Wp/rki/ဦးဘိုးညွန့်
| ဦးဘိုးညွန့် | |
| ကိုယ်ရီးအကျဉ်းချုပ် | |
| မွီးသက္ကရာဇ် | ၁၉၁၆ |
| နာမည်ရင်း | |
| မိဘနာမည် | ဦးရွှေခိုင်+ဒေါ်ဝင်းသာဦး |
| မွီးဖွားရာနီရာ | ရခိုင်ပြည်နယ်၊မာန်အောင်မြို့နယ်၊ ကအီးကျေးရွာ |
| နိုင်ငံသား | မြန်မာနိုင်ငံ |
| လူမျိုး | ရခိုင် |
| ကိုးကွယ်ရေဘာသာ | ထေရဝါဒ ဗုဒ္ဓဘာသာ |
| ပညာအရည်အချင်း | အင်္ဂလိပ်-မြန်မာ ကိုးတန်း |
| အလုပ်အကိုင် | ပွဲရုံလုပ်ငန်း,ဧည့်ရိပ်သာလုပ်ငန်း |
| အိမ်ထောင်ဖက် | ဒေါ်ကြည်ကြည် |
| သားသမီး | |
| ထင်ပေါ်ကျော်ကြားမှု | နိုင်ငံရေးနိုင်တက်ကြွလှုပ်ရှားသူ |
| ထင်ယှားရေလက်ရာတိ | |
| ရယှိခရေဆုတိ | |
| လက်မှတ် | |
| ကွန်ယက် | |
မာန်အောင်ကျွန်းမှ ဦးဘိုးညွန့်ကို ရခိုင်ပြည်နယ်တစ်ဝှမ်းမှ လူတော်တော်များများ သိကတ်ရေ။ ရခိုင်သား အများစုရေ ရန်ကုန်မြို့ ကုန်ဈေးတန်းလမ်းမှ "ဦးဘိုးညွန့်ပွဲရုံ"နန့် မကင်းကတ်ရေအတွက်ကြောင့် ဖြစ်ရေ။ တစ်ချိန်သောအခါက ဦးဘိုးညွန့်ပွဲရုံရေ ရခိုင်ပြည်နယ်တစ်ဝှမ်းနန့် မာန်အောင်ကျွန်းထွက် အုန်းဆံ(အုန်း သား)၊ ငါးခြောက်၊ ပုဇွန်ခြောက်၊ ငါးမန်းတောင်နန့် ငါးစည်ဖောင်း စရေရို့ကို ဒိုင်ခံဖြန့်ဖြူးရာ ပွဲရုံ ကြီး ဖြစ်ခရေ။ တစ်ချိန်တည်းတွင် ရခိုင်ပြည်နယ်အနှံအပြားမှ ဘုရားဖူးလာသူတိ၊ ဆေးဝါးကုသခံရန် လာသူတိနန့် ကုန်ပစ္စည်းဝယ်ရန် လာသူတိဧ့ တည်းခိုရာ ဧည့်ရိပ်သာကြီးလည်း ဖြစ်ခရေ။
ဦးဘိုးညွန့်ရေ ပွဲရုံလုပ်ငန်းနန့် ဧည့်ရိပ်သာလုပ်ငန်းရို့နန့်သာ လူသိထင်ရှားစွာ မဟုတ်ဘဲ အခြားရေ စီးပွားရေးလုပ်ငန်းနန့် လူမှုရေးလုပ်ငန်း၊ နိုင်ငံရီးလုပ်ငန်းတိဖြင့်လည်း လူသိတိထင် ရှားရေ ပုဂ္ဂိုလ်ဖြစ်ရေ။
ဦးဘိုးညွန့်ကို မာန်အောင်မြို့နယ်၊ ကအီးကျေးရွာနီ သူကြီးဦးရွှေခိုင်နန့် ဒေါ်ဝင်းသာဦးရို့မှ ၁၉၁၆ခုနှစ် တွင် မွေးဖွားခရေ။ မွေးချင်းနှစ်ဦးမှာ ဒေါ်ရွှေခိုင်ဦးနန့် ဦးဘိုငြိမ်းရို့ ဖြစ်ကတ်ရေ။ အတန်းပညာ ကို ကျောက်ဖြူမြို့ တွင် အင်္ဂလိပ်-မြန်မာ ကိုးတန်းအောင်ရေအထိ သင်ကြားခရေ။ ထို့နောက် သက်မွေးဝမ်းကျောင်း ပညာရပ်အဖြစ် အမရပူရ ဆောင်းဒါး ရက္ကန်းကျောင်းသို့ တက်ရောက်သင်ကြားခရေ။ ဆောင်းဒါးကျောင်းတွင် ပညာသင်ကြားနီစဉ် ဒုတိယကမ္ဘာစစ်ကြီး ဖြစ်လာပနာ ၁၉၄၂ ခုနှစ်တွင် ဗိုလ်ရန်အောင်နန့် ဗိုလ်မင်းလွင်ရို့ "ဘီ၊အိုင်၊အေ"(BIA)တပ်ဖွဲ့ ဖွဲ့ရန် ရခိုင်ပြည်သို့ ရောက်လာစဉ် မာန်အောင်မြို့နယ်မှ ဦးဘိုးညွန့်နန့် ဦးအောင်လှဖြူရို့နှစ်ဦး ဝင်ရောက်လိုက်ပါသွားကတ်ရေ။
ဦးဘိုးညွန့်ရေ ဂျပန်ခေတ်တွင် ရန်ကုန်မြို့၊ စမ်းချောင်းသူ ဒေါ်ကြည်ကြည်နန့် ဖူးစာဆုံခဲ့ရေ။ ရွှေတိဂုံ ဘုရားလမ်းတွင် "ဦးဘိုးညွန့်နန့် သားကုမ္ပဏီ"ကို တည်ထောင်ရေ။ ထို့နောက် ၁၉၅၁-၅၂ တွင် အမှတ် (၁၅)၊ ခေမာလမ်း၊ စစ်ချောင်းတွင် "ခြင်္သေ့မင်း" အထည်စက်ရုံကို တည်ထောင်ရေ။ ဆေးဆိုးပန်းရိုက် ပညာကို အိန္ဒိယနန့် အင်္ဂလန်နိုင်ငံတိသို့ သွားရောက်သင်ယူခရေ။
ဦးဘိုးညွန့်ရေ ဖက်စပ်ကော်ပိုရေးရှင်း အမှတ်(၁)တွင် မန်နေးဂျင်း ဒါရိုက်တာဖြစ် ဆောင်ရွက်ခရေ အပြင် မြန်မာနိုင်ငံလုံးဆိုင်ရာ ဆေးဆိုးပန်းရိုက် အဖွဲ့ချုပ်ဧ့ ဥက္ကဌအဖြစ်လည်းကောင်၊ မြန်မာနိုင်ငံလုံးဆိုင် ရာ စက်မှုလက်မှု အဖွဲ့ချုပ်ဧ့ အထွေထွေအတွင်းရေးမှူးအဖြစ် လည်းကောင်း ဆောင်ရွက်ခရေ။ (ဥက္ကဌမှာ လူထု စီးကရက် ဦးချိုဖြစ်ပြီး၊ ဒုဥက္ကဌမှာ ဦးပွင့်ကောင်း ဖြစ်ရေ။) စက်မှုလက်မှု အဖွဲ့ချုပ်ဧ့ ကိုယ်စားလှယ် အဖြစ်ဖြင့် အမေရိကန်၊ အင်္ဂလန်၊ ဂျာမနီ၊ ပြင်သစ်၊ ဂျပန်နန့် တရုတ်နိုင်ငံတိသို့ လေ့လာရေးခရီး သွားရောက်ခရေ။
နိုင်ငံရေးကို ဝါသနာဗီဇပါပနာ ဖဆပလ (တည်မြဲ) အမတ်လောင်း အနီဖြင့် ဦးဘစော (ဝန်ကြီးဟောင်း )နန့် ကျောက်ဖြူမဲဆန္ဒနယ်မြေမှ ဝင်ရောက်ယှဉ်ပြိုင်ခသိမ်းရ။
ဦးဘိုးညွန့်ရေ ရခိုင်ပြည်နယ် ဓမ္မာရုံ ကြီးကြပ်ရေးကော်မတီ၊ ရခိုင်သာယအသင်းနန့် မာန်အောင်မြို့နယ် အသင်း (ရန်ကုန်)ရို့တွင်လည်း ဦးဆောင်ပါဝင်ပြီး ဘာသာရေးနန့် လူမှုရေးလုပ်ငန်းတိကို တက်ကြွ စွာ ဆောင်ရွက်ခပါရေ။ ရခိုင်သဟာယအသင်းဧ့ ဒုတိယမြောက် ဥက္ကဌအဖြစ်ဆောင်ရွက်ခစဉ် က ကျောင်းသားသုံးဦးအား တက္ကသိုလ် ပညာသင် ထောက်ပံ့ကြေးပီးဖြစ်အောင် ဦးဆောင်စည်းရုံးခရေ။
ဦးဘိုးညွန့်ရေ လူမှုရေးလုပ်ငန်းတိတွင် ရခိုင်သားလူငယ် စီးပွားရေးသမားတိအား စေတနာဖြင့် လမ်းညွန်ခြင်း၊ အကူအညီပီးခြင်းတိအပြင် ရန်ကုန်ရောက် ရခိုင်လူငယ်တိအား စကားဖြင့်လည်းကောင်း ၊ ငွေကြေးဖြင့်လည်းကောင်း ထောက်ပံ့ကူညီခရေ။
ဦးဘိုးညွှန့်ရေ အသက်(၇၉)နှစ်အရွယ်တွင် ရန်ကုန်မြို့၊ ဗဟန်းမြို့နယ်၊ ဖိုးစိန်လမ်း၊ အမှတ်-၄၁ (C) နီအိမ်၌ ၂၇-၄-၁၉၉၅ ရက်နိ့တွင် ကွယ်လွန်လားခရေ။ ဇနီးဖြစ်သူ ဒေါ်ကြည်ကြည်ရေ ၂၈-၈-၂၀၀၉ ရက်နိ့တွင် သမီးနီအိမ်၌ ကွယ်လွန်ခရေ။ ဦးဘိုးညွန့်နန့် ဒေါ်ကြည်ကြည်ရို့တွင် သား ဦးညွန့်လှိုင်နန့် သမီး ဒေါ်သီတာအေးရို့ ကျန်ရစ်ခရေ။
ကိုးကား
[edit | edit source]နိုင်ငံအကျိုးပြုအဖိုးတန်ရတနာတိ (၂) - အေးသိန်း စာအုပ်မှ -