рамач (*22. марец 1955. - †27. авґуст 2022.), порядни професор на Филозофским факултету у Новим Садзе, автор шейсц кїжкох и векшого числа фахових и наукових статьох, прекладатель Святого писма – Стари и Нови завит

др Янко Рамач
Народзени	22. марца 1955.
Умар	27. авґуста 2022. (67)
Державянство	югославянске, сербске
Язик творох	руски, сербски, українски
Школа	Ґимназия у Риме и Руским Керестуре
Универзитет	Филозофски факултет Нови Сад
Наукови ступень	докторат, Державни универзитет Ужгород, Україна
Обласц науки	история
Период твореня	1984-2022
Жанри	история, прекладательство
Поховани	у Кисачу
Припознаня	Орден Витяза святого папи Силвестра

Биоґрафия

Янко Рамач народзени 22. марца 1955. року у Руским Керестуре. Родичи оцец Дюра и мац Леона родз. Медєши. Янко Рамач мал ище трох братох и єдну шестру. Основну школу Янко закончел у родзеним валалє, класичну ґимназию у Риме и Руским Керестуре. Дипломовал историю на Филозофским факултету у Новим Садзе. Ступень маґистра наукох здобул на Филозофским факултету у Беоґрадзе. Докторовал на тему з историї Руснацох на Державним универзитету у Ужгородзе у України.

Од 1984. року Янко Рамач робел на Филозофским факултету у Новим Садзе. Преподавал Историю Руснацох, Фолклористику и Културну историю Руснацох, а на последипломних студийох Руске питанє у стреднєй Европи у ХХ вику. На Филолоґийним факултету у Беоґрадзе преподавал предмет Културна история Українцох. Єден час тримал преподаваня и на универзитету у Нїредьгази у Мадярскей. На вецей заводи госцовал на универзитетох у України, Польскей, Словацкей и Горватскей. Участвовал на числених наукових конференцийох у жеми и державох штреднєй и восточней Европи.

Проф. Рамач бешедовал вецей шветово язики: українски, италиянски, словацки, анґлийски, нємецки, русийски, а хасновал и класични язики – латински и старогречески. Науково роботи писал на руским, сербским и українским язику, а обявйовал и на анґлийским и словацким.

Обявел шейсц кнїжки и понад 100 наукови роботи, пририхтал за обявйованє велї значни историйни жридла. У своїх роботох ошвицел теми з дружтвеного, културного и привредного живота Руснацох у Южней Угорскей, односно у Югославиї. Поволуюци ше на документи, народну творчосц и звичаї, вше наглашовал же Руснаци часц українского народу. По своїх опредзелєньох Янко Рамач цалого животa бул активист українскей ориєнтациї медзи войводянскима Руснацами.

До званя урядового професора на Филозфским факултету у Новим Саду Янко Рамач вибрани 2006. року.

Вєдно з братом Михалом Рамачом преложел Святе писмо – Стари и Нови завит. За тото подняце папа Франциск одликовал го з Орденом Витяза святого папи Силвестра.

Бул оженєти зоз Анку народзену Кокавец. У малженстве мали три дзивки Ксению, Тат’яну и Кристину.

Янко Рамач страдал у транспортним нєщесцу 27. авґуста 2022. Поховани є на теметове у Кисачу.

Библиоґрафия

1. Привредни и дружтвени живот Руснацох у Южней Угорскей (1745–1848), Нови Сад, 1990, 190.

2. Кратка история Руснацох (1745–1918), Нови Сад, 1994, 138.

3. Школа у Руским Керестуре (1753–1918), Нови Сад, 1995, 142.

4. Костельник, Г., Liber memorabilium грекокатолїцкей парохиї бачкерестурскей, Нови Сад, 1998, 218.

5. Руснаци у Южней Угорскей (1751 – 1918), Войводянска академия наукох и уметносцох, Нови Сад, 2007, 521.

6. История Руснацох, Од Києвскей Руси по Горнїцу, Бачку и Срим, НВУ „Руске слово” и Заводу за културу войводянских Руснацох, 2023.

Вонкашнї вязи

Рамач, Янко История русинов в Южной Венгрии (1745-1918), Ужгород, 1995.

Янко Рамач Реґистер наукових и фахових роботох

Умар проф. др Янко Рамач, Рутенпрес, 28. авґуст 2022.

Доц. др Даниела Марчок IN MEMORIAM ПРОФ. ДР ЯНКО РАМАЧ (1955–2022)