Jump to content

Wp/jax/Taman Nasional Kerinci Seblat

From Wikimedia Incubator
< Wp‎ | jax
Wp > jax > Taman Nasional Kerinci Seblat

Taman Nasional Kerinci Seblat (TNKS) adolah taman nasional yang paling besak di Sumatra dengan luas sekitar 13.750 km2. Koordinat dari TNKS ko adolah 100°31'18"E - 102°44'01"E dan 1°07'13"S - 1°26'14"S.[1]

TNKS berado di wiliyah 4 provinsi yaitu Jambi, Sumatra Barat, Bengkulu, dan jugo Sumatra Selatan. Ado sekitar 436 desa yang wilayahnyo bebatasan langsong samo taman ko. Pado tahun 2004, TNKS masuk ke dalam daftar World Heritage Site sebagai Cluster Mountainous Tropical Rainforest Heritage Site of Sumatra (TRHS) samo dengan TNGL dan TBBS.[1]

Sejarah[edit | edit source]

TNKS tidak serta merta dibangun gitu bae. pado tahun 1982 waktu Kongres Taman Nasional se-Dunia III di Bali, Menteri Pertanian menyatokan kalau tanah seluas 1.424.650 hektar itu akan jadi taman nasional. Kawasan yang diajukan ko sebenarnyo adolah gabungan dari beberapo kawasan hutan kayak cagar alam, suaka margasatwa, hutan lindung, hutan wisata, samo hutan produksi.[2]

Pado tahun 1996, akhirnyo menteri kehutanan ngukuhin TNKS tu dengan luas sekitar 1.368.000 hektar. Lalu tahun 1999, Menteri Kehutanan dan Perkebunan netapin kalau luas dari TNKS adolah 1.375.349,867 ha. Luasnyo semakin bertambah yaitu pado tahun 2004, kawasan hutan produksi yang ado di Sipurak Hook jadi bagian dari TNKS dan total dari luas TNKS adolah 1.389.509,867 hektar.[2]

Flora dan Fauna[edit | edit source]

Dari informasi Balai Besar Taman Nasional Kerinci Seblat (BBTNKS), ado sekitar 4.000 jenis tumbuhan dan 300 jenis anggrek yang idop di TNKS. Idak itu bae, ado pulo bungo paling besak yang idop di sano kayak Rafflesia Arnoldii, Rafflesia Hasseltii, dan jugo bungo paling tinggi yaitu Amorphophallus Titanium. Flora langka kayak kantong semar Nepenthes sp jugo dapat ditemukan dikawasan tersebut.[3]

Samo kayak floranyo, fauna yang ado di TNKS jugo banyak. Terdiri lebih dari 371 jenis burung, 85 jenis mamalia, 7 jenis primata, 6 jenis amfibi, samo 10 jenis reptilia. Dari banyaknyo flora dan fauna yang ado, sekitar 13 jenisnyo terancam punah. Satwa dan tumbuhan itu adolah gajah sumatera (Elephas Maximus Sumatrensis), harimau sumatera (Panthera Tigris Sumatrae), kelinci (Sumatera Nesolagus Netscheri), tapir asia (Tapirus Indicus), padma raksasa (Rafflesia Arnoldii), samo cemara sumatera (Taxus Sumatrana).[3]

Daftar Pustaka[edit | edit source]

  1. 1.0 1.1 TFCA Sumatera. Taman Nasional Kerinci Seblat Riwayatmu Ini. Diakses pada 10 Mei 2021.
  2. 2.0 2.1 Taman Nasional Kerinci Seblat. Sejarah Kawasan. Diakses pada 10 Mei 2021.
  3. 3.0 3.1 Liputan 6. Menjaga Warisan Dunia Taman Nasional Kerinci Seblat. Diakses pada 10 Mei 2021.