Wp/rki/ဦးကျော်ခိုင်
| ဦးကျော်ခိုင် | |
| ကိုယ်ရီးအကျဉ်းချုပ် | |
| မွီးသက္ကရာဇ် | ၁၉၀၃ ခုနှစ်၊ ဇန်နဝါရီလ (၉)ရက်နိ့ |
| နာမည်ရင်း | |
| မိဘနာမည် | ဦးစံထွန်း၊ ဒေါ်စံထွေးခိုင် |
| မွီးဖွားရာနီရာ | ရခိုင်ပြည်နယ်၊သံတွဲမြို့ |
| နိုင်ငံသား | မြန်မာနိုင်ငံ |
| လူမျိုး | ရခိုင် |
| ကိုးကွယ်ရေဘာသာ | ထေရဝါဒ ဗုဒ္ဓဘာသာ |
| ပညာအရည်အချင်း | B.Sc, |
| အလုပ်အကိုင် | A.C, S.D.O ,A.S.O, D.C |
| အိမ်ထောင်ဖက် | |
| သားသမီး | |
| ထင်ပေါ်ကျော်ကြားမှု | |
| ထင်ယှားရေလက်ရာတိ | |
| ရယှိခရေဆုတိ | |
| လက်မှတ် | |
| ကွန်ယက် | |
ရခိုင်သားတိလောကတွင် ထင်ရှားပနာ လူသိတိရေ ဦးကျော်ခိုင် ၃-၄ ဦး ဟိပါရေ။ အရေးပိုင် ဦးကျော်ခိုင် (ဘူးသီးတောင်)ဟု အမည်ရှေ့က ထည့်ပြောမှ မိမိပြောလိုရေ ဘယ်သူဘယ်ဝါဆိုရေကို ချက်ချင်း သိသွားပါရေ။
ဦးကျော်ခိုင်ရေ အရေးပိုင် (I.C.S)ရာထူးဖြင့် ရန်ကုန်မြို့နန့် စစ်တွေမြို့တွင် တာဝန်ထမ်းဆောင်ခသော် လည်း ဘူးသီးတောင်မြို့တွင် တာဝန်ထမ်းဆောင်ခခြင်း မဟိပါ။ ထိုစဉ်က ဘူးသီးတောင်မြို့ရေ စစ်တွေမြို့ နယ်ဧ့ ခရိုင်မြို့ငယ်တစ်မြို့သာ ဖြစ်ခပနာ မြို့ပိုင်အုပ်ချုပ်ရရေ မြို့ငယ်အဆင့်မှာသာ ဟိခပါရေ။
အရေးပိုင် (D.C)ဦးကျော်ခိုင်ကို ရခိုင်သားတိလောကတွင် ခေတ်ပျက် (ဒုတိယကမ္ဘာစစ်ကာလ) ကုလား၊ ရခိုင် အရေးအခင်းတွင် စွမ်းစွမ်းတမံ ဆောင်ရွက်ခပနာ ရခိုင်မျိုးချစ်ပုဂ္ဂိုလ်တစ်ဦးဟု အတိက အသိအမှတ်ပြုခံ ထားရသူ တစ်ဦးဖြစ်ပါရေ။ ဖော်ပြပါ အဓိကရုဏ်းတွင် ငြိမ်ဝပ်ပိပြားရေးကို ဆောင်ရွက်နီစဉ် မသမာ သူတိဧ့ ပစ်ခတ်မှုကြောင့် ဘူးသီးတောင်မြို့အနီး ကျဆုံးသွားပနာ သူဧ့အမည်ကို "ဘူးသီးတောင်"ဟု ရှေ့က ထားပနာ ဂုဏ်ပြုပြောဆိုလေ့ ဟိကတ်ခြင်းဖြစ်ရေ။
သို့သော် ဒုတိယကမ္ဘာစစ်ကာလအတွင်း အာဏာပြပနာ အတင်းအကျပ်လုပ်ဆောင်ခရရေ လုပ်ရပ်တိစွာ ဟိခရေဟု မကျေနပ်သူတချို့ဧ့ ဝေဖန်မှုကို ခံရပါရေ။ ဥပမာ စစ်တွေမြို့ "တရားသီးစု"ရပ်ဟိ စက်ရှင် မင်းကြီး ဦးသာဇံအိမ် (တိုက်)ကို စစ်အတွင်းက စစ်ဌာနချုပ်ပြုလုပ်ရန် အတင်းအဓမ္မ မိသားစုတိကို မောင်း ချခရေဟု သူဧ့သား ဦးရွှေဇံ (သမိုင်းပညာသျှင် - ကွယ်လွန်)က စာရေးသူနန့် စကားလက်ဆုံကျ စဉ် ထောက်ပြခဖူးပါရေ။
သို့သော် ထိုအချိန် ထိုကာလအတွင်း အဆိုးဆုံးအချိန်တွင် အကောင်းဆုံး၊ အသင့်တော်ဆုံး လုပ်ဆောင် ချက်တစ်ခုကို ဆောင်ရွက်ခရေဟုသာ စာရေးသူက ကောက်ချက်ချမိပါရေ။
မြန်မာနိုင်ငံတွင် ဒုတိယကမ္ဘာစစ် စတင်ဝင်ရောက်လာချိန် (၁၉၄၂)ခုနှစ်တွင် အုပ်ချုပ်ရေး ယန္တရား လုံးဝပျက်ပြားနီပနာ ဘူးသီးတောင်နန့် မောင်တောမြို့သူမြို့သားတိ (၃)သောင်းကျော် ချောင်ပိတ်မိနီပနာ အသတ်ခံရအံ့ဆဲဆဲ ခြေအနီတွင် ဟိနီရေ။ အရေးပိုင် ဦးအောင်သာကျော်နန့်အတူ ကြိုးပမ်းခကတ်ပနာ အိန္ဒိယနိုင်ငံ "ဒိုင်နာဆပူ"အရပ်သို့ ဒုက္ခရေ (Refugee)အဖြစ် အရေးပေါ်ပို့ပီးခရရေ။ ထိုစဉ်က ဦးကျော်ခိုင်ဧ့ တစ်ဘက်တစ်လမ်းမှ ကြိုးစားအားထုတ်ခမှုကို မျက်ကွယ်ပြုပနာ မရစကောင်းပါ။ ယင်းအရေး အခင်းကာလတွင် ဦးကျော်ခိုင် စတေးခရရေကို မြင်တတ်ရန် လွန်စွာ အရေးကြီးပါရေ။
ဒုတိယကမ္ဘာစစ်ကာလ (၁၉၄၁) ဂျပန်တိ ဝင်တိုက်ပနာ စင်္ကာပူခံတပ် (ရေတပ်) ကျဆုံးခရပြီးနောက်ပိုင်း ဂျပန်တိ မြန်မာနိုင်ငံတွင်းသို့ အလွယ်တကူမဝင်ရောက်နိုင်ရန် ဗြိတိသျှတပ်က စစ်တောင်းတံတားချိုးထား ခပြီး ဖြစ်ရေအထိ စစ်တွေမြို့သားအချို့ ဝေးရာသို့ ရှောင်တိမ်းမပြေးသေးဘဲ မိမိအိမ်တိကို သံယောဇဉ် တွယ်ပနာ ဟိနီခကတ်သေးရေ။ စစ်တွေမြို့ပေါ် စစ်ရုံးဖွင့်လှစ်ရန်အတွက် စစ်တွေမြို့သားတိအား အတင်း အဓမ္မ မောင်းထုတ်ခကတ်ရရေဟု ဒုတိယကမ္ဘာစစ် မှတ်တမ်းအချို့တွင် ဖတ်ရှုခရပါရေ။
အလားတူ ဦးအောင်ကျော်သာဧ့ သားမက် ဒေါက်တာ ဦးရွှေဘန်း မကွယ်လွန်မီက စာရေးသူထံ ပီး ထားခရေ ဦးအောင်သာကျော်ဧ့ ကိုယ်ရေးမှတ်တမ်းဖိုင်နန့် ရုံးသုံးဖိုင်အချို့တွင် လက်နှိပ်စက်ရိုက် စာစုမှတ်တမ်းတိတွင်လည်း ထိုအချက်တိကို ဖတ်ရှုရပါသိမ်းရေ။
အင်္ဂလိပ်စစ်တပ်တိ အိန္ဒိယနိုင်ငံသို့ "အောင်မြင်စွာ ဆုတ်ခွာချိန်"တွင် ဗြိတိသျှစစ်တပ်မှ ကျန်ရစ်ခရေ့ စစ်အမှုထမ်းခကတ်ရေ "ဂေါ်ရခါး"ကုလားတိနန့် ပူးပေါင်းသူက ပူးပေါင်း၊ လက်နက်ဝယ်သူက ဝယ်ပနာ ကုလား၊ ရခိုင် အဓိကရုဏ်းကို ဖန်တီးခကတ်ခြင်း ဖြစ်ရေ။
ထိုအချိန် ထိုကာလတွင် ဦးအောင်သာကျော် အပါအဝင် တာဝန်သိ ရခိုင်ခေါင်းဆောင်တိက ကာကွယ်ပနာ ကြိုးပမ်းချက်တိစွာ ဟိခပါရေ။ ထိုအချိန် ထိုကာလတွင် ဦးကျော်ခိုင်ရေ ဘူးသီးတောင်သို့ သင်္ဘောဖြင့် အသွား ကမ်းမှ ကုလားတိက သေနတ်ဖြင့်လှမ်းပစ်ပနာ သင်္ဘောပေါ်မှာပင် (၁-၅-၁၉၄၂)ခုနှစ်က ကျဆုံးသွား ခရရေ။ မျိုးချစ်ပုဂ္ဂိုလ် အာဇာနည်တစ်ဦး ရေတိမ်တွင် နစ်ခရရေဟု မှတ်တမ်းတင် ဂုဏ်ယူရပါရေ။ သူဧ့အလောင်းကို ကမ်းပေါ်တက်ပနာ မြေမြှုပ်သင်္ဂြ ိုဟ်ရန်ပင် အခြေအနီ မပီးတော့ပါ။ ဦးရန်အောင်ဧ့ မျိုး ချစ်တော်လှန်ရေး တပ်သားတိနန့် ထိပ်တိုက်တိုးနီပနာ ပစ်ခတ်မှု ဖြစ်ပွားခကတ်ရာ ဦးကျော်ခိုင်ဧ့ အလောင်း ကို သံတုံးတိဖြင့်ချပနာ ပုဏ္ဏားကျွန်းမြို့အနီး ကုလားတန်မြစ်မှာပင် ရေအောက်သင်္ဂြု ိဟ်ခရပါရေ။
ဦးကျော်ခိုင်ကို ဖခင် ဦးစံထွန်း၊ မိခင် ဒေါ်စံထွေးခိုင်ရို့မှ ၁၉၀၃ ခုနှစ်၊ ဇန်နဝါရီလ (၉)ရက်နိ့တွင် မွေးဖွား ခပါရေ။ သားသမီး (၁၂)ယောက်ထွန်းကားခရာ ဦးကျော်ခိုင်ရေ သားကြီးသြရသ ဖြစ်ရေ။ ညီအစ် ကိုမောင်နှမ (၁၂)ယောက်မှာ -
၁။ ဦးကျော်ခိုင် (အရေးပိုင် D.C၊ သားကြီးသြရသ)
၂။ ဒေါ်စံညွန့်ခိုင်
၃။ ဒေါ်စံသာခိုင်
၄။ ဦးသာဘန်းခိုင် B.Sc
၅။ ဦးသာထွန်းခိုင် (I.P.S, D.S.P) (Indian Police Service)
၆။ ဦးထွန်းလှခိုင်
၇။ ဒေါ်စံကော်ခိုင် B.A, B.L
၈။ ဒေါ်စံအေးခိုင်
၉။ ဒေါက်တာ ဒေါ်စံမြခိုင် M.B.B.S (Med-Srpretendent Central Women Hospital Rangoon)
၁၀။ ဒေါက်တာ အောင်ထွန်းခိုင် M.B.B.S
၁၁။ ဒေါ်စံလှခိုင် B.A
၁၂။ ဦးအောင်ကျော်ခိုင် (အင်ဂျင်နီယာ) ရို့ ဖြစ်ကတ်ပါရေ။
ဦးကျော်ခိုင် ငယ်စဉ်က စစ်တွေမြို့တွင် ကျောင်းနီခသော်လည်း (၁၀)တန်းကို ရန်ကုန်မြို့မှပင် အောင်မြင်ခပါရေ။ ၁၉၂၅ ခုနှစ်တွင် ရန်ကုန်တက္ကသိုလ်မှ သင်္ချာဂုဏ်ထူးဖြင့် B.Sc ဘွဲ့ကို ရဟိခပါရေ။
၁၉၂၆ ခုနှစ်တွင် (I.C.S)အရွေးခံရပြီးနောက်ပိုင်း အင်္ဂလန် Oxford တက္ကသိုလ်သို့ သွားရောက်ပနာ ပညာတော်သင် သွားရောက်ပနာ ဘွဲ့ရဟိခပါရေ။
၁၉၂၈ ခုနှစ်၊ စက်တင်ဘာလ (၂၉)ရက်နိ့တွင် ဗြိတိသျှအစိုးရထံတွင် ဝန်ထမ်းအဖြစ် တာဝန်ထမ်းဆောင် ခပါရေ။
ဦးကျော်ခိုင်ရေ စာရေး စာဖတ်ပညာရပ်ကိုလည်း အထူးဝါသနာပါခပနာ ကြီးပွားရေးစာစောင် မဂ္ဂဇင်းကို သူကိုယ်တိုင် ဦးဆောင် ဦးရွက်ပြုပနာ ပြုစုပျိုးထောင်ခရေဟု သိရပါရေ။ ထို့ကြောင့် ကြီးပွားရေးစာစောင် (လူငယ်များကြီးပွားရေးအသင်း) ရွှေရတုသဘင် အထိမ်းအမှတ် မဂ္ဂဇင်းကို ၁၉၇၆ ခုနှစ်က ထုတ်ဝေခရာ မဂ္ဂဇင်းကို ဦးစီးဦးဆောင်ပြုခရေ ဥက္ကဌမှ (အယ်ဒီတာချုပ်)တိဧ့ စာရင်းတွင် ဦးကျော်ခိုင်ကို ပထမဆုံး နံပါတ်(၁)တွင် ဖော်ပြထားရေကို မမျှော်လင့်ဘဲ အံ့သြစရာကောင်းလောက်အောင် တွိ့ရပါရေ။
အလွန်ပင် ဂုဏ်ယူစရာ၊ ဝမ်းသာစရာဟု ဆိုရပါမည်။ ယခုနှစ် ၂၀၁၃ ခုနှစ်ဆိုကေ နှစ်ပေါင်း (၃၇)နှစ်ပင် ကြာမြင့်ခပါပြီ။ ယင်းမဂ္ဂဇင်းကို ဂနိ့ထိတိုင်အောင် လက်ဆင့်ကမ်းပနာ သားစဉ်မြေးဆက် တည်တံ့အောင် ထိန်းသိမ်းထားဟိနီကတ်ရေ စာပီပညာသျှင်တိကိုလည်း အရေးပိုင် ဦးကျော်ခိုင်ဧ့ မိသားစုကိုယ်စား အတ္ထုပ္ပတ္တိကို ပြုစုနီသူ စာရေးသူက တိစွာကျေးဇူးတင် ဂုဏ်ယူပါကြောင်း ပြောကြားလိုပါရေ။
ဦးကျော်ခိုင် တာဝန်ထမ်းဆောင်ခရေ မြို့တိ
[edit | edit source]ဦးကျော်ခိုင်ရေ Burma Civil Cervice (Class.1) အဆင့်ကိုရဟိပြီး နောက်ပိုင်း ၁၉၂၈ ခု၊ စက်တင်ဘာလ (၂၉)ရက်နီ့တွင် အစိုးရဝန်ထမ်းအဖြစ် တာဝန်ထမ်းဆောင်ခပါရေ။
♠ ၁၀-၁၁-၁၉၂၈ ခုနှစ်တွင် အလုပ်သင် (A.C Training) အဖြစ် စတင်တာဝန်ထမ်းဆောင်ခပါရေ။
♠ ၂၅-၄ ၁၉၂၉ တောင်ငူ (A.C Training)အရာဟိ
♠ ၂၄-၆-၁၉၂၉ မြစ်ကြီးနား (A.C Training)အရာဟိ
♠ ၁၈-၁၁-၁၉၂၉ စစ်ကိုင်း (A.C Training)အရာဟိ
♠ ၁၉-၁၂-၁၉၂၉ မြင်းမူ (A.C Training)အရာဟိ
♠ ၁၉-၁-၁၉၃၀ စစ်ကိုင်း (A.C Training)အရာဟိ
♠ ၂၇-၂-၁၉၃၁ မော်လိုက် S.D.O မြို့နယ်အုပ်ချုပ်ရေးအရာဟိ
♠ ၃-၈-၁၉၃၁ ကလေး၀ S.D.O မြို့နယ်အုပ်ချုပ်ရေးအရာဟိ
♠ ၁၅-၁၀-၁၉၃၂ ဟံသာဝတီ (ပဲခူး) A.C,A.S.O (နယ်ပိုင်)
♠ ၁၅-၁၀-၁၉၃၃ တိုက်ကြီးမြို့ A.C, A.S.O (နယ်ပိုင်)
♠ ၁၀-၃-၁၉၃၄ ပြည်မြို့ A.C, S.D.O (နယ်ပိုင်)
♠ ၂၂-၄-၁၉၃၇ မုံရွာ D.C (အရေးပိုင်)
♠ ၅-၄-၁၉၃၇ ဟံသာဝတီ (ပဲခူး) D.C (အရေးပိုင်)
♠ ၂၂-၁၀-၁၉၃၈ အင်းစိန် D.C (အရေးပိုင်)
♠ ၁၉၄၀-၁၉၄၂ စစ်တွေ D.C (အရေးပိုင်)
♠ ၁-၅-၁၉၄၂ ကွယ်လွန် ဘူးသီးတောင်
ကိုးကား
[edit | edit source]နိုင်ငံအကျိုးပြုအဖိုးတန်ရတနာတိ (၂) - အေးသိန်း စာအုပ်မှ -