Jump to content

Wp/rsk/Владимир Бесерминї

Add links
From Wikimedia Incubator
< Wp | rsk
Wp > rsk > Владимир Бесерминї
Владимир Бесерминї
Народзени 8. мая 1946.
Умар 20. марца 2014 (68)
Державянство югославянске, сербске
Язик творох руски
Школа Ґимназия у Шидзе
Универзитет Филизофски факултет,

Нови Сад

Период твореня 1965- 2010
Жанри просвита, литература, култура,

прекладательство

Поховани у Руским Керестуре
Припознаня Златна значка КПЗ Сербиї,

Искри култури КПЗ Войводини, Зарї култури КПЗ Кула, припознаня Фестивала култури Червена ружа, припознаня РНТ Дядя

Владимир Бесерминї (*8. май 1946†20. марец 2014), професор у керестурскей ґимназиї, писатель, прекладатель и визначни роботнїк у култури Руснацох.

Биоґрафия

Владимир Бесерминї народзени 8. мая 1946. року у Шидзе. Оцец Янко и мац Ана родз. Палєш. Владимир мал ище шестри Веру и Наду. Основну школу и ґимназию Владимир закончел тиж у Шидзе. Студирал на Филозофским факултету у Новим Садзе и под час студийох бул активни у литературней секциї КУД Максим Горки. Дипломовал на Филозофским факултету у Новим Садзе, на ґрупи за югославянски литератури, а як професор сербского и мацеринского, руского язика, Владимир Бесерминї почал робиц у керестурскей ОШ и тедишнєй ґимназиї 1. септембра 1970. року. Од 1977. по 1982. рок бул заняти як лектор у Прекладательней служби Скупштини АП Войводини, а як активни и замерковани културни роботнїк од 1982. року бул на професийней функциї секретара Културно-просвитней заєднїци Општини Кула.

Владимир Бесерминї бул оженєти зоз Зузану родз. Кукучкова, у малженстве мали сина Владимира и дзивку Ярославу.

До керестурскей школи ше Владимир Бесерминї знова врацел 1. януара 1989. року, одкаль пошол до пензиї у новембрe 2010. року. Як професор у керестурскей ґимназиї велїм ґенерацийом школярох улял любов ґу рускому язику, хтори добре познал, унапредзовал и почитовал - и як фаховец и як поета и писатель, а ище вецей як позарядови активиста у рецитаторским руху у Войводини и Сербиї.

Творча робота у литератури и култури

Ище як школяр ґимназиї у Шидзе Владимир Бесерминї свойо писнї обявйовал у Литературним слове, а познєйше обявени му 5 кнїжки - збирки поезиї Очи у морю (1969) и Раз повем (2003), збирка текстох Критики, рецензиї и огляди (2011), автобиоґрафски призначки Бешеда самим зоз собу (2012) и збирка поезиї З писню поведзене (2013, Ужгород). Писнї, рецензиї, кнїжкох, фахово и уметнїцки критики обявйовал у Шветлосци и у других виданьох, бул рецензент виданьох писательом и на сербским язику, прекладал поезию зоз сербского и словацкого, хтори тиж добре познал и бешедовал.

Владимир Бесерминї свой вельки и нєзаобиходни печац зохабел у нашей култури, перше у своїм родним Шидзе, а после приходу до Керестура - у Домe култури и АРТ / РНТ Дядя и, вообще, у наших найзначнєйших манифестацийох и фестивалох. Бул ґлумец и режисер дзецинских и младежских представох у Дядї, у младших рокох водитель програмох, потим автор числених конферансох, автор рециталох хтори виводзени на манифестацийох Червеней ружи и з других нагодох, бул на чолє вецей манифестацийох того нашого найвекшого фестивалу култури, на вецей заводи и предсидатель його орґанизацийного одбору, бул на чолє Драмского мемориялу и Костельниковей єшенї, дзе бул и єден з єй сновательох. Як предсидатель Костельниковей єшенї запровадзел и барз добре сотруднїцтво з найпознатшима литературнима менами з Дружтва писательох Сербиї.

У рецитаторским руху бул прейґ 30 роки, перше як педаґоґ рецитаторох у керестурскей школи и Доме култури, а потим як селектор на месних, општинских смотрох и член фаховей комисиї на уровню Покраїни, чий єден час бул и предсидатель. Виховал велїх наших терашнїх фахових руководительох у рецитаторским руху, у руским язику, писаню конферансох и, вообще, у анґажованю у рускей култури и просвити. Владимир Бесерминї бул єден од найвреднєйших членох Дружтва за руски язик, литературу и културу од самих початкох та по останї роки (у мат. кнїжки є уписани под ч. 57/1974). Брал учасц у литературних стретнуцох на науково-фахових сходох, прекладал кнїжки. Роботи-прилоги му обявйовани у часопису Дружтва Studia Ruthenica.

За роботу на полю култури и просвити достал Златну значку Културно-просвитней заєднїци (КПЗ) Сербиї, Искри култури КПЗ Войводини, Зарї култури КПЗ Кула, вецей припознаня Фестивалу култури Червена ружа, РНТ Дядя и други.

Владимир Бесерминї умар 20. марца 2014. року у 68. року живота. Поховани є на теметове у Руским Керестуре.

Даєдни з писньох Владимира Бесерминя композиторe похасновали за свойо композициї хтори, потим, виводзени на манифестацийох Фестивала култури Червена ружа.

ТЕКСТИ ПИСНЬОХ

Червена ружа

У народним духу
Рок Наслов писнї Автор музики
1976 Фалшива любов Витомир Бодянец
1993 Валцер любови Михайло Бодянец
2008 Чловек и жена Любомир Загорянски
У забавним духу
1986 Червена ружа Йован Адамов
1986 Най ружа останє Юлиян Рамач
1994 Майске стретнуце Драґан Новакович
2003. Пребач Владимир Олеяр

Червене пупче

Рок Наслов писнї Автор музики
1974 Синови Яким Сивч
1988 Семафор Юлиян Рамач
1989 Зебра Юлиян Рамач
1990 Волай до диска Михайло Бодянец
1993. Велька любов Юлиян Рамач
1994. Татов хлоп Драґан Новакович

Литература

Тамаш, др Юлиян, „Просвитни роботнїки 1944-1991. рокуˮ, Руски Керестур, лїтопис и история (1745-1991), Месна заєднїца Руски Керестур, 1992, бок 414.

Вонкашнї вязи

Retrieved from "https://incubator.wikimedia.org/w/index.php?title=Wp/rsk/Владимир_Бесерминї&oldid=6396334"