Wp/rsk/Михайло Мудри


Михайло Мудри

Народзени	30. децембра 1874.
Умар	13. октобра 1936 (62 роки)
Державянство	угорске, югославянске
Язик творох	руски
Школа	Ґимназия Винковци, Заґреб
Универзитет	Римокатолїцка теолоґийна семинария, Заґреб
Богослужел	1900—1936.
Поховани	15. октобра 1936, Руски Керестур

О. монсиньор Михайло Мудри (*30. децембер 1874—†13. октобер 1936) длугорочни парох керестурски, редактор, публициста, перши предсидатель Руского народного просвитного дружтва (РНПД).

Биоґрафия

Народзел ше 30. децембра 1874. року у Руским Керестуре. Родичи оцец Янко и мац Мария (народзена Роман) Мудрого. Основну школу закончел у своїм валалє при славному учительови Петрови Кузмякови. Першу класу ґимназиї, закончел вєдно зоз владиком Дионизийом Нярадийом у Винковцох, а познєйши класи у Заґребе (1895) як питомец нашей семинариї. Богословию закончел на Римокатолїцкей теолоґийней семинариї у Заґребе (1895-1900). За священїка є, як нєоженєти, пошвецени у Дюрдьове 21. октобра 1900. року. Пошвецел го крижевски владика Юлий Дрогобецки.

Роботна кариєра

Ище як неоєрей бул меновани за актуара владическей канцелариї у Крижевцох, а 1902. року постава душпастир у Прґомелю (1901-1910), администровал и Дишник, а доходзел и до Липовлянох.

Од 12. марца 1912. року вон администратор „in spiritualibus“ у Руским Керестуре, од 10. януара 1918. є „in materialibus et in spiritualibus“, a oд 12. фебруара 1919. року постава керестурски парох. О. Михайла Мудрого барз почитовали у ватиканских кругох. З декретом Святого отца од 1. марца 1924. Михайло Мудри постал тайни „коморник“ Його святосци папи Пия ХІ цо му дало право на титулу монсиньора.

Зоз його заслугу отворени у Керестуре манастир чесних шестрох служебнїцох 1924. року, по чим є у Керестуре и найкрасше запаметани. Уведол и дзепоєдни богослуженя и швета до церкви, хтори ше и нєшка почитую.

На Сновательней схадзки Руского народного просвитного дружтва (РНПД) 2. юлия 1919. року вибрани є за предсидателя^[1] и тоту длужносц окончовал до його шмерци 1936. року. Вон ясно формуловал и винєсол цилї новооснованого Дружтва: дац нашим дзецом кнїжки до рук, же би мали з чого учиц, просвищовац ше и розвивац; дац и одроснутим кнїжки до рук же би нє забули тото цо научели у школи, и же би ше и далєй учели и просвищовали. А цо ше дотика язика, и ту Михайло Мудри бул ясни: шицко тото треба робиц на мацеринским язику, хтори и дзеци и одроснути найлєпше розумя.^[2] Його становиска о язику мали вельки уплїв на будуци напрям културного и националного живота югославянских Русинох. Вон свой народ представял як южно-славянских Русинох або як Руснацох, хтори ше пре ґеополитичну локацию розвили до “окремного конара народу Русь”. Гоч доказовал же Руснаци мали вязи и зоз Русами и зоз Українцами, язики тих двох народох им цудзи та вони треба же би мали “свой власни литературни язик”. Мудри свойо попатрунки применєл у пракси зоз пририхтованьом школского буквара з Михайлом Поливком (Буквар за южно-руски основни школи, 1921) и зоз даваньом порива Ґаброви Костельникови же би написал ґраматику (1923), хтора мала поставиц литературни стандард Руснацох. Мудри обявел и даскельо звити з путованьох и, за рочни руски календар, серию статьох о шветовей ґеоґрафиї (Жем и єй жителє, 1925-35) и популарну историю швета (История швета у малих образох, 1924-43). Свойо написи найчастейше обявйовал у Руских новинох и Руским календаре.

Як предсидатель РНПД старал ше же би шицки плановани акциї на хасен руского народу нє остали лєм плановани та укладал вельо труду и способносци же би вони були витворени.^[3] Старал ше о ширеню дїялносци РНПД по шицких местох дзе були нашо парохиї, як и о материялней бази за тоту дїялносц. У перших рокох роботи РНПД постарл ше же би ше з церковней каси у Руским Керестуре видвоєло векшу суму пенєжу за потреби роботи РНПД, обяшнююци крижевскому владиков же у церковней каси народни пенєж та го мож похасновац за народни цилї.

Вельо роки ше дописовал зоз др Гавриїлом Костельником, и прилапйовал його поради у вязи зоз програмну дїялносцу РНПД.

Народни донатор

Подаровал вельки суми пенєжу за роботу Руского народного просвитного дружтва, та так перша антолоґия рускей поезиї и прози Руско-українски алманах скоро у цалосци виплацена з його власного пенєжу.За купованє Народного дому и на друкарню подаровал 35.000 тедишнї динари, а понеже нє мал своїх нашлїднїкох, церкви и Просвити охабел и цали свой рухоми и нєрухоми маєток.

О. Михайло Мудри умар у Руским Керестуре 13. октобра, а поховани є на керестурским теметове 15. октобра 1936. року.^[4]

Литература

о. проф. Др Роман Миз: Священїки дакедишнього Осєцкого викарията; видавателє: Парохия св. Петра и Павла, Нови Сад и Максима друкарня и видавательна хижа, Петроварадин, 2016, б. 236-237.

Дюра Варґа, Початки национално-културного руху при Руснацох у Югославиї, Шветлосц, XXVII, 4 (Нови Сад, 1989), 509-540;

Дюра Папгаргаї, Михайло Мудри – живот и дїло, Руски календар 1995 (Нови Сад, 1994), 96-112.

Тамаш, др Юлиян, "Михайло Мудри (1874-1936)", Руски Керестур, лїтопис и история (1745-1991), Месна заєднїца Руски Керестур, 1992, бок .

Жридла и вязи

о. Михайло МУДРИ, биоґрафия на НАР

Вонкашнї вязи

Петро Кузмяк, перши школовани учитель у Руским Керестуре, биоґрафия на НАР

Др Гавриїл Костельник, биоґрафия на НАР

Ґалерия

Михайло Мудри як парох
Гавриїл Костельник и о. Михайло Мудри у Руским Керестуре
Нащива львовского митрополита Андрия Шептицкого Рускому Керестуру. О. Михайло Мудри шедзи други з права.
Парох о. Михайло Мудри и керестурски учителє на початку 1930-тих
О. Михайло Фирак, о. Михайло Мудри и о. М. Костюк