Wp/jax/Kota Jambi
Kota Jambi (Melayu: كوتا جمبي/جامبي) adolah kota yang ado di Indonesia dan merupakan ibu kota dari Provinsi Jambi. Kota Jambi mempunyoi luas sekitar 205,38 km² dan total penduduk mencapai 627,8 jiwa pado tahun 2024.[1]
Sejarah
[edit | edit source]Berdasarkan sejarah, Kota Jambi udah ado sejak Dinasti Sung . Hal ko karano di sejarah Dinasti Sung, ado Maharaja San-fo-tsi (Swarnabhumi) yang tinggal di Chan-pi. Menurut Prof. Selamat Mulyana, Chan-pi ko adolah Kota Jambi saat kini. [2]
Dari sejarah tulah makonyo Kota Jambi dinilai lah ado sejak abad ke 9M. Apolagi ado berita Chino Ling Pio Lui (890-905M) yang nyebutkan kalo Chan-pi pernah ngirim misi dagangnyo ke Chino. Kato Jambi pun sebenarnyo idak tibo-tibo ado. Menurut dari tulisan Ngebih Suto Dilago Priayi Rajo Sari tentang rajo-rajo Jambi, waktu itu Putri Selero Pinang Masak yang merupokan anak rajo turun dari Pagaruyungnyo di Jambi.[2]
Putri tu nyebut kalo daerah yang dio singgahi kini adolah Jambe (pakek bahaso Jawo samo Sunda). Putri ko memerintah kerajaan di Jambi pado tahun 1460-1480. Diyakini dari sikolah kato Jambi tu sebenarnyo ado, yaitu dari kota Jambi.[2]
Makna Lambang
[edit | edit source]Kota Jambi mempunyoi sebuah lambang dengan tulisan Tanah Pilih Pesako Betuah. Lambang ko menggambarkan identitas dari Kota Jambi tu samo Kerajaan Melayu Jambi dulu. Lambang samo tulisan ko mempunyoi makna dewek, yaitu:
Bagian Luar
[edit | edit source]Lambang Kota Jambi mempunyo bentuk meruncing ke bawah dan jugo dikelilingi tigo garis bewarno putih dan ijo. Garis ijo itu digunokan untuk menampilkan tulisan “Kota Jambi”, sedangkan namo Kota Jambi diapit dengan duo bintang bewarno putih. Warno putih itu menandokan kehidupan sosial di Jambi yang tediri dari banyak suku samo agama yang mempercayoi adonyo Tuhan Yang Maha Esa.[3]
Senapan/Lelo, Gong & Angso
[edit | edit source]Gambar Angso dijadikan salah sekok dari gambar yang ado di lambang karano waktu tu Orang Kayo Hitam nikah samo putri Temenggung Merah Mato. Putri tu benamo Putri Mayang Mangurai. Urang beduo ko dikasi samo Temenggung Merah Mato sepasang angso dan jugo perahu Kajang Lako. Mereka disuruh untuk mengaliri Sungai Batanghari mengikuti angso itu, dan mencari tempat baru untuk dijadikan kerajaan.[3]
Pesan yang paling penting dari Temenggung adolah ketiko angso tu berenti dan naik ke tebing jugo muput, selamo duo hari duo malam, mako itulah tempat untuk bikin kerjaan baru. Akhirnyo sepasang suami istri ko pegi mengiringi sungai dan setelah beberapo hari orang ko pegi, angso tu naik ke darah di sebelah hilir (Kampung Jam), samo Kampung Tenadang. Karano lah macamtu, jadinyo Orang Kayo Hitam samo Putri Mayang Mangurai mulai membangun kerajaan di situ dan diberi namo “Tanah Pilih”. Ikolah tempat yang kini dijadikan Kota Jambi.[3]
Sedangkan Senapan dan Gong tu ditemukan waktu Orang Kayo Hitam membersihkan daerah tu. Keduo bendo tu dikasih namo “Sitimang” samo “Sidjimat” dan menjadi barang pusako Kerajaan Jambi. Keduo barang ko sekarang ado di Museum Negeri Jambi.[3]
Keres
[edit | edit source]Keres dijadikan salah sekok dari bagian di lambang karano keres itu adolah “Keris Siginjai”. Waktu dulu siapopun yang punyo keris, diolah yang diakui sebagai penguaso di Kerajaan Jambi. Makonyo keris ko menjadi salah satu lambang kebesaran Rajo samo Sultan Jambi dulu.[3]
Garis Biru 9 Bijik
[edit | edit source]Ado 9 bijik garis biru di lambang. Garis tu merupakan anak sunge (batang) yang ado di Kerajaan Jambi. Batang Asai, Batang Merangin, Batang Masurai, Batang Tabir, Batang Senamat, Batang Jujugan, Batang Bungo, Batang Tebo, Batang Tembesi.[3]
Garis Ijo 6 Bijik
[edit | edit source]Garis ijo ko menggambarkan wilayah admistratif Kota Jambi dengan 6 kecamatan yaitu Pasar Jambi, Jambi Timur, Jambi Selatan, Telanaipura, Danau Teluk, samo Pelayangan. Tapi kini di Kota Jambi udah ado 2 kecamatan baru, Kota baru samo Jelutung.[3]
Batang Pinang
[edit | edit source]Batang pinang tu merupokan asal muasal dari namo Jambi.[3]
Tulisan “Tanah Pilih Pesako Betuah”
[edit | edit source]Tanah Pilih Pesako Betuah diletak di sebuoh pita emas yang ado di bawah lambang Kota Jambi. Tulisan ko jugo mengandung arti:[3]
Tanah: bagian bumi nan paling atas
Pilih: tempat yang dipilih dengan teliti
Pesako: warisan
Betuah: punyo kelebihan yang luar biaso (sakti) yang idak dipunyoi orang lain
Daftar Pustaka
[edit | edit source]- ↑ Badan Pusat Statistik. Penduduk Menurut Kabupaten/Kota di Provinsi Jambi (Ribu Jiwa), 2021-2023. Diakses pada 5 Mei 2024.
- 1 2 3 Jambi Kota. Sejarah Kota Jambi. Diakses pada 30 April 2021.
- 1 2 3 4 5 6 7 8 9 Jambi Kota. . Diakses pada 30 April 2021.