Wp/jax/Danau Kaco

From Wikimedia Incubator
< Wp‎ | jax
Wp > jax > Danau Kaco

Danau Kaco merupokan danau yang letaknyo di Kabupaten Kerinci, Jambi, Indonesia. Lebih tepatnyo danau iko teletak di Desa Lempur, Kecamatan Gunung Raya.[1] Danau iko sebenarnyo berado di dalam Taman Nasional Kerinci Seblat (TNKS) yang merupokan taman nasional paling besak yang ado di Sumatra dan jugo banyak diisi samo flora dan fauna.[2]

Ukuran dari Danau Kaco dapat dibilang idak pulak besak atau kecik. Tingginyo sekitar 1.289 mdpl, dan ukurannyo sekitar 30x30 meter bae. Dari catatan Balai Besar TNKS, biota laut kayak ikan, zooplankton, samo fitoplankton ditemukan cuman dikit. Sedangkan ikan yang paling banyak ado di danau adolah ikan semah (Tor douronensis). Warno dari Danau Kaco ko sangat menarik minat wisatawan. Ado pulo cerito rakyat yang mengaitkan kecantikan danau ko, tapi menurut bologi, fitoplankton dan algae jugo biso bikin warno biru di aek dari kejauhan.[3]

Keunikan[edit | edit source]

Keunikan yang cuman ado di Danau Kaco adolah kecantikan dari danaunyo. Aeknyo yang biru bening kayak mutiaro dan adonyo di dalam hutan. Kalau malam hari, Danau Kaco ko terlihat menyalo kayak ado cahayo di dasar danaunyo. Apolagi kalau lagi bulan purnamo, cahayonyo jauh lebih terang.[1][2]

Akses[edit | edit source]

Danau Kaco idak teletak di Kota Jambi, melainkan di Kabupaten Kerinci. Mako dari itu, untuk masuk ke danau harus melakukan perjalanan sekitar 500 kilometer dari Kota Jambi. Kalau udah sampe di Sungai Penuh, baru perjalanan dilanjutkan ke Desa Lumpur yang memakan waktu sekitar 45 menit. Dari Desa Lumpur, perjalanan dilanjutkan dengan menyusuri hutan selamo kurang lebih 4 jam. Jalan yang dilewati adolah jalan setapak yang cukup licin dan berbahaya.[1]

Cerito Rakyat[edit | edit source]

Ado berbagai versi cerito rakyat yang dikaitkan samo Danau Kaco ko. Cerito yang terkenal adolah dulu di tanah Lekuk 50 Tumbi Lempur ado seorang Rajo yang punyo putri cantik nian. Namo putrinyo adolah Napal Melintang sedangkan rajonyo adolah Rajo Gagak.[1][2]

Karano kecantikannyo itu, ado banyak pangeran yang pengen meminangnyo. Pangeran-pangeran itu datang untuk meminang dengan bawah banyak intan samo emas supayo rajo mau untuk menerimo pinangannyo. Tapi kecantikan putrinyo malah ngebuat rajo suko sehinggo rajo bawak kabur putrinyo dan intan samo emas dari pangeran-pangeran dibuang di dasar danau.[1]

Versi lainnyo menyatakan kalau Rajo Gagak tu orang yang tamak. Dio mintak ke seluruh pangeran yang mau samo putrinyo harus bawah emas samo intan. Karno ketamakannyo ko lah, makonyo putri menjadi ternodai dan selanjutnyo dibenamin di dalam danau samo dengan harto yang dikasih pangeran-pangeran tu.[1]

Daftar Pustaka[edit | edit source]

  1. 1.0 1.1 1.2 1.3 1.4 1.5 Kompas. Menyusuri Legenda dari Danau Kaco. Diakses pada 9 Mei 2021.
  2. 2.0 2.1 2.2 Kumparan. Cerita Tragis dibalik Indahnya Danau Kaco Jambi. Diakses pada 9 Mei 2021.
  3. Gresi Plasmanto (12 Januari 2020). "Misteri Hilangnya Pelajar dan Legennda Danau Kaco Kerinci". Liputan6.com. Diakses pada 9 Mei 2021.