Wp/kum/Гьажи Зарипат Абдулвагьабны къызы

Гьажи Зарипат Абдулвагьапны къызы (1922–2009 йй.) – 1947-нчи йылда Социалист Загьматны Игити деген ат берилген. Ол Къазахстанда яшылчалар оьсдюреген бригаданы юрютювчюсю болуп ишлеген. Миллети — къумукъдур.

Зарипат Гьажи 1922-нчи йылны 10-нчу июнунда Уллу Бойнакъда тувгъан. 1934-нчю йылда оланы агьлюсю сюргюн этилип, Къазахстангъа йиберилген. Загьмат ёлун Зарипат Абдулвагьабовна оьзюне 12 йыл болагъанда Жамбул областны Мерки районуну эки нёмюрлю совхозуну яшылчалар оьсдюреген ергеде башлагъан. Заман гетип, ол ергечи, сонг 1942-нчи йыл 80 тиштайпа къуршалгъан ергени башы бола.

Башы болуп ишлейгенде ол къурумчулукъ пагьмусун, ишни сюегенин гёрсете. Шо хасияты булан ол иш ёлдашларыны абурун да къазана. Къыйынлы дав ва давдан сонггъу йылларда ол башчылыкъ этген ерге къыйын шартларда ишлей туруп, яшылчаланы план булан гёрсетилген 400 центнерни орнунда гьар гектардан, орта гьисапда, 814 центнер ала.

Зарипат Абдулвагьабовна къайратлы загьматы учун тийишли даражада къыйматлангъан. ССЖБ-ни Оьр Советини Президиумуну тапшуруву булан огъар "Социалист загьматны игити" деген ат бериле. Ол Къазахстангъа Дагъыстандан сюргюн этилген къумукъ байланы шолай оьр атгъа ес болгъан биринчи вакили гьисапда белгили.

Китаплар

• Ёлдаш газет, 23.12.2016, макъала "Гьюр заманны игитлери"