Wp/fit/Tornionlaakson Teatteri
Tornionlaakson Teatteri (r. Tornedalsteatern) perustethiin 1985 ja on aina toiminu kahela kielelä: ruotti ja meänkieli. Ensimäinen tuotanto oli ”Jää lähtee/Isen går” (tuottaja Håkan Rudehill ja ohjaaja Ulla Lyttkens) ja jonka premiääri oli kesälä samana vuona ja siittä alko valtava kehitys. Teatterin näyttämöltä/seeniltä sai kuula meänkieltä ja ylheisön elämykset olit vahvat. Seuraavanna vuona tuli Bengt Pohjasen ”Kuutot”, ensimäinen kokohnaan meänkielinen näytelmä ja sillä oon vieläki ylheisömäärän ennätys. Sen jälkhiin oon tuotettu satoja näytelmiä ja monet, monet ihmiset oon olheet matkassa näyttömöllä eri puolila Tornionlaaksoa.
Onnistuksen tärkein syy on ette käytethään puhekielen kylttyyriä lavala ja siis saatethaan paremin välittää nykyhetken tuntheita. Pelkkä ruotti olis ollu enemän kirjakieltä, ja suomi hyvin paljon vierasta kieltä.
Kaikki alko siittä ko teatterista, mysiikiistä ja kielestä intressuneita nuoria kohtasit lääninohjaajan Ulla Lytkensin ja alethiin käyttämhään meänkieltä näyttämöllä/seenilä. Samala aikaa 1980-luvula oli ylheinen kiinostus meänkielheen ja amatööriteatterhiin.
Tornionlaakson teatterin kanslia oli aina 1995 asti Kirunassa.
Bror Astermo sai palkatun työn Tornionlaakson teatterissa 1990 ja aloitti paljon amatööriteatteria ja on tehny suurta työtä kehittääksheen amatööriteatteria (Winsa 2005). Kun teatteri alkoi saamhaan valtion tukea ja ekonomi parantui 2000-luvula haethiin koulutettua johtajaa. Ulf Fembro palkathiin ammattimiehenä 2005 organisoimhaan teatterin jolla on sekä amatööriä ette ammattinäyttelijöitä. Vuoesta 2012 suomenruottalainen Lars G. Thelestam on uusi teatterin johtaja.