Wp/rsk/Владимир Полївка


Владимир Полївка

Народзени	4. юния 1908.
Умар	1. септембра 1961. (53)
Державянство	австроугорске, югославянске
Язик творох	сербски, руски
Школа	Ґимназия, Травник
Универзитет	Правни факултет, Беоґрад
Наукови ступень	докторат, Сорбона, Париз
Период твореня	1933—1961
Жанри	право, адвокатура, спорт
Поховани	у Кули

Владимир Полївка (*4. юний 1908—†1. септембер 1961), доктор права зоз Сорбони, правдиви руски интелектуалєц и спортски активиста.

Биоґрафия

Владимир Полївка ше народзел у Будимпешти 1908. року. Оцец Михаил и Єлена родз. Петриґала. Бул наймладше од седмерих дзецох, штирох шестрох, Марґити, Ирини, Єлени и Олґи, и двох братох, Ивана и Андрея. Владимир закончел основну школу у Руским Керестуре, вец пошол до Травнику, до ґимназиї при єзуитским семинаре. После ґимназиї прешол до Беоґраду дзе уписал студиї права и дипломовал. На Сорбони у Паризу уписал постдипломски студиї и докторовал 1933. року.

Владимир Полївка ище як штредньошколєц и студент, вєдно зоз Юлияном Малацком и ище 8 младима Керестурцами, бул 1923. року єден зоз сновательох ФК Русин з Руского Керестура и стандардни бавяч у тиме.

По докторованю у Паризу, Владимир Полївка почал робиц у Умки при Беоґрадзе як адвокат. Мал приватну праксу зоз колеґом адвокатом Вельком Ковачевичом, познєйше єдним з познатих беоґрадских адвокатох.

У медзичаше, почала война. Владимир Полївка бул зарабени на початку войни. Нємци их депортовали алє ше йому удало сцекнуц зоз гайзибана у Будимпешти. Войнови час препровадзел у Будимпешти (при своєй шестри Марґити). Кед Руси сцигли до Мадярскей вон робел за нїх як прекладатель понеже знал бешедовац и по русийски. Руси го барз ценєли и сцели же би остал з нїма кед рушали за Нємецку алє вон нашол способ тото одбиц и врацел ше до Югославиї. Руси му дали писану препоруку и тото писмо спричинєло проблем Владимирови Полївкови под час Информбироа понеже го теди гарештовали (лєм на даскельо днї). Члени УДБ-и теди претресали Полївкову хижу и нашли тото писмо од Русох и то им звекшало подозривосц спрам Владимира Полївки.

Владимир Полївка ше врацел до Кули односно до Руского Керестура. Робел у Кули у Катастре як приправнїк. После шмерци його мацери, даґдзе 1946./47. року отворел приватну адвокатску праксу у Кули а єден час мал канцеларию и у Руским Керестуре.

Оженєл ше зоз Емилию Манойла, учительку, 1948. року. Млада малженска пара жила кратки час у Руским Керестуре а вец ше преселєли до Кули. За 13 роки малженства Владимир и Емилия Полївка мали тройо дзеци, Ирену, Андрея и Дьордя (Дюру).

Владимир Полївка нєсподзивано умар 1. септембра 1961. року, у 53 року живота. Поховани є на руским теметове у Кули.

Вонкашнї вязи

Гавриїл Колєсар: Бул прави руски интелектуалєц (Владимир Полївка), Руснаци у швеце, Рок Х, ч. 2 (27), Май-Авґуст, 2011, б. 19-22.

Зоз живота Руснацох у Кули, Г. Колєсар: Основна градза за портрет Владимира Полївки, докторанда на Сорбони у Париз, Завод за културу войводянских Руснацох, Нови Сад, 2016, б. 117-122.

Ґалерия

Полївково дзеци 1910. року у Руским Керестуре, Иринка, Андрей, Єлена, Олґа, Владислав (Лаци), Марґита шедзи Владимир Поливка 1910. рок
Владимир Полївка у Паризу, Французка, 14. май. 1933. року