Wp/kum/Такъай Ихлас Къардашны уланы

Такъай Ихлас Къардашны уланы (1901-1991 йй.) – къумукъ Ватан Давну ва загьматны игити.

Гьайдакъ-Табасаран бёлгени Къумукъдагъы Мажалис юртунда мадарлы сабанчыны агьлюсюнде тувгъан, къумукъ. Межитдеги мактапда башлапгъы билимин алгъан. Дагъыстанда совет гьакимлиги токъташдырылгъан сонг, оланы агьлюсюн, байлар гьисап лап, Къазахстанны Жамбул бёлгесине сюргюн этген. Башлап Ихлас Такъай ишчи болуп, чювюннюр оьсдюреген совхозда гюнлюк планны 1,5–2 керен артыкъ толтуруп ишлеген. Яхшы ишлеген алдынлы ишчини бригаданы бригадири этелер. Ол башчылыкъ этген бригада йылдан-йыл чювюннюр оьсдюрюв загьматда уьстюнлюклер гёрсете.

1942-нчи йыл ол гёнгюллю кюйде фронтгъа гете. Маздекден башлап, ону дав ёллары Прага шагьаргъа элте. Дав йылларда атышывчу полкну гюллеатышчы гьисапда актив кюйде ортакъчылыкъ этген. Полонияны шагьарлары Краковну, Варшаваны, Чехословакияны тахшагьары Праганы алывда къоччакълыкъ гёрсетген ва эки керен яралангъан. Давдан къайтгъан сонг Ихлас Такъай Мерке совхозда бригадирлик ишни давам эте. Давдан алдагъы йылларда йимик, бригада алдынлыкъ гёрсете ва чювюннюр оьсдюрювде 1946-нчы йылларда етишген уьстюнлюклери учун огъар ССЖБ-ни Оьр Советини Буйругъу булан 1948-нчи йылда оьр савгъат – социалист загьматны игити деген ат бериле, ленин ордени ва алтын юлдуз тапшурула.

Сюргюн этилген гьайдакълылар оьз юртларына къайтгъан сонг Ихлас Такъай 1957-нчи йыл болгъунча Мерке совхозну бригадири болуп чалыша. Къардашларыны токътавсуз тилевюне гёре, ол Дагъыстангъа къайта. Башлап Хасавюрт районну Муцалавул совхозунда ишлей, сонг 1960-нчы йылда ата юртуна геле.

Ихлас Такъай Ватан давда ва загьматда гёрсетген ишлери саялы ленин, Ватан Давну I даражалы, Къызыл юлдуз онишанлары, олай да алтын медал булан савгъатлангъан. Ол ватанына къуллукъ этген ва ватандаш борчун кютген. Эсделигин даимликге сакъламакъ учун Мажалис юртну орамларыны бирине ону аты къоюлгъан.

Байланывлар

• "Дав игитлер" сайфасында таржума гьалы — http://www.warheroes.ru/hero/hero.asp?Hero_id=23035